Den un actualisacion oficial mediante un comunicado di prensa, Cuerpo Policial di Aruba a reconoce e identidad di e victima di un asesinato recien cu a keda descubri na Solito. E caso aki a causa conmocion entre comunidad local, pa motibo cu e persona tabata desaparecido pa varios dia, y despues a bin haya su curpa den freezer.
Segun polis a informa, investigacion riguroso ta andando keto bay di e caso di asesinato na un adres na Solito. Cuerpo Policial ta informa oficialmente cu den oranan laat di diamars atardi a identifica e victima di e caso di diasabra, na unda a haya un curpa sin bida den un cas na Solito.
Ta trata di e victima señora Luz Divina Faña Paulino naci dia 7 april 1965 (60 aña di edad) di Republica Dominicana.
Diasabra, e caso a causa hopi conmocion pa e detayenan impactante di e descubrimento. Medionan local a reporta cu a descubri curpa di e victima corta na pida, hinca den freezer di su propio cas.
Te awor, Cuerpo Policial no a duna mas informacion oficial tocante e caso. Sinembargo, riba rednan social y medionan di comunicacion local, tin diferente rumor ta circulando. Un di nan ta implica sobrino di e victima como e principal sospechoso den e caso. Ta bisa cu e victima a adopta e sobrino y a cri’e na Aruba como su propio yiu. Loke ta hacie sospechoso, segun e rumornan, ta cu el a bandona e isla diripiente (algun ta bisa cu el a bay Santo Domingo, otro ta bisa cu el a biaha pa Panama), y cu e lo a cobra e huur di e dos apartamento cu e victima tabata huur riba su propiedad.
Riba rednan social tambe ta bisa cu famia di e victima na Santo Domingo ta purbando di haya informacion riba kico por a sucede cu nan ser keri, pero no por haya contacto cu e sobrino y no sa di su paradero.
Sinembargo, te awor polis no a identifica oficialmente un sospechoso.
Cuerpo Policial ta haci un apelacion pa e persona cu sa algo of a wak algo yama e tiplijn di polis cu ta 11141. Nos ta garantisa cu bo ta keda ANONIMO. KPA ta manda palabra di profundo condolencia na e famia di e fayecido.
