Sector di real estate na Aruba ta ricibiendo hopi atencion recientemente, entre otro, pa motibo di un aumento percibi den Short-Term Vacation Rental (SVTR), prijs di vivienda cu ta hopi halto, y un aparente saturacion den e mercado. Pa haya mas informacion tocante esaki, Bon Dia Aruba a combersa cu Erwin Dijkhoff, co-fundador di ID Realty Group Aruba.

Zonificacion y SVTR

Entre comunidad local a surgi hopi controversia rond di e tema di Short-Term Vacation Rental, comercialisa a traves di plataformanan manera Airbnb. Pa motibo cu e tipo di acomodacion aki ta birando mas popular, residentenan permanente di Aruba ta preocupa tocante e efecto cu e propiedadnan destina na SVTR tin riba mercado di vivienda local.

Sinembargo, Dijkhoff ta aclaria cu no ta tur propiedad – manera cas of apartamento – na cualkier lugar por legalmente ser usa como STVR.

“Desde 2021, ley di zonificacion di ROPv ta bisa cu cierto area bo mag haci cierto cosnan, cierto area no. Ta hopi importante como cumprador pa bo ta na haltura kico bo mag di haci den e area ora bo ta interesa den un propiedad pa cumpra,” Dijkhoff ta bisa. Como ehempel, el a menciona si ta interesa den cumpra un cas na Santa Cruz, ta importante pa subi riba e ROPv, y mira pakico e area en cuestion ta designa, loke ta limita y indica kico por haci cu un propiedad den e area. “Si bo kier haci por ehempel short-term rentals, Airbnb, e ta algo cu eigenlijk bo no mag den cierto area. Dus pa haci esaki bo mester di un permiso pa por hacie corectamente.” Y e responsabilidad pa ta informa di e ley di zonificacion ta keda na e cumprador, a pesar cu como real estate agent, ID Realty Group ta considera cu nan tin e deber di busca a e informacion corecto pa conseha nan clientenan di kico ta posible y permisible den e propiedad cu nan ta interesa.

Dijkhoff ta enfatisa cu e ROPv ta specifica kico mag den cada area, y esaki ta un manera cu ta proteha pa localnan contra e proliferacion di SVTR. Sinembargo, el a nota cu ta recientemente a cuminsa tuma accion pa garantisa cumplimento, loke ta nifica cu por considera cu actualmente ta den un sorto di “gray zone” pa e sector aki. Pero poco poco lo mira mas aplicacion di ROPv, loke ta bay garantisa mas regulacion den e sector.

Cumprador local of stranhero?

Otro comentario cu ta scucha frecuentemente entre comunidad local ta e percepcion cu tin hopi stranhero y hende cu no ta biba na Aruba ta cumpra propiedad, loke tin un efecto riba e oferta den mercado di vivienda y e prijs. Tambe cu hopi hende kier cumpra propiedad pa huur como STVR, limitando e opcion di compra pa famianan local.

“Nos tin demanda hopi grandi di clientenan local cu ta interesa pa cumpra propiedad, esey ta pa propio uso mayoria biaha,” Dijkhoff a conta. “Pero tambe bo ta wak hendenan interesa pa cumpra un propiedad sea pa huur e pa termino largo of termino corto tambe. E ta depende di e clientela, kico nan interes ta, y con nan ta desea di usa e propiedad.”

Riba rednan social, hopi ta critica cu e prijs di vivienda na Aruba a bira impagable. Bon Dia Aruba a puntra Dijkhoff si den su experiencia, e prijs halto pa propiedad na Aruba ta bira un impedimento pa ciudadano local haya acceso na cumpra su propio cas. “E prijs ta varia. Tin diferente factor cu ta haci cu e prijs por ta mas halto. Hopi biaha nos ta conseha como nos compania, como ID Realty Group Aruba, nos ta conseha nos clientenan pa haci un taxatie rapport. Esey ta algo hopi importante. A base di e taxatie rapport, nos ta wak kico e balor di e propiedad ta.” Y maske e doño semper tin derecho di specifica ki prijs e kier pa e propiedad riba mercado, e taxatie rapport hopi biaha ta yuda defini e expectativa di prijs basa riba e balor real di un propiedad. “Hopi biaha bo tin un espacio cu bo por negocia,” Dijkhoff ta agrega. “E ta depende, cada caso ta diferente, y cada doño di propiedad ta diferente.”

Contestando si como agencia di real estate nan ta haya dificil pa haya un cas pa un cumprador local cu tin presupuesto di un famia Arubiano averahe pa haya un cas, Dijkhoff a bisa cu “tin cas pa tur hende,” pero mester di pasenshi y planificacion.

“Esey ta algo sigur. Hopi biaha e ta algo di pasenshi, e ta algo tambe di planifica, planea con bo ta bay yega na bo propio hogar.” Por ehempel, e ta conseha pa compara diferente banco pa evalua ki opcion tin disponible, y e posicion di cada cumprador, por ehemplo, si tin placa spaar. “E ta depende tambe como cliente con bo ta prepara bo mes pa ora bo pone bos activamente den buskeda di un propiedad riba mercado, pa bo ta prepara pa esaki.”

Otro critica cu ta keda bin dilanti ta e hecho cu hopi biaha ta pone e prijs di propiedad na dollar, loke ta duna e cumprador local e sentimento cu e propiedad no ta dirigi na dje. Sinembargo, Dijhof a aclaria cu motibo cu e prijs ta aparece den dollar riba website ta un tecnicalidad di e manera con e website ta traha. “Di loke mi a compronde esaki ta bay hopi biaha riba e development di e website,” e ta bisa. E website mes ta prepara caba pa usa dollar, y hopi biaha e website di real estate ta link cu otronan, y esey ta haci cu pa por traha hunto automaticamente, ta usa dollar. Sinembargo, ID Realty Group ta pone prijs na Florin riba rednan social pa e cumprador local.

Aruba Real Estate Summit 2025
 Mirando cu tin cada bes mas interes den sector di real estate na Aruba y cu a mira un crecemento den e industria aki na nivel local, ID Realty Group Aruba a sinti un responsabilidad pa facilita mas informacion y intercambio di conocemento. Pa e motibo aki, pa prome biaha na Aruba ta bay tuma lugar e Real Estate Summit, organisa pa ID Realty Group. E evento aki ta bay tuma lugar diasabra awo, 22 di november, di 9or di mainta pa 4or di atardi, na Hyatt Airport Place – Arikok Ballroom. E ta bay conta cu diferente profesional di diferente area den sector di Real Estate, manera arkitecto, director di FIU (Financial Intelligence Unit di Aruba), panelnan tocante branding personal, cumplimento cu leynan anti-labamento di placa, y hopi mas.

“E ta bay ta algo hopi interesante no solamente pa hende cu ta interesa den sector di real estate, pero tambe pa cualkier emprendedor, cualkier persona cu ta buscando informacion pa expande nan conocemento,” Dijkhoff a splica. E evento ta completamente gratis, pero cupo ta limita, dus mester registra pa garantisa participacion. Por haci esaki riba info@ID297.com.