Dialuna un aeronave carrier di e Navy Mericano a ser observa den bisindario di Aruba y Corsou. Esaki tabata en conexion cu un vuelo di patruya cerca di e costa di Venezuela cu a tuma luga e dia aki, segun medio noticiero Defence Blog.
Segun e medio ta reporta, esaki ta un señal cu e carrier USS Gerald R. Ford a drenta den operacion. E nave aki—barco di guera mas grandi di e Pentagono—a yega den Caribe siman pasa y a uni cu otro navenan militar na un base na Puerto Rico, marcando e presencia mas grandi di Merca den e region desde invasion di Panama na 1989.
Segun a reporta, e equipo di patruya a inclui e E-2D Hawkeye y varios F/A-18E/F Super Hornet fighter-bombers.
Localnan tambe a participa den e observacion aki, unda un usuario riba Facebook a publica un livestream di e monitoreo di trafico aereo via Flightradar24.com, cuminsando rond 6or di atardi. Imagen a confirma varios aeronave cu label RHINO-series F/A-18E/F Super y TRACER-series E-2D Hawkeyes operando riba awanan internacional panort di Venezuela. Segun imagen a mustra, e aeronavenan a bula rutanan repititivo den cuadra cu actividad di patruya maritimo.
Patruya a cuminsa mas pariba di e islanan ABC, den bisindario di islanan Gran Roque y Isla La Tortuga di Venezuela, yegando Trinidad y Tobago. Un rato despues, a nota dos Super Hornet panort di Aruba, bulando casi 8km di haltura. Segun e usuario ta splica, e otro Super Hornet tambe ta bulando casi riba e mesun haltura.
Na momento cu a tuma nota di e fighter-bombersnan aki, a splica cu por a observa cinco di nan den e area. Sinembargo, e usuario ta sigui splica cu esaki no ta nifica cu no tin mas ta bulando den Caribe; e cinco nave cu por a observa tabatin nan transponders cendi.
Segun Defence Blog ta reporta, trabaonan di patruya te awor a ser conduci pa unidadnan di aviacion di e Marine Corps di Merca unda e aeronave F-35B Lightning II tabata operando desde e base na Puerto Rico. E aparencia di e Super Hornets y e E-2D Hawkeye ta indica cu tin un movemento completo di e carrier mas nobo di e US Navy.
Ayera e Autoridad Curasoleño di Aviacion Civil (CCAA) a emiti un alerta internacional di aviacion (NOTAM) despues cu varios aeronave no identifica a keda detecta operando den espacio aereo rond di Aruba, Bonaire y Corsou. E advertencia ta urgi tur aerolinea y piloto pa eherce cautela extremo ora di bula na y for di islanan ABC. Directie Luchtvaart tambe a emiti un comunicado informando pueblo cu te awo no tin indicacion cu vuelonan pa of for di Aruba ta ser afecta directamente. P’esey, e monitoreo lo sigui estrictamente y lo tuma medidanan segun necesidad, manera a splica.
