E yabi den e lucha contra adiccion y problemanan di salud mental ta den prevencion

Bon Dia Aruba tabatin e placer di por sinta cu Rubiella Toppenberg di FADA, ken a comparti un poco di e exito cu FADA su campaña mas recien a mira, e resultado y impacto positivo di esaki, y algun tips tocante kico nos como comunidad por haci pa yuda e trabao fundamental cu nos organisacionnan y fundacionnan ta haci.

Contando un poco di e trabao cu FADA tin varios aña caba ta haci, Rubiella a comparti cu “aki nos ta trahado preventivo. Bo por wak e mas manera un tipo di trahado social cu ta bay scolnan, diferente compania unda nos ta ser invita pa duna charla – semper nos ta bay nos ta papia tocante salud mental y adiccion, e dos topiconan aki. Durante e aña nos ta duna hopi charla y mi lo bisa cu unda nos ta bay mas ta scolnan tanto basico como secundario. Esey ta gran parti di nos trabao. Nos ta mas pafo di oficina dunando informacion na comunidad, nos muchanan y nos hobennan pero tambe tin e parti na oficina cu si un hende yega nan ta ricibi ayudo, foyeto, informacion, y si yega cu problema cu nos no por atende nos ta yuda nan yega na e ayudo.”

Banda di e ayudo y sosten na un nivel mas personal y individual, FADA tambe ta traha di un manera mas general unda ta yega na un cantidad mas grandi di persona. Sra Toppenberg a conta cu tambe ta organisa conferencianan y campañanan di conscientisacion y pa educa comunidad y tur esnan cu participa tocante e dos topico principal cu nan ta trata. “Un di nos campañanan mas grandi ta Red Ribbon Week, Siman di Bisti na Locura.”

Esaki ta un di e campañanan cu posiblemente mas nos ta tende di dje y cu mas participacion ta conta cune. E ta un siman den cual nos muchanan ta haya e oportunidad di siña mas tocante e topiconan importante aki di un manera creativo y accesibel pa tur edad. “Nos por bisa cu el a bay hopi bon, nos por a wak e participacion ta hopi grandi, e muchanan ta doe mee pero loke ta resalta ta e companianan cu tambe ta doe mee. Nos a cuminsa ripara cu nos a ricibi hopi potret, nan tag FADA y ta great pa wak con e adultonan tambe ta doe mee na e causa. Mi ta kere pa nos esey ta hopi importante.

Algo bunita cu a resalta e aña aki ta e hecho cu a pesar di tin un premio den medio, esaki no tabata aparenta di ta un prioridad o punto importante pa esnan participando. “Nos semper ta pone premio, pero nos a ripara cu tin hende no ta worry pa e premio, nan ta worry pa participa. Pa nos esey ta un ‘eye opener’ paso bo ta mira ‘hepa nan ta para pa e causa’. Nos a wak hopi participacion riba rednan social y a wak con leu e campaña ta yega. Nos ta satisfecho y contento cu esey.”

E hecho aki ta haci cu e proyeccion pa otro aña ta uno positivo, unda “ta mustra di ta un campaña exitoso” atrobe. “Nos a dicidi como team cu nos kier cambia e concepto un poco, cu mesun vision pero haci algo diferente pa comunidad no cansa.” Segun Rubiella a comparti, e plan ta di trece algun cambio chikito y mira den ki area e organisacion por duna mas na e campaña, “mi ta pensa cu haciendo esaki nos lo engrandece e campaña. Bo ta wak cu hopi mucha, bo ta puntra ‘pakico bo ta bisti awe?’ anto nan ta bisa pa droga, kiermen pa nos importante ta cu e mensahe ta yega y nan sa pakico nan a bisti y pa kico nan ta doe mee, ora bo puntra e muchanan, e satisfaccion t’ey cu nan sa pakico nan ta doe mee.”

E exito di e campaña e aña aki tabata aparente tambe den e aumento di personanan cu a tende di e fundacion. Despues di e campaña e organsiacion ta sinti un ‘snowball’ effect “pasobra bo ta wak cu tin scol cu nunca nos a wak ta doe mee cu awo si ta doe mee,compania tambe cu tiki tiki pa medio di rednan social nan ta cera conoci cu FADA. Bo ta mira docente tambe ta bisa ‘hepa mi no tabata sa cu FADA por bin duna charla por nada’. Bo ta wak cu e campaña cu nos ta haci durante aña ta pone cu hende ta cera conoci untiki mas cu FADA.”

