A yega na mesa di redaccion di Bon Dia algun duda y pregunta tocante e motibo tras e falta di decoracion na cierto parti di e caya principal, o asina yama Caya Grandi di San Nicolas.
Manera ta custumber y un tradicion di nos isla, den temporada festivo y di Pasco e cayanan grandi di e isla ta decora pa refleha e ambiente festivo cu ta sinti na henter e isla. Di mesun manera cu tur o mayoria di e rotondenan riba e isla ta keda decora, e caya grandi di tanto San Nicolas como Oranjestad tambe ta keda decora.
E causa di e preguntanan cu a surgi ta e hecho cu na San Nicolas por mira un falta di decoracion.
Den e prome parti di e caya grandi di San Nicolas, es decir e caya cu ta yega te na e rotonde, por mira y disfruta di un bunita decoracion cu ta bay di un banda di e caya pa e otro, bao di cual e autonan por pasa. E duda ta surgi pa motibo cu na momento cu sali di e parti aki y sigui straight na e rotonde, ta drenta e di dos mita unda no ta conta cu e mesun decoracion.
A pesar di e hecho cu ambos ta forma parti di e caya principal o caya grandi di San Nicolas, solamente e prome mita tin e decoracion cu ta un parti clave di e temporada festivo na Aruba.
San Nicolas tin un reputacion tanto cu localnan y bishitantenan di ta e punto cultural di e isla, unda ta haya lugarnan cu ta forma un parti clave di nos cultura, ademas di ta e punto artistico di e isla. E area aki no ta conta solamente cu monumentonan y lugarnan cu ta forma parti profundo di nos historia, tambe e ta conta cu varios mural y diferente forma di arte unda tanto localnan como turista por deleita y disfruta di e talento inmenso cu tin riba nos isla.
Pa e mesun motibo aki, e falta di decoracion na un parti di San Nicolas ta causa tristesa y un sentimento di posible falta di consideracion. Un ciudadano a expresa cu “e ta duna’mi e impresion cu nan no ta worry. E prome pida cu ta decora ta unda bo ta haya tur e partinan bunita, pero e parti unda realmente nos restaurantnan, nos barnan ta si nan no a worry pa decora. Esaki no ta sinti bunita, pasobra bo ta practicamente despreciando e area anto mi pregunta ta bira, pakico? Cua ta e motibo cu ta decora un pida y e otro no?”
Algo cu a resalta ta e hecho cu na e di dos mita menciona cu te ainda no a decora, tin un parti unda no ta mira e palonan pa e decoracion. Na e prome parti aki, por mira cu tin e palonan necesario pa sigui cu e decoracionnan pero na e otro parti no. Coincidencia ta cu e parti aki unda no ta mira e palonan, tin e barnan di cual e ciudadano tabata papia. Esaki por duna e impresion cu den e prome parti di e caya si ta decora y posiblemente lo decora den dianan binidero, pero na e otro parti aki mas dilanti, no ta decora mes. Segun instancia cu ta activo den e area di San Nicolas, te hasta a organisa un ceremonia di cende luz, cual ta duna e impresion cu a termina cu e decoracion completamente, y si esaki ta e caso, e otro mita di caya grandi a keda laga afo conscientemente.
Mirando cu e situacion ta treciendo inkietud y sentimentonan negativo den comunidad, Bon Dia Aruba a acerca DOW pa haci algun pregunta, sinembargo te na cierre di e edicion aki no a ricibi contesta.
