Parlamentario Rocco Tjon, den nomber di Fraccion MEP, a solicita dialuna 1 di december oficialmente un “vragenuur” urgente na Presidente di Staten tocante e biahe controversial den jet priva di Minister Gerlien Croes (Futuro).
Den un entrevista, Minister Gerlien Croes a declara cu ta e mes a paga e biahe aki, pero te awe e no a entrega ningun prueba cu ta demostra esaki, parlamentario Tjon a bisa den un comunicado di prensa.
“E falta di transparencia aki ta kibrando confiansa den gobierno y ta pone integridad di nos sistema na peliger. P’esey e a manda 36 pregunta por escrito pa Minister duna claridad al respecto. Segun Tjon, situacion aki ta hopi serio y Staten mester pidi responsabilisacion na e Minister mes ora. “Aruba a traha hopi aña pa establece bon gobernacion. Y ta e tipo di comportamento aki di Minister Gerlien Croes ta pone tur esfuerso na peliger. E minister mester duna transparencia total aworaki mes.”
Si Minister Gerlien Croes no tin nada di sconde, e ora e lo mester por entrega tur documento sin ningun problema y aclaria e situacion aki ‘once and for all’, e comunicado ta finalisa.
Nota di redaccion: E articulo aki ta opinion di e autor y no ta representa opinion di Bon Dia Aruba.
