E siman aki, e Commissie voor de Milieueffectrapportage (Comision MER) a comparti un comunicado di prensa tocante e situacion actual di e propuesta pa cria pisca den awanan cerca di Aruba. Segun e Comision, mas informacion ta necesario tocante e consecuencianan ambiental di cria red snapper den lama rond di Aruba.

E rapport di impacto ambiental a keda mehora significantemente despues di un recomendacion anterior di e Comision, pero ainda no ta completo, segun e comunicado di prensa. Por ehemplo, e consecuencianan pa rif di coral cu un produccion anual di 2mil ton di pisca no ta comprondi completamente ainda. Ademas, no tin claridad si e isla ta bay tin suficiente capacidad na tempo pa trata awa di desperdicio di e procesamento di pisca y di otro iniciativanan futuro na Aruba.

Compania Petros Aquaculture Operations kier cria red snapper na Aruba pa exportacion y pa consumo local. E proyecto ta inclui un ‘fish farm’, facilidad di procesamento y un pier riba e isla, como tambe haula di pisca den lama. Produccion lo cuminsa cu 500 ton pa aña y eventualmente aumenta na 2mil ton. Ministerio di Finanzas, Asunto Economico y Sector Primario di Aruba a indica cu lo rekeri mas permiso na dado momento pa cualkier escalacion potencial.

E rapport di impacto ambiental ta describi e consecuencianan pa naturalesa y medio ambiente. Riba solicitud di gobierno di Aruba, e Comision a evalua e rapport usando e standardnan internacional mas halto. E Comision no ta evalua si e proyecto ta deseable, sino ta mira solamente e calidad di e informacion den e rapport, cu ta necesario pa e autoridad competente por tuma un decision bon informa.

Den un recomendacion anterior, e Comision a declara cu ainda falta informacion importante. Petros a sigui hopi di e recomendacionnan aki bon, pero no tur di nan.

Ainda falta claridad tocante e impactonan ambiental y tratamento di awa di desperdicio pa un produccion anual di 2mil ton di pisca. Un rapport di impacto ambiental ta destina specificamente pa delinea efectonan ambiental tanto a corto plaso como largo plaso, incluyendo expansion planea pa e proyecto. Pasobra no ta cla si e isla tin suficiente capacidad pa trata awa di desperdicio na un nivel di produccion di 2mil ton di pisca, tin riesgo cu e awa aki eventualmente lo termina den lama. Esaki por tin consecuencia significante pa, por ehemplo, salud di hende na Aruba.

E consecuencianan pa e rif di coral tampoco ta bon comprondi ainda. E rapport no ta declara precisamente bao con hopi presion e ecosistema marino ta bay ta, y con esaki ta relaciona na e presion existente di otro actividad na y rond di Aruba. Solamente cu e informacion aki, gobierno di Aruba por dicidi si e presion adicional di Petros ta aceptable, e comunicado ta conclui.