Recientemente durante un conferencia di prensa Prome Minister Mike Eman, Minister di Asuntonan Economico, Finanzas y Sector Primario, Geoffrey y Minister di Infrastructura y Telecomunicacion, Rene Herde, a duna actualisacion tocante e siguiente fase di renobacion di centro di ciudad.

Prome minister Eman a remarca cu centro di ciudad ta un tema sumamente importante, tanto na San Nicolas como Oranjestad y den e contexto ey ta anuncia e destaho publico pa e siguiente fase di renobacion di Wilhelminastraat.

El a splica cu minister Wever durante gobernacion anterior a haci un esfuerso grandi dentro di un gabinete cu, segun e mandatario, no tabata asina na fabor di e continuacion di renobacion di centro di ciudad y a keda insisti pa continua cu e vision pa un centro di ciudad renoba.

“Nos a mira cambionan sumamente importante cu a tuma luga den Wilhelminastraat y tambe den Columbusstraat. Nos ta mira con e area ey ta desaroyando cu hopi interes di comercio. For di su cartera atrobe ta sali hunto cu Minister di Infrastructura un otro iniciativa pa continua den direccion di renobacion di centro di ciudad Oranjestad y San Nicolas,” el a subraya.

Prome minister Eman a indica cu minister Wever a tuma iniciativa pa empuha e idea aki y aworaki ya e proyecto ta asina leu cu tin un destaho publico pa e siguiente fase, den cooperacion cu Minister di Infrastructura. “Un tremendo teamwork di Minister di Infrastructura Herde y Minister di Finanzas y Economia cu a demostra e grandesa cu hunto nos por haci un diferencia pa e pais. Door di tuma decisionnan pa garantisa continuidad, awe nos por tin un centro di ciudad cu ta conociendo mas renobacion,” el a agrega.

Minister Geoffrey Wever di su banda a enfatisa cu e proyecto aki ta parti di un vision cu Gabinete AVP-Futuro a pone su dilanti basa riba un fundeshi cu a origina hopi tempo pasa bou Gabinete Mike Eman, y continuando cu e trabou ey a resulta den e renobacion di e area di Columbusstraat y Wilhelminastraat usando hasta e mesun arquitecto cu e tempo ey tabata encarga cu e desaroyo di centro di ciudad.

“Nos ta wak esfuerso colectivo for di un gobierno cu desde e prome dia a bisa cu hunto ta bay traha pa desaroya e centro di Oranjestad cuminsando cu diferente proyecto y iniciativa cu ta ser carga pa henter e gabinete. Gabinete AVP-FUTURO ta continua cu esaki y ta duna contenido real na e compromiso cu ta bay sigui renoba e centro di Oranjestad,” el a enfatisa.

Minister Wever a anuncia cu oficialmente ta habri e destaho publico y ta invita arquitectonan pa duna nan idea con pa renoba e resto di Wilhelminastraat pa asina mehora full e area den mesun ambiente manera cu tin den Wilhelminastraat y Columbusstraat.

El a splica cu arquitectonan local por participa y entrega nan oferta y un comision di comerciante y representantenan di gobierno lo eligi e concepto mas bunita. E arquitecto cu gana e destaho aki ta haya e oportunidad pa prepara full e diseño di e area enfocando riba hopi accento di mata, pa lugar pa hende por sinta y tamBe riba e infrastructura pa e por bira e centro culinario di Oranjestad.

Pa loke ta financiamento, e mandatario a indica cu den e cambio di presupuesto 2025 a aloca un miyon florin adicional pa financia e proyecto aki. “No ta solamente palabra pero nos ta percura a tambe pa e presupuesto refleha e ideanan ey,” el a agrega.

Di su banda minister Rene Herde a agrega cu e idea pa renobacion di centro di ciudad ta uno cu a nace hopi aña pasa y ta contento cu minister Wever a continua cune. El a indica cu e inversion den e infrastructura no ta solamente inversion fisico, pero ta bay usa tur instrumento legal y fisico pa percura cu e proyecto aki ta continua den e fase aki y den futuro.

Minister Herde a splica cu banda di inversion di placa lo percura pa stimula centro di ciudad of stimula cualkier proyecto, usa tur instrumento. El a sigui splica cu Ministerio di Infrastructura tin e posibilidad tambe pa haci uso di dunamento di permiso por ehempel pa precario pa despues ora e infrastructura ta cla, restaurantnan por usa espacio nobo cu ser crea pa nan por crea terasanan cu e posibilidad pa come afo y haci bon uso di e tempo.

“Nos lo facilita esey como parti di e stimulacion di centro di ciudad. Pa mantene un centro cu ta bay ta mas activo cu e ta aworaki mester tin cosnan manera mantencion di edificionan, areanan publico, recogemento di sushi regular, tur esey nos ta bay haci uso di nos capacidad di organisacion pa percura pa tur esey tambe sucede,” el a remarca.

E mandatario a señala cu pa inversion y mantencion sigui den futuro gobierno ta bay percura pa usa tur instrumento cu mester pa e proyecto ta exitoso. “E ola di innovacion cu nos ta bezig cune tin cu continua tambe den futuro,” el a agrega.

Minister Herde a splica cu Oranjestad Investment Group ta encarga pa trece e inversionistanan y e doñonan di edificionan hunto. El a indica cu miembronan di gabinete a reuni cu nan caba y a haci un paseo door di centro di ciudad y a papia cu hopi di e doñonan di edificio. El a expresa cu el a mira un entusiasmo cu pa hopi aña no tabata t’ey pa inverti den edificionan existente y edificionan cu a decai un poco pa renoba nan.

“Nos ta wak un entusiasmo cu mi ta kere ora e otro inversionista y doñonan di edificio wak kico nos ta haciendo nan tambe lo subi riba e garoshi di innovacion di centro di ciudad. Tin diferente proyecto di renobacion di edificionan monumental caba andando y nos ta habri pa yuda unda cu por pa sigui haci esaki,” el a finalisa.

Por ultimo, prome minister Eman a agrega cu algun dia pasa gobierno a firma den Fort Zoutman un acuerdo historico cu e inversionistanan cu ta demostrando un interes hopi grandi pa yega na desaroyo di edificionan monumental den centro di ciudad. El a splica cu a reparti responsabilidadnan cu ta hopi cla cu ta di gobierno, entre otro mantencion di e area, y tambe atende cu e tema di e adictonan ambulante, cu ta un tema cu tin efecto riba centro di ciudad.

El a indica cu a papia di limpiesa y tambe di permisonan cu minister Herde a referi na dje. Prome minister Eman a sigui splica cu hopi biaha e companianan cu kier tuma iniciativa pa habri mesa cu stoel pafo ta haya nan confronta cu hopi papeleo prome cu por yega na haci esey. Pa motibo ey, el a enfatisa, di parti di gobierno y minister di asuntonan economico tin un rol basta importante pa locual ta trata cierto permisonan cu mester ser duna tanto di parti di infrastructura pero tambe asuntonan economico.

El a señala cu di otro banda a pidi tambe atencion di esnan di sector priva pa no sucede cu inversion ta ser haci y despues e empresarionan ta keda atras. “Nos a experiencia esey un poco den pasado ora cu a haci inversionnan grandi den caya grandi, di waf te cu caya grandi, cu e parti di sector priva no a bay cu mesun ritmo cu a desea, y ta sinti cu den e grupo di inversionistanan aki tin un postura hopi proactivo y esey ta duna gobierno e sentimento cu nan lo haci di nan parti loke nan ta priminti di haci,” el a finalisa.