(NLTimes) – E caso contra cinco homber cu a secuestra e mucha muhe di Amsterdam Insiya nuebe aña pasa lo no ser trata di nobo, Corte Supremo a dicta diamars. E sentencianan imponi ta keda sosteni y final, e corte mas halto a bisa, siguiendo e recomendacion di e Abogado General na juli.

Dia 29 di september 2016, varios homber a secuestra e mucha muhe di tempo ey dos aña for di cas di su wela na Amsterdam. Su tata, Shehzad Hemani, e sospechoso principal, a contrata un team internacional pa e secuestro y a hib’e India. Ta kere cu e mucha muhe di awor 11 aña di edad ta eynan ainda. Su mama, Nadia Rashid, no tin contacto cune pa nuebe aña caba.

Ministerio Publico (OM) a yama e secuestro aki un operacion completamente plania. Cortenan anterior a condena seis secuestrador na te cu cuater aña di prizon. Un di nan ta Hemani su primo, Imran S., kende ta na India. Hemani a ser sentencia na 8,5 aña di prizon den apelacion na mei 2024. E tambe ta na India. A pesar di peticionnan ripiti di OM, India ta nenga di extradita nan.

Hemani a presenta un peticion di casacion na Corte Supremo, argumentando cu e no a ricibi un huicio husto. Debi na e orden di detencion contra di dje, el a scoge pa no asisti na su huicio personalmente y kier a participa via un link di video. Corte di Apelacion a rechasa e peticion ey. Segun Corte Supremo, Corte di Apelacion tabatin permiso pa tuma e decision aki, y esey no tabata motibo pa bolbe trata e caso.

Durante e ultimo nuebe añanan, Nadia Rashid a haci tur loke tabata na su alcance pa haya su yiu muhe back. El a tuma accion legal na Hulanda y India, a tuma contacto cu ministernan di ambos pais, a pidi Reina Maxima pa interveni, a haci un apelacion na instancianan internacional, y a post un cantidad di video mundialmente cu e speransa cu un lo yega na Insiya.

Rashid a asisti na e veredicto di Corte Supremo. El a bisa RTL Nieuws cu e decision aki “ta confirma loke mi tabata sa pa nuebe aña: cu e perpetradornan mester ser castiga y cu awor nos por simplemente yama nan perpetrador.” A pesar di nuebe aña di corte consecutivo confirmando nan sentencia, ainda e no a logra reuni cu su yiu muhe. “E perpetradornan awor a ser treci dilanti di husticia, pero esaki no ta trece Insiya back,” el a bisa.