Medionan di comunicacion internacional, manera Politiko di Albania y Pamfleti di Italia, den ultimo simannan ta bin reportando un caso di crimen organisa cu ta involucra prome minister di Albania, Artur Shehu. Den centro di e scandal, tin un reunion cu a tuma lugar entre mafia di Albania na Aruba.

Esaki ta relaciona cu e investigacion tocante e atake contra Sigfrido Ranucci, un periodista di Italia. E homber cu a hala atencion di e investigadornan ta Artur Shehu, 58, un entrepreneur originalmente di Albania, considera pa varios investigacion como un figura influyente den crimen organisa di su pais. Actualmente e ta biba na Florida, Merca, hibando un bida discreto na Miami pa varios aña.

Segun fuentenan investigativo, hasta Directorado Anti-Mafia di Italia (DIA) a ricibi informacion for di Vlore, sur di Albania, tocante e posible participacion di Shehu den un explosion cu a tuma lugar dia 16 di october ban cas di Ranucci, anfitrion di e programa ‘Report’.

Medionan Italiano ta reporta cu actualmente esaki ta un hipotesis cu ainda mester verificacion definitivo, pero ta siendo investiga di cerca pa fiscalnan di DIA y su director interino, Ilaria Calo y fiscal substituto, Carlo Villani, hunto cu e Carabinieri di Unidad Investigativo di Frascati y Via in Selci, kende ta trahando pa dianan largo pa reconstrui tur detaye di e atake.

Posible motibo di e atentado contra Ranucci ta parce di ta vincula na e transmision di un episodio di ‘Report’ dia 21 di april, 2024, titula “(Hot) Spot Albanes”, tocante un proyecto pa construi centro di migrante cu Italia a establece na Albania, na Shengjin y Gjader, bao un acuerdo firma entre gobiernonan di Roma y Tirana. Den e rerportahe aki, nomber di Shehu a aparece varios biaha, den un red di relacion y acuerdo di negoshi tocante circulonan politico y institucional Albanes.

Den e programa, a referi na e Albanes di 58 aña di edad como un traficante mayor di droga, cita anteriormente den investigacionnan internacional pa supuesto vinculo cu Cosa Nostra y Sacra Corona Unita. Segun e reconstruccion periodistico, Shehu lo a haci un donacion di un tereno di 30.000 m2 cerca di Vlore pa e fundacion di General Fabrizio Lisi, kende e tempo aya tabata cabesante di Interpol na Albania.

E operacion – segun e programa “Report” – tabata media pa abogado Enjell Agaci, secretario general di Conseho di Minister Albanes y consehero cercano di prome minister Edi Rama, un figura tambe considera clave den prepara e acuerdo bilateral cu Italia tocante migrante.

Nomber di Shehu no tabata nobo den prensa internacional tampoco.

Na maart 2021, corant Mericano “Miami Herald” a haci un investigacion profundo riba dje, titula “Di un Villa na Miami Beach, un homber cu supuesto vinculo cu mafia ta construi un imperio di negoshi na Albania.” E articulo a pinta un imagen detaya di su bida na Merca.

E siman aki, segun reportahenan, fiscalnan tambe ta investigando su perfil internacional, buscando match entre e informacion colecta na Albania y e movementonan di Shehu. E posible instigadornan di e atake contra Ranucci ta keda cuantioso, mirando e cantidad di investigacion cu “Report” a haci durante añanan, hopi biaha bayendo den areanan sensitivo y tocando interesnan economico y criminal significante. Na e etapa aki, sinembargo, e atencion di investigadornan ta parce di ta enfoca principalmente riba cierto sector di mafia Albanes, mientras e Carabinieri ta continua nan esfuerso pa identifica ken fisicamente a pone e explosivo – y ken, segun e hallazgonan mas recien, por a tambe purba kibra drenta cas di e periodista berano ultimo, sin exito.

Atake contra Ranucci
 Dia 16 di october, un explosivo a rementa auto di Ranucci y su yiu muher dilanti cas di e periodista cerca di Pomezia. E bom tabata consisti di 1kg di explosivo, y a detona 20 minuut despues cu yiu di Ranucci a para e auto. Ningun persona a resulta herida afortunadamente, pero dos vehiculo y un cas cercano a sufri daño. E atake tabata un intento di asesinato cu a sacudi henter Union Europeo, den un clima unda atake y censura contra periodista ta birando mas comun y mas severo.

