Durante dos dia, Aruba ta punto di encuentro pa representantenan di diferente gobierno y representante di e sector turistico di diferente pais durante un forum internacional organisa pa SITA, cu a tuma luga na Embassy Suites Aruba. Expertonan for di diferente pais di Caribe y Central America a bin hunto den e forum den cual a haya informacion valioso relaciona cu tecnologia moderno den e sector di biahe.
SITA ta un organisacion lider mundial den tecnologia di informacion y comunicacion pa sector di aviacion. Su solucionnan ta uza pa aerolineanan, aeropuertonan y gobiernonan rond mundo, entre otro den areanan di proceso di pasahero, identidad digital y biometria, intercambio di informacion, operacion di aeropuerto y control di frontera.
Minister di Husticia, mr. drs. Arthur Dowers, a duna inicio na e forum internacional aki. Den su mensahe, Minister Dowers a enfatisa importancia di tecnologia moderno pa fortalece control di frontera cu enfasis riba siguridad, pero a remarca cu tecnologia so no ta suficiente.
E forum ta enfoca riba desaroyonan tecnologico cu ta transforma e sector di aviacion y maneho di frontera, entre otro digitalisacion di proceso di biahe, identidad digital y biometria, proceso di pasahero, intercambio di informacion y solucionnan cu ta contribui na operacionnan mas eficiente y sigur.
Pa Aruba, como un isla cu un aeropuerto internacional y unda conectividad cu resto di mundo ta esencial pa nos economia, un control di frontera moderno y efectivo ta di gran importancia. E desaroyonan tecnologico ta crea oportunidad pa sigui modernisa proceso, pero na mes momento ta exigi personal prepara, bon cooperacion entre e diferente instancianan y intercambio efectivo di informacion.
Minister Dowers a gradici SITA pa a scoge Aruba como anfitrion di e conferencia aki. Segun e Minister, e escogencia ta brinda Aruba e oportunidad pa reuni expertonan y partnernan internacional y pa intercambia conocemento y experencia riba desaroyonan cu ta importante pa futuro di biahamento y siguridad di frontera.
Durante dos dia, participantenan ta intercambia conocemento y experencia y conoce mas tocante solucionnan tecnologico y desaroyonan cu ta sigui determina futuro di biahamento y control di frontera.
