(AP) — Riba su prome dia completo den prison, ex-presidente Jair Bolsonaro a bisa un hues diadomingo cu el a viola e condicion di su aresto domiciliario pa motibo di un breakdown nervioso y halucinacion causa pa un cambio den su remedi.
Hues di Corte Supremo, Alexandre de Moraes a duna ordo pa e prison preventivo di Bolsonaro, 70, riba diasabra, pasobra ta consider’e den riesgo di huy. Bolsonaro a keda sentencia cu 27 aña di prison na september pa intenta un golpi di estado pa keda na e presidencia despues di un derota electoral na 2022.
“[Bolsonaro] a bisa cu e tabatin ‘halucinacion’ cu tabatin wire tap den e monitor riba su enkel, pues el a purba di destap’e,” hues assistent, Luciana Sorrentino a bisa, segun reporta den un documento di Corte Supremo publica diadomingo tiki despues di su reunion online cu e ex-presidente.
Sorrentino a agrega cu Bolsonaro a bis’e cu e “no ta corda di a haya un breakdown di e magnitud aki den otro ocasion,” y a specula cu e por tabata causa pa un cambio den su remedi siman pasa. El a bolbe nenga cu e tabatin intencion di huy.
E documento tambe ta bisa cu Bolsonaro a bisa e hues cu e no tabata drumi bon y tabata sinti “un sorto di paranoia” cu a stimula su curiosidad den habri e aparato di monitoreo di enkel.
“[Bolsonaro] a bisa cu e tabata cu su yiu muher, su ruman grandi y un assistent na su cas y niun di nan a mira kico e tabata haciendo cu e aparato di enkel,” e documento ta bisa. “El a bisa cu el a cuminsa mishi cune anochi laat y a stop rond di mey anochi.”
De Moraes a ricibi informacion cu e monitoreo di enkel di e lider derechista a ser viola pa alrededor di 12:08am diasabra. E orden di aresto a yega algun ora despues.
Un panel di Corte Supremo di Brasil a duna veredicto na september cu Bolsonaro a purba di haci un golpi di estado y keda na e presidencia despues di su derota contra Luiz Inacio Lula da Silva na 2022.
Dialuna, e mesun panel ta bay vota riba e orden di aresto preventivo.
Reunion di Bolsonaro cu e hues assistent diadomingo tabata procedural pa discuti e legalidad di su detencion den prison, pero tambe a duna otro oportunidad pa su abogadonan argumenta cu e mester keda den aresto domiciliario pa motibo di mal estado di salud. De Moraes den pasado a rechasa solicitudnan similar.
De Moraes a autorisa Bolsonaro pa ricibi bishita di ex-prome dama Michelle Bolsonaro, kende tabata pafo di Brasilia na momento cu agentenan di polis federal a hiba su casa den custodia.
Presidente Lula a haci su prome comentarionan tocante e detencion di su predecesor na e reunion di nacionnan G20 na Sur Africa. “E corte a duna veredicto, esey ta dicidi. Tur hende sa loke el a haci,” Lula a bisa periodistanan.
Pafo di sede di polis federal, algun manifestante pro-Bolsonaro a tene borchi exigiendo pa retira Lula y De Moraes di nan posicion, mientras esnan contra e ex-presidente a celebra su detencion.
