Dialuna e departamento di impuesto (DIMP) a publica un advertencia riba nan pagina di Facebook unda a pidi contribuyentenan pa sea alerta cu posible estafa via SMS.
E instancia a splica cu a nota dialuna cu personanan no autorisa a cuminsa manda mensahe via SMS usando nomber y logo di DIMP. E mensahenan ta persuadi clientenan pa “no perde tempo” y pa nan pidi nan restitucion fiscal den forma digital. Acompaña cu e mensahe aki por haya un link unda por click pa mas detaye.
DIMP ta adverti cu esaki no ta e tipo di mensahenan aki no ta oficial y ta alerta no a sali di e departamento. Tambe ta pidi pa contribuyentenan no habri e link y si hacie toch, no duna ningun informacion den e formulario digital. DIMP ta enfatisa cu esaki ta hopi peligroso debi cu ta trata di datonan personal y cu esaki por cay den mannan di personanan cu mal intencion.
E instancia ta subraya cu e tipo di mensahenan aki no ta comun pa DIMP, ya cu nunca lo pidi contribuyentenan pa yena dato persona via formularionan asina.
Por ultimo, ta pidi pa no habri ningun link cu ta bin for di un SMS of email cu ta usando nomber y logo di e instancia y pa semper verifica cualkier mensahe cu e instancia mes.
Esaki ta atrobe un otro caso di estafa cibernetico cu den e aña aki a bira hopi frecuente y cu a ataca varios instancia publico y priva, incluyendo Parlamento di Aruba y Aruba Post N.V.
