Mercado di comestible na Aruba ta crea hopi riesgo pa consumidor

Aunke cu acuerdonan exclusivo pa distribucion cu ta existi na Aruba no ta contra e ley di concurencia inhusto, e ta representa riesgo, cu particularmente ta afecta e Canasta Basico. Esaki ta parti di conclusion di un investigacion ehecuta pa Aruba Fair Trade Authority, AFTA, e autoridad encarga cu implementacion di e ley, conoci como e Mededingingsverordening.

Un combinacion di exclusividad, competencia di marca limita, barera halto pa drenta y integracion vertical ta riesgonan grandi pa un competencia saludabel segun e autoridad.

AFTA a ehecuta un investigacion profundo riba acuerdonan exclusivo di distribucion pa loke ta cuminda. Motibo tabata un investigacion inicial na 2024 unda a conclui cu palabracionnan asina tin influencia riba competencia y prijs, y como tal por splica e nivel halto di prijs di cuminda pa e consumidor Arubiano. Un investigacion di mercado ta diferencia di un investigacion pa implementacion di ley, cu ta sigui despues cu tin un sospecho cu ta kibra ley. Un investigacion di mercado por produci resultado cu ta duna motibo pa haci un investigacion di implementacion, AFTA ta splica.

AFTA a usa diferente metodo di investigacion, manera e analisis di documento y entrevistanan semi-structura. Banda di esey, a base di e ley Mededingingsverordening, a manda companianan peticion di informacion pa asina por haya documento y datonan relevante, manera acuerdonan di distribucion. Esnan cu ta participa den mercado ta obliga pa coopera cu tur exactitud y honestidad cu investigacionnan di AFTA, y mester duna contestanan completo. Esnan cu no cumpli cu e obligacion aki por keda sanciona pa cu boet.

E investigacion a enfoca riba e tipo di, efecto y embergadura di e acuerdonan exclusivo di distribucion, cu atencion particular pa nan impacto riba acceso di mercado, establecimento di prijs, importacion paralel y competencia na Aruba. Durante e investigacion, AFTA a dal den e funcionamento di e Canasta Basico. Aunke cu esaki tabata un tema cu inicialmente lo no tabata forma parti di obhetivo di e investigacion, AFTA a dicidi toch pa haya un miho bista riba e proceso aki y a base di e resultadonan, duna recomendacion concreto.

Resultado

AFTA den su rapport a ilustra entre otro, cu aunke cu e investigacion tabata riba acuerdonan exclusivo di distribucion, locual a sali afo ta cu acuerdonan asina cu ta poni por escrito no ta comun. Al contrario, den practica tin relacionnan exclusivo di distribucion unda un distribuidor di forma structural ta e unico cu ta brinda un marca of producto, sin cu esaki ta poni riba papel. Un distribuidor ta esun cu ta importa y ta ofrece e producto na socionan cu ta bende na publico. E distribuidor den hopi caso ta haya derecho exclusivo pa importa y pasa e productonan na otro partidonan. E pregunta, segun AFTA, ta si e distribuidor den sentido huridico por papia di exclusividad. Esey ta depende di circunstancianan. Pero, e exclusividad real den e caso aki ta relata na productonan cu mester keda consumi mesora y cu mester busca cada rato. Ehempel di esakinan ta cuminda, producto higienico, y producto di limpiesa.

Segun AFTA, importacion pa e mercado local ta domina pa un cantidad limita di distribuidor cu tin derechonan exclusivo, cu ta conduci na un structura di mercado oligopolistico pa un cantidad grandi di producto. Esaki ta un forma di mercado unda un grupo limita di compania ta determina e oferta y ta brinda servicio na consumidor. E relacionnan estableci di distribuidornan di productonan mara na marca y e poco motivacion busca mas distribuidor riba e mercado di Aruba ta crea retonan grandi pa cualkier instancia cu kier drenta e mercado di distribucion.

 

Tin hopi competencia entre marcanan, pero hasta den e mesun marca, pa motibo cu e manufactornan ta traha tipicamente di forma exclusivo cu un distribuidor, sin cu esaki ta basa riba un acuerdo di exclusividad cu tin su base huridico. Banda di esaki, e escala chikito di e mercado local ta haci dificil pa importadonan por competi a base di marca of nivel di producto. Pa loke ta e benta directo na consumidor, AFTA ta bisa cu tin competencia grandi entre supermercadonan, supermercado di bario y minimarkets.

Importacion paralel, cu ta nifica productonan di mesun marca pero for di canalnan alternativo, cu no ta e distribuidor ‘oficial,’ ta permiti e competencia entre e marcanan. Den practica sinembargo, ta supermercadonan grandi cu tin e forsa pa cumpra y capacidad logistico tin acceso na e sistema di importacion paralelo. Tin indicacion cu algun supermercado di bario y minimarket hunto ta aplica importacion paralelo, pero AFTA ta bisa di no por determina esaki ni su frecuencia, basa riba e investigacion aki.

En todo caso, analisando e datonan disponible, AFTA ta bisa cu efecto di importacion paralelo riba henter mercado ta limita.

Integracion vertical

Hopi distribuidor ta activo tambe den benta por detal. E integracion vertical aki por produci riesgonan pa competencia, ya cu e distribuidornan aki por beneficia nan propio puntonan di benta cu prijsnan mas favorabel, accesibilidad, y tambe promocionnan exclusivo. B anda di esey, nan tin e informacion comercial di nan clientenan cu de facto ta competi pa e benta, cu por produci un beneficio strategico y haci mas dificil ainda cu otro por participa den e mercado. Supermercadonan grandi ta mantene structuralmente prijsnan mas abou cu supermercadonan di bario y minimarket, cifranan di Central Buro di Estadistica, CBS, ta mustra, contrario na e percepcion di publico.

Evaluacion

E acuerdonan di distribucion investiga generalmente no tin limitacion di competencia, manera limitacion di importacion paralelo of compra exclusivo, y riba nan mes no ta contra e ley. Desde cu e ley a drenta na vigor na Januari 2024 tampoco tin indicacion di menasa di boycott, of cu kier nenga di entrega producto of cualkier otro accion como reaccion riba importacion paralelo, sea cu esaki ta e caso of tin sospecho di tal. Tin seňal si cu tal menasanan tabata existi prome cu e ley.

Canasta Basico

E Canasta Basico den su forma actual no ta brinda suficiente proteccion contra fluctuacion di prijs na nivel internacional y den practica, empresanan ta desvia hopi di dje, AFTA ta bisa. Pa tal motibo, no ta cumpli cu obhetivo di e Canasta Basico cu ta pa percura cu consumidornan por cumpra algun comestible na un miho prijs. Como tal, AFTA ta considera cu e instrumento di Canasta Basico no ta efectivo y por hasta stroba e mercado. Como tal, e autoridad ta sugeri pa reevalua e instrumento di Canasta Basico, pa asina demanda y oferta, sosteni pa competencia saludabel, por asumi e papel mas importante pa garantisa cu comestible ta keda pagabel.

No por conclui cu e acuerdonan exclusivo di distribucion ta splica e prijsnan relativamente halto na Aruba. Locual si tin ta indicacion di relacion di distribucion exclusivo, den combinacion cu importacion paralelo limita, sin cu esaki ta kibra cu e ley. AFTA como tal ta urgi tur partnernan den mercado pa acudi na AFTA ora tin sospecho di acuerdonan exclusivo pa loke ta e distribucion di productonan di consumo of limitacion forsa di importacion paralelo. Ta a base di notificacion di esnan activo den e sector cu AFTA por haci mas investigacion y tuma paso, si tin mester.