Recientemente un publicacion di un video riba rednan social a bira viral pa motibo cu ta mustra con Baby Beach a transforma despues di e apertura di hotel Secrets. E publicacion, cual a ricibi mas di 400 reaccion y 200 comentario a habri un debate emocional bao di local y bishitantenan di hopi tempo tocante e futuro di e costa sur di Aruba.

E video ta mustra un lama yen di hende den luna di october, cual tradicionalmente ta ser considera parti di ‘low season’, y cu empleadonan di Secrets cantando y bailando cu musica cu volumen halto. Dentro di algun ora, centenares di comentario a drenta di hendenan cu a comparti nan tristesa, rabia y nostalgia pa loke un tempo tabata un di e luganan mas trankil y stima di Aruba.

E consenso entre tanto localnan como bishitantenan ripiti tabata cu Baby Beach, un luga cu pa hopi tempo tabata conoci pa su awa trankil, poco hundo y ambientenan pacifico, no ta sinti manera e mesun luga mas.

Hopi usuario cu a comenta riba e video a recorda e Baby Beach di decadas anterior, un luga conoci pa trankilidad, beyesa natural y interferencia humano minimo. Un bishitante di hopi tempo, marcando su di 15 aña riba e isla, a skirbi: “Nos tabata eynan siman pasa y e siman prome y no por a kere con druk Eagle Beach, Baby Beach y Arashi tabata. Pero specialmente Baby Beach, e no ta manera e tabata antes. Esaki tabata aña 15 pa nos. Mi ta sinti pa e localnan.”

Otronan a ripiti e mesun tristesa. “A bishita e playa ey hopi biaha…e tabata un playa bunita y trankil,” un usuario a bisa. “Mi tin añas sin bay, pero despues di a mira e video aki, mi no tin gana di regresa. Lo mi djis warda e recuerdonan di con e tabata antes.”

Hopi di e remarkenan a mustra riba yegada di hotelnan nobo na gran escala, particularmente e apertura di Secrets Baby Beach Aruba na Seroe Colorado, como e catalisador principal pa e cambio aki. Un cantidad di usuario a culpa e resort pa trece musica duro, multitud y un ambiente festivo na loke un tempo tabata un skina trankil di e isla.

“Ta hopi tristo pa e playa aki mustra asina!” un persona a indica. Un otro a agrega simplemente, “Omg… no danki. Lo mi corda e playa bunita bashi. Esaki ta horibel.”

Pa hopi, e transformacion di Baby Beach ta personal. E seccion di comentario di e publicacion a bira un espacio pa personanan comparti nan recuerdo y memoria di e pasado mas trankil di e beach.

“Mi ta asina tristo pa loke Baby Beach a bira. Mi tabata haya cangreu canto di beach na final di añanan 80. Tabata pacifico y ta un man yen di hende so por a bishita ora cu nan tabatin e cura di warda pa drenta Seroe Colorado. Ki berguensa, Aruba!,” un usuario a enfatisa.

Otronan a record’e como un luga di tradicion di famia. “Nos a siña nos yiu homber snorkel eynan 37 aña pasa. Tanto pisca bunita y apenas algun hende eynan. Asina decepcionante pa wak kico a pasa. Nos ta bay Aruba tur aña… Baby Beach ta kita for di nos lista awor,” un bishitante a expresa.

E sentimento di tristesa ey a ser comparti entre hopi otro usuario cu a comenta. “E ta hopi malo. Mi ta sinti mi asina malo pa e hendenan di Aruba y con nan mester sinti mirando esaki sucede riba nan isla,” un bishitante a skirbi. “Nan ta aruinando Aruba. Siguientemente nos lo no por ni disfruta di e parti panort di e isla.”

Economia di Aruba ta depende hopi di turismo, cu ta representa casi 80% di GDP y empleo. E desaroyo di resortnan nobo manera Secrets a ser promovi como un manera pa trece crecemento economico na San Nicolas, un parti cu pa hopi tempo tabata sombra pa e distrito di hotel canto di Palm Beach.

