Durante un conferencia di prensa ayera mainta, Minister di Salubridad, Asunto Social, Cuido di Adulto Mayor y Maneho di Adiccion, Mervin Wyatt-Ras (AVP), hunto cu Minister di Enseñansa, Deporte, Relacionnan den Reino, Innovacion y Hubentud, Gerlien Croes (Futuro); Directora di Directie Ouderenzaken, Desiree Helder y Directora di Colegio EPI, Ankie Danker, a firma un acuerdo pa inicia cu un trayecto di formacion nobo dirigi pa eleva nivel di cuido di adulto mayor.

E trayecto di formacion nobo aki dirigi na tur persona cu ta traha, of kier traha, den e sector di cuido general, y tambe cuido di adultonan mayor. E programa nobo ta busca profesionalisa e veld, amplia e conocemento di dunadornan di cuido, y garantisa un calidad di cuido cu ta cumpli cu standard moderno y cu ta bon pa futuro di Aruba.

Minister Mervin Wyatt-Ras a enfatisa cu e iniciativa nobo ta sali di un meta cla: aumenta e calidad di cuido riba un manera profesional y humano. Segun e mandatario, “e generacion cu a traha duro pa forma e pais y sostene su desaroyo merece un cuido cu ta refleha respet, dignidad, y atencion special.”

Minister Wyatt-Ras a bisa cu hopi di e dunadornan di cuido y trahadonan den e area di cuido ta duna servicio cu un gran dedicacion, pero cu e pais tin e obligacion pa crea un sistema formal di preparacion profesional pa hendenan cu ta asumi esaki.

“E ta un stap den e direccion pa profesionalisa y capacita mas persona, y mas persona tin cu ta capacita, mas e ora tambe e cuido lo mehora. Tambe e personanan di edad mas halto por ta garantisa di e profesionalismo y un bon calidad di cuido y tambe bon calidad di bida. E ora nos por yega tambe na un comunidad cu tin conocemento y cu tur esaki ta ser aplica tambe na un comunidad mas humano pa asina nos por duna e cuido y e servicio tambe na e ciudadanonan di edad halto,” el a remarca.

El a indica cu Directie Ouderenzaken a traha un set di criterio di calidad pa e centronan di cuido, y e formacion nobo lo yuda e trahadornan pa cumpli cu nan. Esaki ta sigura cu cada centro por opera den un forma mas transparente, mas sigur, y mas profesional.

Minister Wyatt-Ras a splica cu un parti esencial pa profesionalnan den cuido pa adulto mayor ta e habilidad pa identifica situacionnan medico, cambio di comportamento, of riesgo potencial den un estado tempran. Segun e mandatario, e formacion lo duna e hermentnan cu trahadornan mester pa por evalua, reporta y duna cuido adecua riba un nivel mas avansa.

“Na momento cu un persona di edad halto drenta den un centro di cuido y cu e por ser diagnostica si tin cosnan cu ta bayendo un cierto forma, por señala y tambe garantisa e seguridad pa e personanan aki y cuido, y cu esakinan ta sucede na un forma transparente y cu integridad y haci posibel cu e cuido y e ayudo na nos grandinan ta sucede na un manera profesional,” el a señala.

El a indica cu e programa lo ser evalua y amplia segun e experiencia y e necesidadnan di comunidad, cu e gobierno lo contempla como un proceso continuo di mehoracion.

Minister Gerlien Croes a enfatisa cu e trayecto nobo ta un formato di enseñansa pa bida largo (‘lifelong learning’). E mandatario a indica cu Aruba no sa solamente ta inverti den structuranan fisico, pero mas importante ainda, den hende mes: conocemento, capacidad, y oportunidad pa sigui crece.

“Esaki ta un ehempel di hopi. Esaki mester incentiva nos y inspira nos pa keda crea mas oportunidad. No ta importa ki edad bo tin, cuanto aña bo ta trahando, pero importante ta pa sigui inverti den conocemento y crecemento profesional,” el a enfatisa.

Croes a ratifica cu e iniciativa aki ta mustra cu e gobierno ta cumpli cu su promesa: amplia oportunidad pa pueblo, profesionalisa sectornan vital, y crea un sistema unda formacion ta base pa progreso di un pais.

Segun e mandatario, hopi biaha sa papia di salario y beneficionan, pero el a subraya cu no por lubida cu e base di desaroyo ta conocemento. El a remarca cu inverti den formacion ta inverti den un futuro mas fuerte y mas stabiel pa Aruba.

Tanto minister Wyatt-Ras como minister Croes a enfatisa cu un comunidad feliz y saludable ta basa riba oportunidadnan. Sin conocemento, sin acceso na formacion y sin plataforma pa desaroyo personal y profesional, un pais no por avansa.

Minister Croes a menciona cu den e ultimo lunanan Aruba a mira hopi desaroyo y cu e intencion pa siguiente añanan ta aun mas ambicioso. E sector di cuido, particularmente cuido di adulto mayor, ta keda un prioridad pa gobierno.

Di su banda directora di Directie Ouderenzaken, Desiree Helder, a declara cu e trayecto nobo ta habri porta pa tur hende cu ta desea amplia nan experiencia of drenta den e campo di cuido.

“Esaki ta un trayecto nobo pa tur esnan cu ta interes di amplia nan experticio den cuido y den cuido di adulto mayor. Esaki ta un trayecto hopi importante pasobra e no ta solamente pa adulto mayor, pero pa comunidad den general pa duna e oportunidad pa tin mas conocemento pa duna cuido apropia pa esnan cu mester di e cuido,” Helder a splica.

Segun el a indica, esaki ta solamente e prome fase di un programa hopi mas amplio cu lo inclui otro area den cuido den futuro.

Directora di Colegio EPI, Ankie Danker, a splica cu e programa nobo lo duna certificacion oficial reconoci den Reino Hulandes. Esey por habri porta pa otro diploma y mas formacion avansa, algo cu Danker ta considera vital pa un pais chikito cu necesidad di profesionalisa su labor na nivel internacional.

El a enfatisa cu e sector comercial tabata indica cu tin un gran necesidad pa formacion di tipo aki, y gobierno hunto cu u Directie Ouderenzaken y EPI a scucha esaki y a tuma accion.

Segun Danker, sector di cuido ta solamente un di hopi otro campo unda formacion similar lo por drenta, y esaki ta apenas un comienso.

Minister Wyatt-Ras a subraya cu ta existi hopi otro proyecto den tapara, particularmente pa yuda “mantelzorgers” — miembro di famia cu ta tene cuido di adulto mayor den su propio hogar. Gobierno ta mira importancia den mantene grandinan den e lugar unda nan ta sinti nan mas feliz y comodo, nan cas, pa mas tempo posibel.

Na mesun momento el a agrega cu si tin di nan cu mester bay den casnan di cuido, esey mester traha na un forma integral.

E punto central treci dilanti ta cu Aruba ta na un momento di gran transformacion, y e proyecto aki ta un stap pa un futuro mas humano, mas profesional y mas prepara.

Profesionalisacion cuido di adulto mayor no ta solamente un asunto social, e ta un asunto humano y strategico. Un generacion cu a consagra nan bida pa desaroyo di un pais merece esey, y un generacion nobo di dunador di cuido por drenta den un profesion cu dignidad, standard y balor real pa comunidad.