(AP) — Un corte di apelacion a anula riba diamars e conviccion di ex-Presidente Colombiano Alvaro Uribe pa soborno y manipulacion di testigo pa cual e tabatin un sentencia di 12 aña di aresto domiciliario.

Uribe, 73, a nenga cualkier mal hecho. El a ser sentencia na augustus despues di un proceso di casi seis luna den cual fiscalnan a presenta evidencia cu el a purba influencia testigonan cu a acusa e lider di ley y orden di tin conexion cu un grupo paramilitar den añanan 1990.

E corte a bisa diamars cu e conviccion tabatin “deficiencia structural,” a usa promesanan vago y tabatin falta di analisis comprensivo. Dos di e tres hues riba e panel a vota pa anula e conviccion; e di tres a pensa cu mester a mantene esaki.

Fiscal y victimanan por apela e decision di diamars na e Corte Supremo di Colombia. E ex-presidente, kende tabata liber pendiente di su apelacion, a mira e procedementonan via video link.

E caso a duna energia tanto e partidarionan di Uribe como su criticonan, ya cu e ultimo cambio ta bin den medio di campañanan pa e eleccionnan legislativo y presidencial di otro aña na Colombia. E partido di Uribe, Centro Democratico, ya a bisa cu Uribe lo postula pa senador si su situacion legal permitie. E sentencia original a inclui un prohibicion di 8 aña pa ocupa un puesto publico.

Senador Paloma Valencia, un partidario di Uribe, a skirbi riba e plataforma social X cu el a sinti alivio pa e decision mas reciente.

E ex-presidente a goberna cu sosten fuerte for di Merca. E ta un figura polarisante na Colombia, unda hopi hende ta dun’e credito pa salba e pais di bira un estado fracasa, mientras otronan ta asoci’e cu violacion di derecho humano y e aumento di gruponan paramilitar den añanan 1990.

E hues den e proceso original di Uribe a bisa cu el a mira suficiente evidencia pa determina cu Uribe a conspira cu un abogado pa persuadi tres ex-miembro di un grupo paramilitar, kende tabata den prison, pa cambia testimonio cu nan a provee na Ivan Cepeda, un senador di e banda izquierda cu a lansa un investigacion den e conexionnan alega di Uribe cu un grupo paramilitar.

Uribe na 2012 a presenta un demanda di difamacion contra Cepeda den e Corte Supremo. Pero den un cambio, e corte halto na 2018 a descarta e acusacionnan contra Cepeda y a cuminsa investiga Uribe.

Un punto clave den e racional di e corte di apelacion pa anula e conviccion di Uribe tabata e legalidad di interceptacion di e telefon di Uribe. E corte a determina cu mester a exclui esakinan como evidencia pasobra nan a ser inicia eroneamente mientras un otro persona tabata bao investigacion.

Presidente Gustavo Petro a critica e decision di e corte diamars pa exclui e interceptacionnan, splicando riba X cu nan no tabata informacion priva pasobra ” ta parce cu e stem di Uribe ta papia tocante soborno.”

E ex-presidente conservador ta un di e oponentenan mas vocal di Petro, e prome hefe di estado izquierdista di Colombia.

Mientras tanto, Secretario di Estado di Merca Marco Rubio a bisa riba X cu “husticia a prevalece” den e caso di Uribe, kende el a bisa tabata e victima di un “witch hunt.”