Aruba a drenta 2025 cu señalnan di stabilisacion gradual a traves di indicadornan economico clave, revelando un paisahe forma pa alivio di inflacion, cambio di dinamica di comercio, reservanan internacional solido, condicionnan di fiansa cauteloso, y finanzas di gobierno den evolucion. E rapport di Banco Central di Aruba (CBA) tocante e “Estado di Economia di 2025-I” ta pinta un pais cu ta topa un ritmo mas stabiel, mientras cu ta fortalece su posicion den mercado internacional.
Un tema central den e rapport di prome kwartaal ta e mehoracion continuo den e tasa di cambio real (RER) di Aruba. E RER ta un medida cu ta mustra con caro of barata Aruba ta compara cu Merca, y con esaki ta afecta nos capacidad pa competi riba mercadonan internacional.
Segun CBA Den e prome tres lunanan di 2025, e RER a sigui baha, loke ta indica cu Aruba ta bira relativamente mas barata y por ehempel mas atractivo pa turista y pa exportacion. E mehoracion aki ta surgi hunto cu un inflacion mas modera na Aruba, un surplus stabiel riba cuentanan externo, un aumento den prestamo di negoshi y un saldo gubernamental cu ta keda positivo a pesar di gastonan publico mas halto.
Segun Banco Central di Aruba, e RER a cay te na 92.3 den e prome kwartaal di 2025. Esaki ta señala cu Aruba ta gana tereno den turismo y exportacion, pasobra e producto y servicionan ta bira mas accesibel compara cu Merca. E situacion aki ta bini principalmente pa motibo di un inflacion mas abao na Aruba. Na fin di maart 2025, inflacion tabata 1.4%, mientras cu na Merca tabata 2.8%. Esaki ta mustra un diferencia cu ya ta persisti for di mitar 2023, y cu ta sigui fortalece e posicion di Aruba. Aunke e RER a move den kwartaalnan individual, e tendencia general ta un fortalecemento di Aruba su competitividad, apoya den un inflacion domestico cu ta sigui baha, specialmente den area di energia y vivienda.
Den comercio, e rapport ta mustra cu importacion y exportacion den balor a subi den e prome kwartaal, pero no den cantidad. Importacion den balor a crece cu 9.7% (Afl. 60.8 miyon) y exportacion cu 10.2% (Afl. 7.1 miyon). Pero den cantidad, importacion a baha cu 2.9% y exportacion a cay duro cu 59.9%. Esaki ta sugeri cu factor di prijs mundial y gastonan di transporte a hunga un rol importante.
E rapport tambe ta mustra cu actividad den e waf a aumenta un tiki. Yegada di barconan di carga a subi un poco, y trafico di container a aumenta 6%, specialmente container grandi di 40 pia. Importacion di material di construccion a mustra un crecemento hopi fuerte: importacion di cement a subi 339%, y importacion di vehiculo a crece 168 unidad. Esaki ta indica cu tin hopi proyecto di construccion grandi andando y cu demanda den sector automobilista ta aumenta.
Riba cuentanan externo, e balansa di pago di Aruba a keda fuerte. E cuenta coriente a logra un surplus di Afl. 508.7 miyon den e prome kwartaal, solamente un tiki mas abao compara cu aña pasa, pero ainda hopi solido. Turismo a keda e forsa principal di ganashi, generando Afl. 1.167.6 miyon den servicionan exporta, practicamente mesun nivel cu 2024. E cuenta di mercancia a keda den deficit mas grandi pasobra importacion ta mas halto, pero e cuenta di entrada a mehora pasobra tabatin menos salida pa pago di ganashi pa inversion. Cuenta di capital tambe a mehora, subiendo te na Afl. 6.8 miyon, indicando mas actividad den transferencia di capital y inversion.
E rapport ta indica cu den cuenta financiero, Aruba a registra un prestamo netto di Afl. 517.1 miyon, un cifra mas halto cu e aña prome. Esaki ta bini principalmente di un aumento fuerte den reservanan di Banco Central di Aruba, cu a subi Afl. 215.4 miyon. E aumento den reserva ta yuda tene e sistema financiero mas fuerte y mas stabiel. Inversion di portafolio tambe a subi, mientras cu inversion directo a baha un tiki. E bahada aki ta mayormente pasobra transaccion grandi cu tabata presente un aña prome no a ripiti den 2025.
