3D printing tambe conoci como “additive manufacturing”, ta un forma relativamente nobo pa produci obhetonan cu awendia ta sumamente avansa den ambos forma y di e material cu ta wordo usa den e produccion. For di literalmente un cas, pa partinan di un motor di avion, 3D printing como tecnologia a yega un punto unda su utilidad practico ta birando mas y mas obvio. Den e columna aki nos lo ta toca e tema di 3D Printing y Circular Economy, y con esaki por ta interesante pa un isla manera Aruba.

3D Printing

Basicamente Imprenta 3D por crea obhetonan fisico for di un representacion door di adicion sucesivo di material. E ta ‘aditivo’ den e sentido cu e no ta rekeri un bloki di material of un molde pa fabrica obhetonan fisico, e ta simplemente pone riba otro y fusiona capanan di material. Un par di lector lo ta conoci cu e tecnologia aki den sentido practico como hobby, unda tin un 3D printer na cas y ta print varios obhetonan pa b.v. decora cas of di souvenir.

Pero cu avancenan tecnologico di añanan recien, e tecnologia di 3D printing a yega un punto unda e capacidadnan ta birando mas y mas impresionante y practico. Por ehempel, un poco tempo pasa a usa un 3D printer industrial pa literalmente print full un boto, yama “3Dirigo”. Tambe por usa 3D printing na nivel industrial awendia pa traha partinan metalico pa por ehempel auto y te hasta parti di un motor di avion.

Tambe cu avancenan den ramonan manera Material Science, nos por spera cu pronto por te hasta usa materialnan full nobo y exotico, manera e “Aluminium Alloy” nobo, net anuncia di Massachusetts Institute of Technology. E alloy di aluminium aki, ta pesa hopi menos cu Aluminium regular, pero ta na mesun momento hopi mas fuerte. Ingenieronan di MIT a designa e version aki di aluminium, specialmente pa e ramo di 3D printing. Den futuro cercano tambe nos por spera, cu por ehempel por te hasta print, panelnan solar ultra-barata, piezanan pa ingreepnan medico manera un implante, y hopi mas.

Economia circular

Esaki ta trece nos na e siguiente tema, esta di Economia Circular. Aruba como isla chikito ta sumamente dependiente di importacion pa casi tur cos cu ta wordo usa na isla. Esaki ta haci cu Aruba ta extremadamente vulnerabel den perspectiva di cadena di suministro. Awo e concepto di Economia Circular, ta pa diseña, produci localmente y te hasta recycle localmente diferente producto pa asina tin hopi menos desperdicio y tambe necesidad di importacion externo.

En combinacion cu tecnologianan nobo manera 3D printing, nos por envisiona cu te hasta por cuminsa produci varios tipo di obhecionnan na Aruba mes, porta te hasta di material recicla. Den tur esaki e materialnan nobo cu por wordo produci na Aruba, por diseña esaki for di dia 1, pa cumpli completamente cu tur e rekisitonan di un Economia Circular, pa asina reduci desperdicio y importacion mas hopi posibel.

En conclusion, 3D Printing a yega un punto unda e no ta solamente pa hobbista mas, pero tambe tin hopi posibilidad sumamente interesante, for di ramo di produccion di diferente piezanan di motor, pa full un boto, y te hasta pa ingreepnan medico. Nos ta experimentando un revolucion den nos capacidadnan pa produci diferente producto den setting local. Asina nos por yuda reduci nos dependencia di importacion riba plaso largo strategico.