(AP) — Union Europeo (EU) a impone dialuna sancionnan riba cinco empresarionan conecta cu companianan petrolero estatal di Rusia, Lukoil y Rosneft, y a apunta riba companianan cu ta acusa di evita sancionnan riba petroleo di Rusia door di opera barconan pa Moscu den su flota scondi di tanker di petroleo bieu.
Entrada di petroleo ta un parti clave di economia di Rusia, permitiendo Presidente Vladimir Putin inverti placa den esfuerso di guera contra Ucrania sin empeora inflacion pa hende comun y evitando un collapse di moneda.
Paisnan miembro di EU, particularmente Francia, a priminti di reprimi fuertemente e flota scondi cu ta viola sancionnan, unda expertonan ta calcula cu tin mas cu 400 barco. Nan tambe ta purbando di sigura acuerdonan cu paisnan cu ta carga bandera pa hacie mas facil pa aborda e barconan.
Oficina general di EU a bisa cu e empresarionan “ta controla barconan cu ta transporta petroleo crudo of producto di petroleo, cu ta origina na Rusia of ta ser exporta for di Rusia, scondiendo e origen real di e petroleo, mientras cu nan ta haci practicanan di transporte maritimo iregular y di riesgo halto.”
E sancionnan, cu a ser acorda na un reunion di e 27 pais miembro di EU su ministernan di Asunto Exterior na Bruselas, ta inclui mayormente congelacion di activonan y prohibicion di bishita.
Separadamente, e bloc a impone sancionnan riba miembronan di agencia di inteligencia militar di Rusia, GRU, y un grupo di hacking conoci como Cadet Blizzard, acusando nan di ciberatakenan cu tabata apunta riba Ucrania, EU y aliadonan di NATO cu no a ser nombra.
EU tambe a agrega un cantidad di analista di politica exterior y influencer cu ta acusa di promove propaganda pro-Rusia of teoria di conspiracion na su lista di sancionnan.
