Durante tratamento di e presupuesto pa Bureau Ombudsman pa aña 2026, mi a enfatisa cu e presupuesto pa defensor di pueblo “no ta solamente un cuestion di cifra, sino e curason financiero pa garantisa un institucion fuerte, independiente y efectivo. Un pilar fundamental pa proteha nos ciudadanonan contra mal gobernacion.”

Mi a indica cu 2026 ta bay representa un aña di consolidacion despues di lansamento di e institucion na 2024–2025. Alabes mi a expresa mi speransa cu e Ombudsman pronto lo tin su ekipo completo pa por duna servicio. Esaki incluyendo e Kinderombudsman, cu lo pone Aruba como e unico den Reino Hulandes cu e funcion aki oficial den ley hancra y den funcion na defensa di derechonan di nos muchanan. Nos por ta e ultimo den Reino pa instala un Ombudsman, pero nos ta e prome isla cu un Kinderombudsman ancra den ley. Esaki ta mustra madurez institucional y un compromiso real cu derechonan di mucha.

Presupuesto y Independencia

Como parlamentario mi a resalta cu e presupuesto ta ahusta na e Principionan di Venecia, garantisando independencia financiero pa un Hoge College van Staat. Mi a midi informacion riba e.o. capacidad di personal, fondo pa investigacion, IT y reportahe y mi por bisa cu un preparacion debido a tuma lugar pa por start sali y duna pueblo e servicio di un defensor di pueblo cu ta asina importante.

E Bureau lo traha cu 11.5 FTE, y ya 6 persona a keda nombra den funcion actualmente, esaki incluyendo e Ombudsman mes. Si tur cos cana manera plania pa maart venidero nos lo conoce nos Kinderombudsman tambe. E proceso di alocacion ta biento en popa y ta spera cu pronto e ekipo lo ta completo.

Mi a pidi e Ombudsman pa percura  e pa e balans entre entrega dunamento servicio y formacion simultaneo cu lo ta tumando lugar di nan personal. Pasobra unabes pueblo entrega un keho, tin  cierto deseo y expectativa pa un resultado. Un bon balans entre formacion y calidad di servicio ta esencial pa un start fuerte.

Por ultimo ta bon pa pueblo sa cu Ombudsman ya ta funcionando. Pronto lo tin un soft opening y ya nan a realisa dos investigacion. Esakinan ta trata investigacion over e siguiente temanan:

Muchanan cu ta bay scol y tin e obligacion pa entrega un carta di meldziek;

Trece na bista tur e instancianan na cual e Ombudsman por verwijs un keho cu no ta cay bou nan tarea. Asina  nan por doorverwijs diligentemente y liher y e cliente por sigui encamina nan keho.

Pa finalisa mi a desea exito total na Bureau Ombudsman den nan mision pa proteha nos pueblo. Y mi a enfatisa cu nos tur kier un start fuerte pa nos defensor di pueblo.

Nota di redaccion: E articulo aki ta opinion di e autor y no ta representa opinion di Bon Dia Aruba.