Corte Comun di Husticia di Aruba, Corsou, Sint Maarten y Boneiro, Sint Eustatius y Saba a ordena Gobierno di Aruba pa paga Afl. 1.500 den compensacion na un solicitante di asilo, pa motibo cu su caso a keda para pa demasiado tempo. E decision, tuma riba 26 november 2025, ta pone un luz fuerte riba problema di tardansa den tramitacion di caso di migracion na Aruba.

E caso ta envolve un solicitante di proteccion internacional cu su identidad no a ser publica. Pero e sentencia ta duna un bista cla y critica na manera con e Ministerio di Husticia a maneha su procedura — specialmente tocante e falta di tempo rasonabel pa tuma decision riba un bezwaar y apelacion.

E solicitante a haci un peticion pa proteccion internacional riba 1 november 2021, pero e peticion a ser rechasa. Riba 10 december 2021 e persona aki a presenta un bezwaar y despues di esaki a sigui un proceso largo y complica, marca pa falta di decision di parti di gobernacion.

No tabata te 28 maart 2024 — casi dos aña y mey despues cu e bezwaar a ser presenta — cu e Minister a sali cu un decision nobo, den cual el a declara cu e bezwaar tabata “no funda”. E solicitante a cuminsa un bataya legal nobo y entama un caso den Corte di Prome Instancia riba 13 mei 2024, y e corte a publica su veredicto riba 23 april 2025, anulando e decision di e Minister.

A pesar cu e apelante tabata di acuerdo cu parti di e sentencia, e no tabata contento cu tur punto, y asina e a bay den un apelacion mas halto na Hof. Audiencia tabata na 10 october 2025. E Minister a ser representa legalmente, pero e apelante mes no tabata presente.

E total di tempo — for di e bezwaar te ora cu Corte a duna su decision — tabata tres aña y cuater luna y mey. Pa Hof, e tardansa aki ta demasiado, y e Ministerio mes ta totalmente responsabel pa e tardansa.

Den su apelacion nobo, e apelante a presenta dos argumento principal: Uno, cu segun e, Corte di Prome Instancia a ordena cu e mester sali for di Aruba den seis siman despues di un decision nobo; y dos, cu Corte di Prome Instancia no a trata su peticion pa compensacion pa daño inmaterial, pa motibo cu e proceso a tuma mas tempo cu loke tabata rasonabel segun Articulo 6 di EVRM.

Hof a scucha tur dos argumento, pero solamente un a ser acepta. Riba e prome punto, Hof a bisa cu a trata di un mal interpretacion. Corte di Prome Instancia nunca a ordena cu e apelante mester sali den seis siman. Na contrario, Corte a bisa cu no por deporta e apelante te seis siman despues cu e haya un decision nobo. Esaki ta protege su derecho pa keda na Aruba durante proceso administrativo y legal.

Pero na e segundo punto, Hof a duna rason na e apelante. Segun e documento, e peticion pa compensacion a ser presenta na tempo, dos dia prome cu e audiencia, via e-mail. Corte di Prome Instancia tabata obliga pa tuma un decision riba esaki, pero no a haci’e. Hof, por lo tanto, Hof mes a haci e evaluacion.

Hof a analisa tur e fecha importante:

10 december 2021 – bezwaar presenta;
28 maart 2024 – decision riba e bezwaar;
23 april 2025 – sentencia di Corte di Prome Instancia.

Ta cla cu e tardansa principal tabata den e periodo entre e bezwaar y e decision di e minister. Den palabranan di Hof, esaki ta pone e responsabilidad completamente riba Ministerio di Husticia, Integracion y Transporte Publico.

Hof a conclui cu e plaso razonable tabata excedi pa un aña y cuater luna y mey. Segun tarifa cu e Hof semper ta usa — Afl. 500 pa cada mitar aña di tardansa — e apelante tin derecho na Afl. 1.500.

E suma ey ta considera daño inmaterial: stress, inseguridad, experiencia negativo di un proceso cu no ta respeta su derecho.

E decision ta encera tambe varios consecuencia financiero pa Gobierno di Aruba:

Minister di Husticia mester paga Afl. 1.500 na daño inmaterial.

Gobierno mester reembolsa e apelante Afl. 350 na gastonan huridico asocia cu e apelacion mas halto.

Pais Aruba mester debolbe Afl. 75 di tarifa di entrega di apelacion paga pa e apelante.

Corte a duna e ordennan aki unanimamente, cu e decision firma pa Huesnan B.J. van Ettekoven (presidente), J.Th. Drop, y E.J. Daalder, i registrá pa griffier di korte M. Buntjer

E sentencia tin varios punto importante cu por tin impacto riba sistema di migracion di Aruba.

Hof a reafirma cu un solicitante di asilo tin derecho pa keda na Aruba mientras su bezwaar of apelacion ta den curso. Esaki ta inclui situacionnan caminda un decision anterior a ser anula y gobierno tin cu tuma un decision nobo. E veredicto di Hof ta fortalece proteccion pa solicitantenan vulnerabel.

E tarifa di Afl. 500 pa mitar aña ta keda cla y consistente. Esaki ta duna mas claridad den cada caso cu pasa di e plaso di tempo rasonabel cu por yega na un compensacion di manera predeci.

E decision ta trece un mensahe firme: tardansa administrativo tin consecuencia financiero. Ministerio por haya mas presion pa despacha caso mas liher y evita pagamento di compensacion.

Na Aruba, organisacionnan di derechonan humano, abogadonan local y incluso sentencianan den corte a pone atencion riba tardansa den proceso di migracion y asilo cu ta afecta migrantenan vulnerabel, incluyendo esnan cu ta huy di violencia of persecucion

E caso aki ta subraya e necesidad pa Gobierno mehora su eficiencia administrativo, specialmente caminda retrasonan por infringi riba obligacionnan internacional di derechonan humano. Gobierno tin obligacion pa trata caso den un periodo rasonabel, specialmente si ta trata di derechonan humano fundamental.