Durante un conferencia di prensa ayera tardi Minister di Turismo, Labor y Transporte Wendrick Cicilia a duna un actualisacion amplio tocante e acuerdo di cooperacion entre Aruba Airport Authority N.V. (AAA) y Royal Schiphol Group (RSG), y a toca e tema di e salario di e CEO nobo di AAA N.V.

Segun e mandatario, e acuerdo nobo, cu ta den su fase final, ta un paso fundamental pa reestablece stabilidad na aeropuerto nacional y pa garantisa continuidad di e proyecto di expansion Gateway 2030.

Minister Cicilia a remarca cu tabata necesario pa duna claridad den un momento cu tabatin hopi speculacion y informacion den comunidad. El a enfatisa cu transparencia ta esencial pa splica loke a pasa den e ultimo aña, loke tabata e proceso di negociacion, y kico lo ta beneficio pa Aruba di e cooperacion cu RSG.

El a splica cu ora Gabinete AVP-FUTURO a tuma cargo dia 28 di maart, nan a haya un lista di tema urgente cu tabatin mester di atencion inmediato. Den e lista ey, situacion di AAA y su relacion cu RSG tabata un di e mas alarmante. Segun gobierno, nan a hereda un relacion cu tabata completamente deteriora bou di liderazgo anterior di ex-minister Dangui Oduber. E situacion a bira tanto tenso cu RSG a comunica den un carta di 7 di januari 2025 cu no tabatin intencion pa sigui cu e acuerdo di cooperacion despues di juli.

Minister Cicilia a indica cu e anuncio aki a crea incertidumbre serio entre e lenders (esnan cu ta financia un proyecto) di Gateway 2030. El a subraya cu e confiansa di e lenders, cu a presta mas o menos 500 miyon florin pa expande e aeropuerto, ta basa parcialmente riba un relacion solido entre AAA, gobierno y RSG.

Gateway 2030, un di e inversionnan di infrastructura mas grandi den historia di Aruba, tabata enfrenta retraso di mas cu 7 aña pa motibo di problema den maneho, falta di liderazgo y falta di solucion pa desafionan tecnico. Memey di tur esaki, e posibilidad cu RSG lo retira a pone presion adicional riba AAA y riba e futuro di e proyecto.

Minister Cicilia a remarca cu ausencia di un partner strategico manera RSG tabata pone den riesgo no solamente e ehecucion di Gateway 2030, pero tambe stabilidad financiero pa contesta e obligacionnan contractual di AAA.

Pa motibo ey, Gabinete AVP-FUTURO a actua inmediatamente y a sinta na mesa cu RSG, a reestablece dialogo y a logra firma un Memorandum of Understanding cu ta subraya intencion di Aruba, AAA y RSG pa fortalece e colaboracion strategico.

Minister Cicilia indica cu e acuerdo final cu RSG ta den su fase final y ta ser considera un alivio crucial pa tur e lenders preocupa cu continuidad di Gateway 2030. Segun el a indica, ta calcula cu e proyecto lo finalisa den aproximadamente 3,5 pa 4 aña.

E mandatario a splica cu durante e negociacion, tanto Aruba como RSG a pone condicionnan riba mesa. Un di e puntonan mas importante pa gobierno ta cu AAA su personal local mester sigui progresa. E acuerdo nobo ta inclui compromiso pa sigui inverti den formacion y ascenso di profesionalnan local, tanto den rolnan di liderazgo localmente como den oportunidad internacional.

El a indica cu e modelo di colaboracion cu RSG ta existi for di 2004 y tabata un cooperacion exitoso segun diferente gobierno anterior, pero cu solamente durante e ultimo periodo di liderazgo, a surgi e tension cu a pone relacion den peliger.

Minister Cicilia a splica cu ademas gobierno a evalua un rapport independiente cu tabata analisa obhetivamente e rol di RSG na Aruba, y e hayazgonan tabata positivo. El a enfatisa cu e beneficionan ta inclui acceso na conocemento tecnico avansa, guia den proyectonan compleho, refuerso di reputacion internacional y oportunidad pa desaroyo di talento local.

Un di e temanan di discusion fuerte ta e salario di e CEO nobo y e excepcion den e Wever-Croes Norm (e ley di LNT). Den e acuerdo nobo, segun e mandatario, e CEO lo gana menos cu e CEOnan anterior. El a indica cu e suma ta un pakete anual y no un pago mensual fiho, y tur descuento segun ley ta ser aplica.

E tema ta bira complica pa motibo di Wever-Croes Norm, un ley cu ta limita salario di ehecutivonan den entidadnan publico. Hopi organisacion local ta considera e ley aki como restrictivo y no realista. Gobierno actual a indica cu ta di acuerdo cu e preocupacion aki y ta desea di revisa e legislacion. Pero den pasado, tempo e tabata minister di partido Raiz, Minister di Finanzas, Asuntonan Economico y Sector Primario, Geoffrey Wever, a vota na fabor di e ley aki,y awor e mes ta haci excepcion pa acomoda e salario pa e CEO nobo di AAA N.V.

Dia 6 di november 2025 minister Wever a firma un Landsbesluit cu ta autorisa un salario anual di Afl. 1.089.396, cu ta ekivalente na Afl. 90.780 pa luna, sin kita e obligacionnan cu mester cumpli cune segun ley. E cifra aki ta na mesun nivel cu e salario cu e CEO di Schiphol na Hulanda tabata gana na 2024, cu ta rond di Afl. 1.001.449 (rond di €480.00). E punto aki ta uno cu a provoca hopi reaccion, pa motibo cu un ehecutivo na Aruba lo gana casi igual cu e CEO na Hulanda.

Mas ainda teniendo na cuenta e diferencia di tamaño di e aeropuertonan. Schiphol aña pasa tabatin un trafico di mas di 60 miyon pasahero, mientras cu aeropuerto na Aruba a mira un trafico di pasahero di entre 1,4 y 1,5 miyon.

Por ultimo minister Cicilia a splica cu como accionista mayoritario, Gobierno di Aruba ta mantene dialogo pa nombra un director statutario local den AAA N.V. pa traha banda cu CEO cu RSG lo provee. El a indica cu ta spera cu e proceso aki ta avansa den luna y aña cu ta bin, pa fortalece ainda mas direccion local den e entidad.