Casi seis aña despues cu investigacion Flamingo a converti den un di e procesonan mas prolonga y polemico den historia politico-hudicial di Aruba, ex-minister y ex-parlamentario Otmar Oduber a tene un rueda di prensa ayera mainta pa trata e desaroyo mas reciente pa loke ta trata caso Flamingo: un regiezitting cu lo tuma luga dialuna, 24 di november.

E sesion aki, cu ta sirbi como un paso preparatorio den apelacion, por determina si tin investigacion adicional mester tuma luga, of si finalmente e caso lo move pa su fase definitivo despues di hopi aña di tension, investigacion y acusacionnan cu, segun Oduber, tabata hopi grandi den number pero hopi chikito den prueba.

Oduber a inicia su conferencia di prensa indicando cu durante casi un aña despues di veredicto di januari 2024 el a keda den silencio pa loke ta trata caso Flamingo, pero cu reactivacion di e caso lo obliga su persona pa bin dilanti y duna su declaracion.

Segun Oduber, e veredicto cu hues a dicta na januari tabata un señal cla cu mayoria di acusacionnan cu tabata poni riba mesa no por a ser comproba. El a remarca cu e ponencia di Ministerio Publico (OM) a ser bari for di mesa indicando cu parti mas grandi di e acusacionnan no tabata sosteni ni den documentacion ni durante tratamento den corte.

El a menciona cu tres dia despues, corte a yega cu un herstelvonnis, un tipo di coreccion caminda cu e hues a cambia su veredicto y a haci posibel cu e por continua como miembro di Parlamento y sigui tene un rol politico den pais. Pero asina, el a señala, Ministerio Publico a bay den apelacion, algo cu Oduber ta mira como un actitud no di busca husticia, pero di busca pa prolonga un tormento politico y personal.

Oduber a subraya cu su decision pa sali for di Parlamento dia 6 di october tabata boluntario pa asina e por atende cu e caso aki, cu el a indica ta un abuso di poder di OM cu ya tin casi seis aña persiguiendo e.

“Mi ta haya cu ta momento cu e abusonan di poder cu ta tuma luga den e aparato di OM ta ser divulga, ta ser publica y ta ser condena. Nos tur y mi persona semper a para pa ley. Mi persona ta kere den nos sistema hudicial y ta p’esey mi persona a tuma e decision, pa sali for di Parlamento, atende cu e caso aki y cu poder di Dios nos lo t’ey back pa sigui representa nos pueblo una bes cu e caso termina,” el a enfatisa.

Manera ta conoci e investigacion Flamingo a cuminsa na momento cu den luna di juni aña 2020, autoridadnan a yega na su cas cu dos container cla pa carga material. E tabata un operacion sin precedente y su bida personal y familiar a ser somete na scrutino. A busca den su cas, den cas caminda e tabata keda, y den cas di su mayornan, cual tabata un shock completo no solamente pa Oduber, pero pa su famia completo.

Inicialmente, Ministerio Publico a presenta ocho acusacion pisa den su contra, cu ta inclui labamento di placa, duna tereno ilegalmente, soborno, enrikecemento ilegal y acusacion cu e tabatin miyones di dollar den cuentanan di banco den paisnan stranhero; supuestamente tres miyon dollar den Merca y cinco miyon den Panama, cual tabata parti di e dossier. Oduber awe a recorda esaki mencionando cu despues di mas cu cinco aña, niun di e acusacionnan aki a yega dilanti hues manera acusacion formal.

El a agrega cu e dossier original tabatin casi 5.000 pagina y mas cu 220 punto di acusacion, pero cu corte finalmente a trata solamente 15, y di esakinan entre 85% te 90% di tur a ser kita for di mesa.

Durante e conferencia di prensa Oduber tambe a trece dilanti e impacto humano cu e investigacion di caso Flamingo a causa. Entre e 17 sospechoso inicial tabatin cinco ambtenaar cu a pasa cuater aña suspendi, sin traha, pero cobrando salario completo. Na final di investigacion, ningun di nan a presenta dilanti hues y a haya un carta for di OM bisando cu nan ta liber di sospecho y cu nan por bolbe traha.

Den sector priva, el a menciona, algun sospechoso a perde trabou, credibilidad y oportunidadnan laboral importante, sin cu existi un sentencia contra nan. Pa Oduber, esaki ta un señal alarmante cu ta mustra cu investigacion por converti mas den un instrumento di destruccion cu den un instrumento di husticia.

Oduber a expresa su frustracion pa e manera con OM a dirigi e investigacion, comparando con e fiscalnan Hulandes ta bin Aruba y ta haci loke nan no por haci na Hulanda.

“E forma di proceder di OM ta simplemente un abuso, un simberguensura cu ta tuma luga aki na Aruba, loke hamas y nunca e Hulandes Europeonan aki cu a bin Aruba por haci na Hulanda. Nos ta un pais cu no tin cu tolera pa na ningun nivel, y tampoco na e nivel di husticia, abuso ta ser cometi di e forma cu ta ser cometi. No pa e Arubiano cu ta den Landsrecherche sinta, si no pa e Hulandesnan cu ta ser manda cu un meta, pa haci na Aruba cu politiconan loke nan no por haci hamas y nunca na Den Haag,” el a enfatisa.

Pa loke ta trata e audiencia preliminar (regiezitting) di dialuna, el a splica cu durante e sesion lo evalua si tin investigacion adicional mester tuma luga. El a sigui splica cu pa loke ta trata hoge beroep, como partidonan, normalmente ta bay hoge beroep ta pasobra mester informacion of tin algo nobo. El a menciona cu den e caso aki Ministerio Publico a bay hoge beroep, y un luna pasa mester a entrega adicionele onderzoekwensen (deseonan pa investigacion adicional), pero OM no a entrega ningun peticion.

Oduber a indica cu dialuna ora drenta corte mirando cu OM no a entrega ningun peticion, aunke el a indica cu despues di e conferencia di prensa talbes si nan ta entrega algo, e no ta kere e caso lo mester pasa pa januari y ta spera cu finalmente por pone un fin na henter e travesia aki.

El recorda cu den e ultimo sentencia na januari hues a cera su veredicto bisando cu na bentaha di Oduber—mirando e duracion largo, e publicidad enorme cu a ser poni riba e caso, y pa motibo cu Ministerio Publico a indica inicialmente cu tin asina un caso grandi, pero finalmente a trece un caso zwak dilanti, y na banda di esaki no a comproba cu Oduber a haya ganashi financiero—a bari un gran cantidad di acusacionnan for di mesa.

Oduber su speransa pa dialuna awor ta pa por splica y expresa na hues con e caso aki realmente a afecta su bida personal y familiar. “Mi ta bay splica huesnan dialuna cu por fabor cinco aña y mey, casi seis aña, tabata suficiente,” el a enfatisa.

Pa hopi Arubiano, caso Flamingo ta un simbolo di lucha entre poder politico, husticia y e manera cu paisnan chikito den Reino ta ser trata. Pa Otmar Oduber, e lucha aki ta personal, politico y institucional y en realidad ta desea cu por fin tin claridad.