Riba rednan social tabata circula informacion cu polis a detene C.J., ken tabata candidato number 16 riba lista di AVP, hunto cu su pareha di 18 aña, J.W. E detencion a tuma luga despues cu mama di J.W. a denuncia cu su mesun yiu, y e pareha, tabata horta placa di dje.
Segun e mama, tanto su yiu mes J.W., como e pareha C.J. – cu na eleccion anterior a logra 106 voto y actualmente ta traha directamente cu Prome Minister Mike Eman – a horta placa for di su cuenta di banco. Ayera mainta departamento di recherche a detene ambos pa interogacion.
E pareha a ser deteni na San Nicolas, den area di Village. Segun informacion, e pareha a gasta e placa cu tabata pertenece na mama di J.W., Sra. E.W., un señora di edad halto.
Segun indicacion e pareha lo presenta dilanti fiscal ken lo dicidi kico lo pasa cu nan; si nan ta keda deteni of si ta laga nan liber cu e condicion cu nan ta acepta di paga e suma di placa back.
Casonan manera e situacion aki ta subraya un bes mas con fundamental ta pa gobierno implementa un proceso di screening y verificacion pa tur empleado cu ta traha, of cu kier traha, den gobierno. Sin un evaluacion adecua di integridad, antecedente financiero, y comportacion profesional, e riesgo pa abuso di poder, corupcion, of influencia indebido por aumenta considerablemente.
Screening no ta solamente un formalidad; e ta un mecanismo vital pa garantisa transparencia, responsabilidad y pa preveni situacionnan cu por pone gobierno den un luz negativo. Den un isla chikito manera Aruba, caminda cada acto por tin impacto, un sistema di screening ta esencial pa mantene integridad gubernamental y confiansa publico.
