Diaranson bishitantenan di Eagle Beach por a nota olanan abnormalmente halto kibrando na canto di lama. Segun medionan local, ta parce cu no tabata solamente na Eagle Beach, pero cu por a nota lama bruto for di Bushiri te Arashi.
Debi cu a evalua un posible peligro pa landadornan den e area—specialmente muchanan chikito y adultonan mayor—a pone varios bandera cora rond e area di Eagle Beach, consehando hende pa no drenta awa en general.
Aunke ta parce cu e efectonan di Horcan Melissa a cuminsa bay, e Departamento Meteorologico di Aruba (Meteo) a emiti asina mes un aviso pa botonan chikito den oost y noordwest di costa, ademas di conseha usuarionan di lama den e parti zuid pa keda alerta.
Hopi usuario a expresa nan sorpresa pa mira e estado di lama, como cu e partinan aki ta relativamente calma durante gran parti di aña y Eagle Beach en particular ta un lama faborito entre ambos local y turistanan.
Fundacion Centro di Pesca Handicuri tambe a tuma nota di e olanan inusual y a emiti un conseho pa piscadornan di Aruba tuma medidanan debido, manera di ancra nan botonan. E fundacion a splica cu e olanan ta bin a causa di un resake, of ‘swells’ den Ingles, cual ta gruponan di ola grandi cu ta ser causa pa tormentanan miles di kilometer leu. E fundacion a nota cu e olanan observa den e area ta biniendo for di un direccion inusual, cual por causa confusion y disturbio pa boto y piscadornan.
Tambe riba medionan local a nota cu lama a subi na Surfside Beach, dunando un señal mas di e impacto cu e eventonan di tempo ta teniendo den e lama nos alrededor.
