Tecnologia Hulandes cu balor di mas cu $8 miyon den proyecto secreto di defensa Ruso

(NLTimes) — Producto di tres compania Hulandes ta ser usa den un arma na lama cu Rusia ta secretamente construyendo pa proteha su submarinonan nuclear. E compania di tecnologia maritimo Royal IHC, Rederij Groen, y Smit Terminals (awor Boskalis) hunto a suministra mas cu $8 miyon den producto na un compania na Cyprus cu ta un fachada Ruso, Pointer a descubri den “Secreto Ruso,” un proyecto di investigacion internacional door di periodistanan for di e programa Hulandes, NDR, Le Monde, y The Washington Post, entre otro.

Pa mas di un decada, e ministerio di Defensa di Rusia ta usando un red di companianan di fachada pa adkiri tecnologia for di e Occidente, cumprando productonan for di 9 pais Europeo, Merca, Canada y Hapon, e periodistanan a descubri.

Central den e red di adkisicion Ruso aki ta Mostreyo Commercial Limited cu ta basa na Cyprus. E compania ta pertenece na un empresario di Moscu cu a traha pa e ehercito Ruso y servicionan di inteligencia na varios ocasion. Investigacion di Pointer a mustra cu Mostreyo y companianan relaciona a cumpra tecnologia submarino sensibel y barconan di investigacion cu un balor di mas cu $56 miyon durante e ultimo 12 aña.

E bienes aki finalmente a termina na e compania di estado Ruso Upravelenie Perspektivnyh Tecknologij (UPT), cual Rusia ta usando pa construi un sistema di defensa submarino pa proteha su submarinonan nuclear. E sistema di defensa aki ta conoci como proyecto Harmony, y e ta aumenta e capacidadnan militar di Rusia den e Artico, unda su submarinonan nuclear ta staciona.

Informacion filtra a revela cu Mostreyo a cumpra ekipahe for di por lo menos 3 compania Hulandes. E compania di fachada Ruso a cumpra ekipahe maritimo cu un balor di $4,2 miyon for di Royal IHC, cual a ricibi financiamento di gobierno Hulandes na varios ocasion pasobra e ta fabrica submarinonan pa defensa. Mostreyo tambe a cumpra e barconan di investigacion Mariska G for di e compania di transporte Hulandes Rederij Groen y e Sam O’Cat for di e compania Hulandes Smit Terminals Europe LTD, cu awor a ser adkiri door di Boskalis.

Voceronan di Rederij Groen y Smit Terminals a confirma e benta di e barconan di investigacion. E tres compania ta declara cu nan a cumpli cu tur rekisito legal.

Pero segun expertonan di sancion, e tres compania Hulandes aki mester a reconoce cu nan tabata bende bienes na Rusia. “Un compania ‘letterbox’ (fraudulento) na Cyprus ta un señal clasico di alerta,” Frank Slijper, un experto di defensa na PAX, a bisa Pointer. “Companianan activo den e sectornan di offshore y defensa, en particular, sa con sensitivo e exportacionnan aki ta.”