Segun Parlamentario Xiomara Maduro (MEP), ministernan di FUTURO kier convence Pueblo cu e Rijkswet HOFA tin hopi beneficio pa Aruba. Poco dia atras Minister Gerlien a traha un compilacion di e beneficionan. Nos a repasa e informacion y pone acerca nos argumentonan pa mustra Pueblo pakico Rijkswet HOFA no tin beneficio pa Pueblo di Aruba.

Interes no ta conoci

Maduro ta nota cu segun minister Gerlien Croes: Interes ta baha di 6,9% pa 3,x?

Realidad: Ora pone 3,x? Esey kiermen cu no ta sigur ainda ki porcentahe ta duna Aruba. Ademas e ta keda cuestionabel cu Hulanda ta cobra Aruba 6,9% pa un fiansa pa yuda Aruba den pandemia basa riba e obligacion pa yuda otro den Reino segun articulo 36 di Statuut.

No tin nada concreto riba debe cu ta refinancia

Gerlien Croes: Hulanda ta refinancia un parti di debe externo di Aruba.

Realidad: no tin nada concreto, cual debe, na ki interes, cual otro condicion (politico) tin y den ki forma mester paga Hulanda bek. Tur e detayenan ey ta importante pa sa si di berdad refinancia debe via Hulanda lo beneficia Aruba.

Forma di paga Hulanda ta absorbe tur “rentevoordeel”

Gerlien Croes: Pa aña e interes cu lo scapa ta 50 miyon florin.

Realidad: E manera cu Hulanda a scoge pa wordo paga back, interes y principal, ta kita tur e espacio financiero cu por surti di un rebaho di interes. Hulanda ta djis sigura pa haya su pago mas lihe.

Un exitbepaling amplio lo tene supervision financiero di CAFT pa largo tempo

Gerlien Croes: Supervision financiero di CAFT ta stop di existi, si pa un tempo Aruba keda cumpli cu tur exigencia. Na su luga Aruba ta haya su mesun Begrotingskamer pa haci control financiero.

Realidad: E exitbepaling tin 20 condicion pa sali for di e Rijkswet HOFA y como cu cada un ta un proceso riba nan mes, por lo pronto supervision financiero lo sigui pa hopi aña mas bou CAFT.

Si Aruba no tin e ultimo palabra, no tin beneficio pa Aruba

Gerlien Croes: Rijkswet HOFA ta mas flexibel, pasobra Aruba por tin su mesun Begrotingskamer, un exitbepaling cu norma duidelijk y overlegmodel cu ta duna Aruba mas zeggenschap.

Realidad: Den artikel 38 di Rijkswet HOFA, Hulanda ta haya e ultimo palabra riba asuntonan financiero di Aruba.

Si Aruba como Pais no tin e ultimo palabra, si Hulanda tin ultimo palabra, Aruba no tin ningun beneficio. Ta Hulanda ta dicidi si e Begrotingskamer su trabou ta suficiente bon. Ta Hulanda ta dicidi si Aruba por sali di e Rijkswet HOFA. E exitbepaling tin 20 punto cu no tur ta duidelijk y ta Hulanda ta dicidi su interpretacion. Riba e maneho presupuestario, maneho financiero y supervision financiero incluso sancion, ta Hulanda tin e ultimo palabra y no Aruba. Pues pa tur supuesto beneficio ta Hulanda tin e ultimo palabra.

Unico beneficio: Hulanda ta haya su pago mas lihe

E ta nos responsabilidad pa informa Pueblo na un manera transparente, responsabel y husto cu e Rijkswet HOFA aki simplemente no tin beneficio pa Aruba, ya cu Hulanda tin e ultimo palabra y no e Pueblo di Aruba. E unico beneficio ta cu Hulanda ta haya su pago mas lihe.

Nota di redaccion: E articulo aki ta opinion di e autor y no ta representa opinion di Bon Dia Aruba.