(AFP) – Presidente Colombiano, Gustavo Petro diadomingo a bisa cu a duna ordo na forsanan di seguridad pa ataca e grupo guerrillero ELN, despues cu esaki a emiti un advertencia ominoso pa civilnan evita biaha y keda leu di instalacionnan militar pa tres dia.
ELN – Ehercito di Liberacion Nacional – a convoca un lockdown di 72 ora den areanan cu e ta controla, cuminsando diadomingo mainta, bisando cu lo ta haciendo ehercicionan militar den respuesta na menasa di “intervencion” di presidente Mericano, Donald Trump.
Diadomingo, a duna otro declaracion pa adverti hende na ciudad, incluyendo e capital Bogota y e metropolis Medellin, pa keda leu di instalacionnan militar durante e tres dia di loke ta yamando un “paro arma.”
Presidente Petro, den un post riba X compañando e advertencia di ELN, a bisa: “Esaki no ta menasa contra Trump, e ta menasa contra Colombia.”
“E orden duna na forsanan di seguridad di Colombia ta pa ataca ELN y defende pueblo Colombiano contra cualkier menasa externo,” el a bisa.
Petro a urgi Colombianonan pa sali pa actividadnan di Pasco sin miedo.
“Miedo ta paralisa y nos no ta bay permiti nos mes ta menasa pa podernan stranhero ni pa traficantenan di droga bisti como revolucionario,” Petro a skirbi.
Diadomingo, ehercito a reporta cu a frustra tres intento di ELN pa ehecuta atake cu explosivo riba caminda den Norte de Santander, un departamento na frontera cu Venezuela, y den departamento Cauca.
ELN a keda funda na 1964 y tabata inspira pa revolucion Cubano. Expertonan ta calcula cu e tin presencia den al menos 20 porciento di e mas di 1.100 comunidad Colombiano.
Petro, e prome presidente iskierdista di Colombia y un ex-guerrillero, a busca pa negocia paz cu e rebeldenan despues di asumi su cargo na 2022, pero e negociacion a fracasa. Negociacion a para na januari despues cu ELN a mata mas di 100 persona na un region frontera cu Venezuela.
E guerrillanan, cu ta trafica cocaina, ta kere cu Merca tin plan pa ehecuta operacion militar na Colombia como parti di un plan neocolonial bao Trump.
Similarmente, Petro a denuncia menasa di Trump di potencial accion militar Mericano na Colombia contra traficantenan di droga.