E oferta di placa (cantidad total di placa den economia) a subi te na Afl. 6.534.1 miyon na fin di maart 2025. Esaki ta bini principalmente di e aumento den activonan externo. Reservanan internacional a keda fuerte, cubriendo 133% di e nivel cu IMF ta recomenda, ekivalente na 8.1 luna di importacion. Esaki ta señala cu Aruba tin un base monetario hopi solido.
Na Aruba mes, activonan domestico neto a baha un tiki pa motibo di mas deposito di gobierno na banconan local. Mientras tanto, prestamo den sector priva a sigui aumenta. Negoshinan a haya mas fiansa, cu un aumento di Afl. 48 miyon, hypotheek tambe a crece, y fiansa personal a subi levemente. Tasanan di interes na banconan a keda stabiel, y e margen entre deposito y fiansa a baha te na 3.7%. E situacion aki ta señala cu fiansa ta bira un tiki mas barata pa negoshi, cu ta indica un ambiente mas facilita pa inversion y crecemento.
CBA ta remarca cu Sistema financiero di Aruba ta mustra hopi stabilidad. Prestamonan ku no ta paga balia tabata solamente 1.2% di e total, cu ta un nivel hopi abao. ‘Capital adequacy’ a subi te na 32.3%, i e nivel di likides potencial tambe ta halto, rond 33.7%. Esaki ta señala cu sector bancario tin suficiente recurso pa soporta e economia den caso di situacion inespera.
Riba nivel di gobierno, Aruba a logra mantene un surplus fiscal den e prome kwartaal di 2025, aunke e cifra ta mas chikito cu e aña prome. Surplus tabata Afl. 42.6 miyon, compara cu Afl. 87.2 miyon den 2024. Aumento di gasto publico ta e rason principal pa e diferencia aki. Gastonan a subi 13.5% te na Afl. 368.5 miyon, principalmente pa motibo di aumento den transferencia y subsidio, cu a crece 64.3%. Gastonan di personal tambe a subi Afl. 16.6 miyon, mientras cu inversion publico a crece levemente. Gastonan riba bienes y servicio y pago di interes a baha un tiki.
Pa loke ta entrada di gobierno, e rapport ta indica cu esaki a keda relativamente stabiel, rond di Afl. 413.1 miyon. Impuesto riba importacion y omzet a mustra un crecemento modesto, reflehando mas actividad den economia. Turismo a contribui den impuesto riba camber di hotel, cu a subi pa motibo di tarifanan di camber mas halto. Pero impuesto riba entrada y ganashi a baha pa motibo di un reduccion den tarifanan cu a ser implementa na januari 2025, y impuesto riba divisa tambe a cay fuerte.
A pesar di e gastonan cu ta subi, Aruba su ratio di debe pa GDP a sigui baha. Debe total di gobierno a cay Afl. 203.3 miyon, principalmente pa reduccion den debe domestico. Na fin di e kwartaal, 39.5% di debe tabata domestico y 60.5% tabata exterior. E ratio total di debe a baha for di 75.9% te na 67.2%, loke ta representa un mehoracion importante den sostenibilidad fiscal.
E situacion global na comienso di 2025 tabata generalmente positivo pa Aruba. FMI a mehora su pronostico mundial pa 2025 te na 3% di crecemento, basa riba un suavisacion den tasa di interes, conducta financiero mas facil y estimulo fiscal na economianan grandi. Merca, cu ta Aruba su partner mas importante den turismo y comercio, ta spera pa crece 1.9%, un mehoracion chikito. Economianan emergente, specialmente den Asia, ta sigui pusha crecemento mundial. Den Latino America y Caribe, crecemento proyecta ta 2.2%.
Riesgonan global ta keda presente, manera incertidumbre riba politica di tarifa, tension geopolitico y e posibilidad cu condicionnan financiero mundial por bira mas severo. Pero tambe tin oportunidad pa crecemento si negociacionnan di comercio ta progresa of si cadenanan di suministro ta stabilisa.
En general, e rapport ta indica cu e panorama economico di Aruba den e prome kwartaal di 2025 ta mustra un economia cu ta drenta un fase mas stabiel despues di hopi volatilidad durante e periodo di pandemia. Tabatin ganashi importante den competitividad internacional, den cuentanan externo y den control di debe publico. Pero na mesun momento CBA ta remarca cu tambe tin area cu mester ser vigila, manera e bahada den volumen di comercio, e aumento rapido den gastonan publico y e entrada di impuesto riba salario cu ta crece mas poco. Sinembargo, cu inflacion mas abao, turismo fuerte y un situacion global cu ta mehora, CBA ta enfatisa cu Aruba ta drenta e proximo lunanan cu un base firme pa sigui diversifica economia y fortalece su posicion den region.
