Segun e uitvoeringsrapportage di gobierno mas recien tocante e finanzas di Pais Aruba, Servicio di Limpieza di Aruba (Serlimar) a logra mantene un posicion financiero stabiel, cu un mehoramento modesto den e resultado operacional durante e prome mita di 2025 compara cu e aña anterior. A pesar di esaki, e rapport ta nota cu ainda e instancia ta enfrenta algun reto structural, entre otro den diversificacion di su modelo empresario.

E asunto financiero di e organisacion tabata den e ultimo añanan un punto di gran discusion y preocupacion debi na un debe enorme di 21 miyon florin, ademas di ineficiencia den maneho di finanzas for di gerencia y gobierno. E institucion tin dos grupo di cobrador di debe, cu ta pais Aruba y cobrador particular. E debe na pais Aruba tabata Afl. 13 miyon di impuesto y primanan social atras y e debe na e cobrador particular tabata Afl. 7 miyon na 2021.

Segun investigacionnan haci pa Algemene Rekenkamer Aruba (ARA), e debe a surgi mayormente pa via di un modelo financiero defectuoso dentro di e acuerdo di servicio (DVO). Por ehempel, e tarifanan colecta di clientenan tabata demasiado abao of no bon aplica, mientras gastonan den personal y contratonan tabata halto. Segun e investigacion di ARA, e DOV no tabata refleha e discrepancianan aki.

Na mei 2020, corte a otorga Serlimar un ‘surseance van betaling’—un suspension den pago di debe. Den augustus 2023, e organisacion a logra sali di e surseance y cuminsa tuma decisionnan financiero pa su mes. Sinembargo, e caminda pa recuperacion ta mustra di ta uno largo.

Durante su ultimo rueda di prensa como minister encarga di Serlimar, ex-minister Ursell Arends a enfatisa na maart cu e instancia ta mehorando su situacion financiero a pesar di a subraya cu ainda tin mas espacio y oportunidadnan pa implementa e disciplina financiero.

Operacion stabiel durante 2024 pa 2025

Segun e Uitvoeringsrapportage pa e ultimo kwartaal di 2024, Serlimar a cera e aña cu un ingreso total di Afl. 32,1 miyon y gasto di Afl. 32,0 miyon, resultando den un surplus chikito di Afl. 109 mil. Pa mitar di 2025, Serlimar a reporta un ingreso di Afl. 15,47 miyon y gasto di Afl. 15,27 miyon, generando un surplus di Afl. 202 mil. Compara cu e segundo kwartaal di 2024, Serlimar a mira un aumento di 217 mil den ingreso den un periodo di 1 aña.

E resultado aki ta representa un mehoracion leve compara cu aña pasa, tanto den porcentahe como den eficiencia operacional. Segun analisis di e rapport, e mehoracion por a bin mayormente for di aplica e disciplina financiero di mantene gastonan. Pa e segundo kwartaal di e aña, e organisacion a logra 48% di su ingreso total di 2024, indicando un fluho di ingreso constante y den linea cu e plan financiero. Na mesun momento, e resultado di e prome dos kwartaal di 2025 ta indica cu e gasto total a yega 47,7% di e total di 2024, loke ta indica un disciplina presupuestario fuerte.

Manera a reporta den pasado, mehoracionnan den finanzas a bin despues di a ahusta tarifa di coleccion y a aumenta e esfuersonan pa colecta e debe di subscripcion. Tambe, un software administrativo nobo a wordo introduci pa mehora pago y colecta. E gastonan di Serlimar tambe a ser reduci pa transferi e equiponan di caya pa Fundacion Parke Nacional Aruba y Bureau City Inspector. Na februari 2023, un acuerdo di pago a wordo logra entre DIMP y Serlimar pa e debe di impuesto y primanan social. E lantamento di e suspension di pago ta nifica cu Serlimar por tuma su propio decisionnan.

E surplus chikito na mitar di aña 2025 ta mustra miho eficiencia operacional—cu un aumento den e resultado positivo sin aumento significativo den gasto. E tendencia aki ta señala cu Serlimar ta sigui traha den forma mas eficiente sin cambia su restructura di gasto.

Limitacionnan

A pesar di ta mirando un crecemento gradual, e rapport tambe ta indica cu Serlimar ta sigui opera dentro di margennan financiero hopi chikito, cual ta stroba posibilidad di diversifica entrada for di diferente fuente. E entrada principal di e organisacion ta bin for di tarifanan fiho pa servicio di limpiesa y ta laga menos espacio pa continua cu procesamento di desperdicio.

Manera ya ta conoci, a cera Parkietenbos pa desperdicio domestico y comercial, pa asina por enfoca mas riba mehoracion di e structura di coleccion di tarifa y reduci gastonan grandi, segun recomendacionnan di PricewaterhouseCoopers (PwC) na 2022. Ex-minister Arends a enfatisa na maart cu awor cu ta mirando un mehoracion financiero, e organisacion mester drenta back den procesamento di desperdicio tambe. Sinembargo, mirando e resultadonan di e rapport financiero no ta probable cu e reintegracion aki lo tuma luga pa awor—a pesar di mustra un cambio positivo. Turesten, e gobierno anterior a implementa e ‘Baki den Bario’. Pero a subraya si aña pasa cu gobierno no por keda carga e peso financiero di maneho di desperdicio pa nos ciudadanonan, pues aunke ta sigui implementa Baki den Bario tur luna, esaki ta no mas un solucion temporal mientras Serlimar ta den recuperacion.