Desde 24 di october 2025 pa dilanti, e Central Bureau of Statistics (CBS), den colaboracion cu Departamento di Labor y Investigacion (DAO) y Banco Central di Aruba (CBA), a cuminsa cu e Encuesta di Forsa Laboral 2025 (EFL2025).

E estudio nacional aki tin como meta pa duna un bista cla y actualisa di e situacion laboral den e isla, y pa compila datonan importante riba empleo, desempleo y participacion den e mercado laboral.

Jimmy Mijer, Communicatie & Voorlichting na CBS y Yvonne Lee-Perez, Director di DAO a splica cu EFL2025 lo recolecta informacion no solamente di e personanan cu ta traha, sino tambe di esnan cu ta sin trabou of cu no ta activo den e mercado laboral. Di e forma aki, e estudio por analisa e structura completo di e forsa laboral di Aruba y trece claridad riba temanan manera tasa di empleo y desempleo, participacion segun sexo y nivel di educacion di e poblacion laboral.

Segun CBS, esaki ta esencial pa compronde miho e dinamica di e mercado di trabou y pa informa politicanan y decisionnan basa riba datonan confiabel y actual di Aruba.

Hogarnan cu a participa den Censo2020 y den EFL2023, y cu a indica deseo pa sigui coopera, por spera un yamada for di un encuestador di CBS. Diferente na e encuesta anterior, e biaha aki e encuesta lo ser completa telefonicamente, y e encuestadornan lo tuma contacto den siman y den weekend entre 8or di mainta y 8or di anochi.

Mijer a enfatisa cu pa evita cu persona no ta responde e yamada pa motibo cu ta trata di un number desconoci, a publica e ocho number di telefon cu lo ser usa durante e encuesta. E yamadanan lo bin for di e siguiente numbernan di telefoon:

6997910, 6997911, 6997912, 6997913, 6997914, 6997915, 6997916 y 6997917.

El a sigui splica cu e encuesta ta dirigi na tur persona di 15 aña y mas, basa riba e regla internacional di e Organisacion Internacional di Labor (ILO), cu ta considera esaki como e rango di edad cu ta forma parti di e forsa laboral. Pa e motibo ey CBS ta haci un yamado pa tur adulto – emplea, desemplea of no activo – pa participa den e encuesta aki pa por tin informacion actualisa tocante e forsa laboral di Aruba.

Mijer a remarca cu e cuestionario ta cubri temanan manera educacion, sector laboral, funcion, orarionan di trabou, y pa 2025, tambe lo inclui preguntanan adicional tocante contenido di funcion, oportunidad di crecemento profesional y seguridad laboral.

CBS, DAO y CBA a enfatisa cu tur dato colecta durante e encuesta lo ser trata cu respet y anonimato. Pues e informacion recolecta no lo ser publica individualmente, sino den forma agrega. E resultado final lo yuda sector publico, priva y di enseñansa pa tuma decisionnan mas acerta riba base di evidencianan solido.

Por ultimo e instancianan a reitera cu participacion di cada hogar ta crucial pasobra sin cooperacion di e comunidad, nan no por haya un panorama completo di e situacion laboral actual riba e isla.

Contestando pregunta tocante dicon otro instancianan relaciona cu sector laboral, manera por ehempel Departamento di Labor (DPL) no ta inclui pa tambe coopera cu e encuesta, Lee-Perez a splica cu e informacion cu ta tin na DPL cu ta den practica, ta informacion cu tambe ta ser analisa y ta conoci pa DPS y ta ser inclui den e analisis total di e mercado laboral.

El a sigui splica cu e metodologia cu nan ta usa den e encuesta aki ta dirigi riba con ta midi tasa di desempleo y tasa di empleo riba mercado laboral.