Mañan 7 di november Corte di Prome Instancia lo trata e prome audiencia di e caso cu ta carga e nomber ‘Caret” den cual dos agente policial ta sospechoso di complicidad di homicidio pa e morto di Lanoy. E tiroteo fatal di polis riba Ayden Lanoy di 19 aña mainta trempan dia 9 di februari 2025 na Madiki, a manda un ola di shock den comunidad y lanta protesta, debate politico, y un investigacion criminal.
Dia 9 di februari Lanoy a ser para pa polis despues cu oficialnan a nota un defecto cu un luz patras. Ora el a huy, un persecucion na velocidad halto a sigui. E persecucion a termina ora cu Lanoy a bira un caminda sin salida na altura di un parke na Madiki Kavel. Algun rato despues, oficialnan di polis a los un serie di tiro riba su vehiculo, cu e resultado cu un di e tironan aki a alcansa Lanoy y el a fayece na e sitio.
Testigonan den e area a describi consistentemente un rafaga extremo di tiroteo—hopi mas cu un dozijn di bala den solamente algun seconde—aunke e cantidad precies na e momento ey no tabata sigur.
E noticia di e morto di e hoben a sacudi comunidad completo. Famia y amistadnan di e victima a organisa un protesta pasivo cu a termina cu e grupo di ciudadanonan reuni pafo di Parlamento di Aruba pa exigi contesta y responsabilidad y pidiendo Parlamento pa sostene reformanan manera e adopcion di bodycams y dashcams pa KPA.
Organisadonan di e protesta a entrega un manifiesto formal riba e medidanan ey na e Presidente di Parlamento e tempo ey, actual minister, Gerlien Croes, subrayando con e incidente lamentable aki a subraya preocupacionnan di hopi tempo tocante uso di forsa y transparencia publico.
Manifestacionnan no tabata limita na Aruba so. E caso a resona fuertemente bou di e diaspora na Hulanda entre familiar, amigo y sostenedornan, y a tene vigilia den memoria di e hoben Rubiano, conectando nan yamadonan pa husticia cu combersacionnan mas amplio tocante polis den henter Caribe Hulandes y Reino.
Na april Ministerio Publico (OM) a informa cu lo persigui e dos agentenan policial envolvi den e morto di e hoben Lanoy. Despues OM a confirma e acusacion formal, tumando nota di e nomber di codigo di e caso— “Caret” — y specificando e ofensa como “complicidad di homicidio imboluntario” (“medeplegen van doodslag”). E audiencia di mañan 7 di november 2025 lo marca e inicio di e fase di corte.
Segun cu e proceso legal a sigui, OM a confirma mey augustus cu e interogacion di e dos agente policial envolvi den e tiroteo y investigacion di e caso “Caret” a yega su fase final. Segun OM a informa, e dos agentenan policial envolvi a bolbe ser scucha como sospechoso y despues di e interogacionnan aki, e ultimo actividadnan di investigacion lo tuma lugar y asina e investigacion lo yega su fin.
Durante e prome audiencia di caso Caret—e asina yama “reggiezitting”—hues lo tuma decision tocante e pregunta si tin necesidad pa haci investigacion adicional. E caso no lo ser trata den su contenido riba e dia aki. Ademas hues lo pone un kalender pa audiencianan cu por lo por extende te otro aña.
Pa aworaki, un comunidad ta sigui yora pa un hoben cu su bida a toca famianan y cu, segun hopi cuenta, tabata traha duro y mira pa dilanti como un tata nobo. E caso aki no ta djis un dossier di investigacion mas; el a bira un catalisador pa scrutinio civico y un prueba di e institutonan di e isla. Segun cu Aruba ta en espera pa e inicio di e proceso den corte, familiarnan y e isla completo ta spera cu finalmente por haya contesta riba e pregunta tocante kico a conduci na e suceso lamentabel aki cu a cobra bida di e tata hoben.
Implementacion di Bodycams KPA
Fin di juni a bira conoci cu finalmente Cuerpo Policial di Aruba (KPA) lo implementa e proyecto piloto di bodycams. Mediante un comunicado KPA a informa cu nan a “scucha e comunidad” y cu hunto cu avancenan tecnologico e organisacion tabata den pleno desaroyo pa ehecuta proyectonan nobo cu ta encera cambionan grandi tanto pa Cuerpo Policial Aruba y comunidad.
KPA a ratifica cu e proyecto aki ta uno piloto den cual polis uniforma lo cuminsa usa e bodycams y por usa e bodycams na cualkier momento den nan ehecucion di nan trabou. E agentenan policial a haya tambe presentacion di e procedura con pa atende cu e bodycams.
Pa loke ta e maneho di imagennan di bodycams KPA, a enfatisa cu tin regla y procedura na luga conhuntamente cu Ministerio Publico. No por divulga of mira imagen sin cu tin autorisacion pa esaki y esaki ta conta tambe pa Cuerpo Policial di Aruba pa asina brinda e transparencia y seguridad.