Di otro banda, toch por mira mas acercamento cu comunidad y parti di esaki por ta a causa di e mentalidad o impresion cu e parti di ‘anti-droga’ den e nomber di FADA por duna. Manera a menciona anteriormente, tin 2 topico principal riba cual e organisacion ta traha, cual berdad ta adiccion pero tambe tin e parti di salud mental, y aki Rubiella a comenta cu den su opinion talbes “hopi hende no sa kico tur mas FADA ta haci” y pa medio di nan campañanan y presencia riba rednan social nan ta purba di informa comunidad cu e areanan den cual nan ta traha berdaderamente ta hopi mas amplio.

Mirando e posibilidad cu e parti cu ta enfoca riba adiccion o droga den e nomber di FADA pro ta un di e factornan cu ta duna un impresion un poco diferente na e realidad, Sra. Toppenberg a splica cu “tin un meeting cu e team pa cuminsa traha riba e ‘rebranding’ di FADA paso e nomber mester un cambio den dje. Esey ta unda nos ta bayendo, dus e posibilidad t’ey cu pronto nos lo ta anunciando cosnan nobo pa FADA. Mi sa cu un ‘rebranding’ pronto lo tuma luga unda cu e nomber por yega mas eyfo.” A pesar di e gran acogida di su campañanan y e hecho cu FADA ta un nomber relativamente conoci pa nos comunidad, nan ta keda “realistico cu nos mes cu tin biaha e nomber ta stroba cu hende ta yega of compronde precies kico e trabao ta. Dus e ta den pipleline cu ta bay haci e cambionan ey,” Rubiella a comparti.

E trabao cu FADA ta haci ta enfoca mas tanto riba e area di prevencion. Esaki ta causa cu e resultadonan no semper ta inmediatamente visibel, pero manera Sra. Toppenberg a splica, e generacion nobo si por mira y disfruta di e beneficionan di esaki. El a comenta cu “muchanan awendia ta hopi consciente. Y aña aki sigur nos ta haya diferente caso y bo ta mira muchanan ta bisa ‘mi kier bisa mi mama no huma mas’ of ‘mi kier bisa mi tata no bebe mas’. A pesar di biba bao hopi presion di rednan social bo ta mira cu e mensahe ta yegando hopi cerca nan, pa salud mental tambe nan ta hopi mas abierto pa papia tambe. Nan sa na momento cu nan haya FADA den nan klas nan sa kico tur adiccion por causa na nan salud mental.”

Pa loke ta trata e resto di e aña aki, Sra. Toppenberg a comparti cu tin varios campaña y evento na caminda, entre otro “tin tambe loke ta BAR, cual ta Bo Amigo Responsabel. Esey ta nos campaña di ‘Don’t Drink and Drive’.”

Specialmente den e temporadanan festivo y binidero unda no solamente tin celebracionnan di Pasco pero tambe nos carnaval, ta importa pa tin campañanan manera esaki andando pa mantene e comunidad consciente di e decisionnan cu lo tuma na momento di sinta tras di stuur. “Esaki ta un temporada unda nos focus ta enorme riba abuso di alcohol y maneha, mi ta kere cu esaki nos nunca ta scond’e. Nos tin un problema hopi serio cu abuso di alcohol na Aruba y mi no lo bisa cerca nos hoben so cerca, adultonan tambe. Dus nos problema ta enorme, ta proba cu 1/3 deel di nos accidentnan ta pa via di ‘drunk drivers’. Lamentabel pa motibo cu e ta prevenibel, e ta un decision cu abo como persona adulto ta tuma pa pone bo bida y di otro hende den risico. Nos tin video grandi na caminda y campaña di bar ta sigui resto di aña y habri carnaval.”

Prevencion ta un parti sumamente importante di e trabao cu ta haci den e area di adiccion pero tambe den salud mental, y hopi biaha te hasta den varios area di nos bida. FADA ta un organisacion cu tin experto y profesionalnan dedica na e topiconan aki cu por ta dificil pa lidia cune ora nan presenta si nos no ta ekipa cu e hermentnan adecua. “Ami semper ta bisa prevencion ta e yabi. Na momento cu nos ta papia, nos ta habri caminda y oportunidad pa cambio mi ta kere porta si bo ta un famia di 4 of 5 y un hende a atende un charla of ricibi informacion, e importante ta, semper nos ta duna na final di nos charla como tips pa sigui comparti e informacion.”

“Vooral cerca nos adultonan pasobra educacion ta cuminsa na cas. E cambio mester cuminsa na nos como adulto como mayor cu ta bisa ‘ami kier duna mi yiu e informacion aki’. Nos so por haci e cambio door di papia cu otro.”