Siguiendo cu su meta pa modernisacion y digitalisacion di servicio, AZV a anuncia cu pa final di aña 2025 tur carchi di AZV lo caduca y lo ser descontinua. Esaki ta nifica cu aseguradonan lo mester usa unicamente e AZV App pa demostra cu nan tin un polisa valido di AZV, via un version digital di e ZorgPas, cual ta e Digi-ZorgPas.

E medida aki ta un paso importante den modernisacion di sistema di salud na Aruba, pero tambe a causa preocupacion entre algun grupo di ciudadano, particularmente entre adultonan mayor cu no tin celular of no ta familiar cu tecnologia digital.

Ki opcion tin pa esnan cu no tin celular?

Den bista di e preocupacion cu ta andando den e comunidad, Bon Dia Aruba a acerca na e representante di relacion publico di AZV, sra. Solange Tchong, y a puntra con e personanan sin celular of sin acceso na internet lo por demostra cu nan ta asegura cu un polisa valido di AZV y si lo tin excepcion of otro alternativa pa nan.

Sra. Tchong a confirma cu den caso di e asegurado cu no tin telefon celular of no tin acceso na Wi-Fi na e momento cu mester bishita un instancia medico, AZV a pone un alternativa cla. E persona por presenta un ID valido — sea paspoort, cedula of rijbewijs — y e dunador di cuido lo por usa un webportaal, cual lo ta special pa verifica si e cliente ta un asegurado di AZV cu polisa activo.

“Pues e adulto mayor cu no tin celular por usa su ID valido. Y e dunador di cuido tin e responsabilidad pa controla cu cada servicio cu e ta duna ta pa un cliente legitimo di AZV. Pa esaki e dunador di cuido ta haci uso di un webportaal special cu ta disponibel pa e dunador di cuido. Riba e webportaal aki e dunador di cuido por check e datonan y e validez di e polisa,” el a indica.

Tchong a agrega cu otro opcion cu e adulto mayor tambe tin ta laga un yiu of miembro di famia meld na AZV pa e adulto mayor ser agrega den e AZV app bou di e yiu of e miembro di famia cu ta hiba e adulto mayor pa servicio medico cu mas frecuencia. Asina semper e adulto mayor tin su prueba di AZV na man.

Por ultimo, un punto importante cu Tchong a enfatisa ta cu e ZorgPas tin e number di cliente di AZV. E number di AZV ta un number unico di e cliente, pues ta importante cu aunke e carchi di AZV caduca warda esaki. Cu e number unico di AZV y un ID valido, e dunador lo por controla e dato riba e webportaal mas lihe.

Pues lo ta util pa e aseguradonan, specialmente adultonan mayor cu no tin un celular of tin dificultad cu tecnologia, no tira afo e carchi bieu despues di su vencemento, sino warda esaki pa referencia nan number di AZV, pero semper teniendo na cuenta cu e carchi mes no ta valido mas y ta keda cu esaki unicamente pa e AZV nummer.