Recientemente a bira conoci cu Gabinete AVP-FUTURO a tuma decision pa por lo pronto no nombra un minister plenipotenciario na Hulanda. Esaki a trece cuestionamento y preocupacion di parti di e partido mas grandi di oposicion, MEP. Durante un conferencia di prensa miembro di fraccion di MEP, parlamentario Xiomara Maduro, a elabora riba e topico y e puntonan cu ta causa preocupacion.
Segun parlamentario Maduro, e funcion cu durante mas cu cuater decada a forma un pilar den relacion di Aruba cu Reino Hulandes, no lo sigui existi den su forma actual. Alabes el a remarca cu e decision por ta un violacion di Statuut pa Reino Hulandes y por tin consecuencia grandi pa e autonomia y representacion di Aruba den Reino.
El a splica cu na lugar di nombra un minister plenipotenciario permanente na Hulanda, Gobierno a bisa cu lo manda minister di Aruba mes pa representa e pais na reunionnan. E siman aki Minister di Relacionnan di Reino, Gerlien Croes, lo ta bay ta na Hulanda pa atende e reunion di Conseho di Minister di Reino (Rijksministerraad).
Segun e Gobierno, e paso aki ta un manera pa “spaar placa”, eliminando gasto cu tin cu mantene un minister. Fraccion di MEP ta mira e decision aki como uno peligroso cu ta debilita Aruba su voz y su presencia politico den Hulanda — na un tempo cu e relacionnan di Reino mester di mas dialogo y representacion.
Parlamentario Maduro a indica cu e biahe cu minister Croes lo haci e siman aki mes lo costa mas cu 25 mil florin y lo solamente dos dia na Hulanda. Pa fraccion MEP esaki ta trece duda riba si berdaderamente ta un medida pa spaar placa of si ta un gasto di mas, specialmente pasobra e e reunion ta cay dos dia despues di eleccion parlamentario na Hulanda.
“Mira cuanto sentido tin pa manda un minister di Aruba tur luna pa un reunion di dos dia, hopi biaha den momentonan sensitivo politicamente,” un analista politico a comenta. “E cuestion aki ta bay mas leu cu un asunto di placa — ta trata di representacion y di respet pa e structura constitucional di Reino
“Bo tin cu puntra bo mes ki decision asina importante por tin cu un minister tin cu bay di Aruba te Hulanda atende reunion y dos dia despues di eleccion,” el a cuestiona.
Maduro a subraya cu e decision di gobierno ta uno straño pasobra locual nan kier haci ta contra Statuut pasobra den Statuut articulo siete ta indica cu den Conseho di Minister di Reino, ta e minister plenipotenciario por atende esaki y ta esun cu tin cu sinta na mesa den e reunion aki, pues, segun e parlamentario, un minister di Aruba no por simplemente bay y sinta den e reunion.
“Esaki ta un acto, cu fuera cu e ta contra di nos Statuut, e tambe ta iresponsabel pasobra nos tur sa cu Hulanda ta den eleccion, nos tur sa cu na Hulanda mester tin un representacion pa asina sigura cu Aruba su autonomia ta ser cuida,” el a agrega.
Parlamentario Maduro a enfatisa cu e trabou di un minister plenipotenciario ta mucho mas amplio cu simplemente bay un reunion pa luna. El a splica cu e persona aki ta un enlace politico y diplomatico constante entre Aruba y Hulanda. E ta mantene contacto cu miembro di Eerste y Tweede Kamer, cu autoridadnan di diferente ciudadnan, y cu embahadornan di otro pais. E ta representa Aruba den evento y recepcionnan diplomatico, algo cu e parlamentario a enfatisa ta esencial pa defende Aruba su interesnan.
Ademas, el a indica, e minister plenipotenciario tin un rol humano y social importante. E ta tene contacto cu studiantenan y diaspora di Aruba na Hulanda, y e ta representa Aruba den organisacionnan internacional manera OCTA.
“Si bo ta scoge pa bisa cu ta elimina minister plenipotenciario, esey kiermen cu locual ta e lasonan politico, e parti di contacto humano cu e Arubiano eynan y algo cu tin mas di 40 aña asina, y pa colmo hancra den un Statuut, y ta laga esey elimina djis pasobra minister Gerlien kier biaha,” parlamentario Maduro a indica.
El a señala cu e decision di gobierno ta cuestionabel tambe pasobra si mira por ehempel e conseho cu Raad van State a emiti aña pasa, en conexion cu 70 aña di Statuut, e ta bisa cu mester fortalece e posicion di e minister plenipotenciario na Hulanda.
Ademas, el a menciona cu algun siman pasa, minister Croes a gaba cu a haya mas fondo pa drecha y renoba e Arubahuis, cu supuestamente ta pa fortalece representacion di Aruba na Hulanda, pero awor e mes ta elimina un di e funcion principal di e mesun institucion
“Algo no ta cuadra y den esaki pueblo tin tur derecho di sa, y ya caba tin hopi pregunta. Gobierno a nombra minister Gerlien pa minister Gerlien bay, pero ley ta bisa bo cu ta e minister plenipotenciario por of un hende cu ta represent’e. Awor gobierno a dicidi cu ta minister Gerlien ta bay actua manera minister plenipotenciario? E ta haya un cartera extra? Pero niun hende a bisa nada,” el a remarca.
Parlamentario Maduro a sigura cu fraccion di MEP ta bay haci pregunta oficial pasobra pa nan e situacion “ta algo masha straño.”
“Ki ansha minister Gerlien tin pa bay tur luna Hulanda. Ki bo tin di bay busca na Hulanda siendo akinan bo tin cinco cartera, asuntonan cu bo tin cu atende y aworaki pa kier bay cambia un sistema di 40 aña,” el a remarca.
Por ultimo parlamentario Maduro a indica cu minister Gerlien Croes a lucha cu AVP pa e por a haya e cartera di Relacionnan di Reino y na caminda aworaki e ta elimina e posicion di minister plenipotenciario. “E cos aki no ta bon y e ta contra locual Sra. Gerlien Croes mes ta bisa su votadornan, cu pueblo mester ta bon representa, cu mester tin transparencia, cu mester tin respet, cu mester tin bon gobernacion, pero locual ta su actonan aworaki, sigur cu e parti aki di bay contra Statuut, di kier elimina minister plenipotenciario, di bisa di un banda cu ta baha gasto y di otro banda bo ta wak cu e mes ta haci gast, algo no ta cuadra akinan,” el a finalisa.