Papiando diamars ultimo na un seminario den Parlamento Europeo na Strasbourg, Ranucci a denuncia un problema cu awo ta “global den su alcance”: atake contra e derecho na informacion. Recordando e atake dilanti su cas, Ranucci a reitera e sentimento di un “quantum leap” compara cu e “actividadnan di dossier falso, desligitimisacion, menasa constante” cu el a ricibi den añanan recien, segun EUNews ta reporta.

Reunion misterioso na Aruba

Entre e cantidad di enigma rond di Artur Shehu, un di e mas intrigante ta e supuesto reunion cu a tuma lugar na Aruba na januari di 2019. Loke a sucede riba nos isla a bira un pida crucial pa compronde e interseccion entre crimen organisa, negoshi y poder politico na Albania. E episodio – revela prome pa periodista investigativo Italiano, Nello Trocchia den su buki “Invincibili” y reporta den “Domani – awo ta parti di e debate publico mas amplio na Tirana, unda parlamentarionan di oposicion a exigi splicacion di gobierno di Rama.

Segun extracto di documento di corte anti-mafia Italiano cita pa Trocchia, DIA a documenta un reunion “entre comerciante, traficante di droga y representantenan di e gobierno actual di Albania.” E reunion a tuma lugar entre 24 y 31 di januari 2019 na Aruba. Investigadornan Italiano y Aleman segun reportahenan a intercepta combersacionnan referiendo na e encuentro, describiendo e presencia di Artur Shehu y otro figura Albanes, incluyendo un traficador identifica como Genci Hamzai (alias Alfredo Hamzai). E meta, investigadornan a skirbi, tabata pa negocia un “acuerdo di inversion” cu lo inclui otorga un permiso di construccion na Tirana pa un proyecto di high rise, cual tereno tabata propiedad di dos grupo criminal. Despues di e reunion, Shehu a crea e compania “Adhenis sh.pk.” Na maart, Adhenis a ricibi permiso pa construi hotel y restaurant na Vlora.

A pesar cu no a inicia proceso criminal na Italia – a cera e dossier despues pa motibo di limite hurisdiccional y procedural – investigacionnan paralel ta continua den otro pais Europeo, incluyendo na Belgica. E cumbre na Aruba, investigadornan Italiano a nota, ta ehemplifica e caracter cada bes mas transnacional di crimen organisa Albanes, cu ta usa inversion cu ta mustra legitimo pa laba placa di narcotrafico y otro actividad ilicito.

Na Albania, e reunion na Aruba a provoca un confrontacion politico feroz. Gazment Bardhi, lider di fraccion di partido Democrata den Parlamento, a bisa parlamento cu e reunion a revela “e laso directo di gobierno cu crimen organisa.” Citando fuente hudicial Italiano y Belga, Bardhi a bisa cu despues di e reunion na Aruba, administracion di Rama a aproba un permiso di construccion na Vlora pa un compania vincula na Shehu – un autorisacion cu, segun regulacion local, nunca mester a keda otorga pasobra e sitio tabata destina como un promenade na costa. Bardhi y un grupo di parlamentario di oposicion a exigi un interpelacion cu prome minister, argumentando cu Rama mester clarifica si Shehu of su companianan a ricibi licencia, concesion of otro contract estatal, y ki stap a tuma pa preveni influencia criminal den economia.

Pa awo, e episodio na Aruba ta keda un misterio abierto. Cuerponan investigativo Italiano ta reconoce existencia di e reunion, pero no a revela su contenido completo ni tur participante. Ningun oficial representante di gobierno Albanes a confirma of rechasa su presencia publicamente.

Si e reunion na Aruba tabata un cumbre strategico di poder ilicito of un coincidencia mal comprondi, su implicacionnan ta profundo. E ta conecta Caribe cu Adriatico, vinculando e fluho di placa di droga, speculacion di real estate y privilegio politico. Tambe ta expone e porosidad den e frontera entre gobernacion y criminalidad cu ta sigui defini panorama post-transicion di Albania – y den wowo di investigadornan, por yuda splica pakico figuranan manera Artur Shehu ta keda, den palabra di Trocchia, “invencible.”

Riba potret: Prome minister Edi Rama.