Pero pa hopi residente y huespednan di hopi tempo, e compromiso ta sinti mucho skerpi.“Nos a pasa eynan dos siman pasa pa wak e. Lamentablemente, e ta un dump,” un persona a skirbi. “Nos a bay snorkel eynan siete aña pasa y tabata great. Tristo pa mir’e asina,” otro a indica.

Otro usuario a agrega, “Realmente nan mester stop di construi riba Aruba. Nan ta dañ’e totalmente.”

Mientras cu comerciantenan den e area a celebra e revitalisacion aki, e reaccion riba medionan social ta revela preocupacion publico profundo cu Baby Beach—un di e puntonan di referencia natural mas iconico di e isla—por ta perdiendo su identidad pa motibo di sobredesaroyo.

Fuera di cambionan fisico, usuarionan a enfoca hopi riba zonido, particularmente musica duro cu tabata bini como resultado di actividadnan di e resort.

“Mi ta bay beach pa scucha e olanan, no musica di cualkier hende. Naturalesa ta e musica,” un usuario a skirbi. Otro a agrega, “Esey mester ta un actividad canto di pool, no riba e beach trankil cu nos gusta bishita pa relax!”

Bishitantenan cu tradicionalmente tabata bin Aruba pa su ambiente trankilo a expresa nan frustracion cu e trankilidad di e isla ta ser reemplasa pa un ambiente festivo.

“OMG mi lo ta rabia,” un usuario a bisa. “Mi ta bay cu vakantie pa relax y no mester ser bombardia cu zonido. Aruba tabata un isla pa vakantie trankil pa pareha y famianan. Esaki no tabata e isla di fiesta pisa, y mi ta desea cu nan lo a stop di convertie den uno.”

E seccion di comentario a bira mas cu un seccion di keho, e tabata un espacio pa tanto local y bishitantenan expresa nan emocionnan comparti. Hopi usuario a recorda e dianan cu Baby Beach tabata sinti intimo y casi secreto.

“Mi ta asina contento cu mi por a experiencia Baby Beach ora e tabata un secreto local. Semper lo mi cord’e asina,” un usuario a skirbi.

Un bishitante a corda nan luna di miel na 1987: “Mi ta corda tempo cu e tabata manera un joya scondi. E natural bridge tabat’ey ainda y Baby Beach tabata bashi. Nos a bin back algun biaha—e ta asina yen awor.”

Algun usuario a propone solucionnan en bes di desespera. Un a urgi negociacion cu operadornan di resort: “Deshaci di e musica fastioso cu ta toca na loke tabata un luga pacifico! Por negocia cu doñonan di Secrets? E cabananan semper a ser poni, pero e paz mester bolbe.”

Otronan a boga pa supervision di gobierno, argumentando cu e playanan di Aruba mester keda liber, trankil y accesibel pa tur hende. E discusion tambe a toca e miedo cu e mesun sobredesaroyo por plama na otro caminda: “Nos a haya otro playanan trankil, pero con hopi e lo dura prome cu nan ta ser aruina tambe,?” un bishitante di hopi tempo a señala.

E combersacion viral tocante Baby Beach ta resalta e dilema mas amplio cu Aruba ta enfrenta: con pa sostene su economia impulsa pa turismo sin pone un nubia riba e encanto mes di e isla cu ta hala hende aden.

Local y bishitantenan ta pidi pa balansa—pa desaroyo cu ta eleva comunidadnan manera San Nicolas sin silencia e zonido di e olanan.

“Ainda mi stima Aruba y su hendenan, pero mi ta sinti falta di e isla cu mi tabata conoce antes,” un usuario a indica.

Segun e debate riba Baby Beach ta sigui, e mensahe di bishitante y localnan ta cla: trece e paz back. Laga naturalesa ta e musica atrobe.