(AFP) — Un alto funcionario di Merca a bisa diadomingo cu administracion Trump lo traha cu e liderato Venezolano existente, despues di un operacion militar sorprendente cu a captura presidente Nicolas Maduro y a hib’e pa enfrenta huicio na New York.
Declaracionnan di Secretario di Estado Marco Rubio a indica cu Washington no ta busca un cambio di regimen completo y a purba aclara un declaracion anterior di Presidente Donald Trump cu Merca lo “maneha” e pais Latino America di mas o menos 30 miyon habitante.
Rubio a bisa NBC su programa Meet the Press cu Merca ta lucha contra narcotraficantenan, “no un guera contra Venezuela”.
Cayanan di Caracas tabata calma despues di e operacion di diasabra, den cual comando Mericano a drenta Caracas cu helicopter, cu sosten di avionnan di atake y forsanan naval, pa captura Maduro y su casa. Residentenan a para den rij pa cumpra cuminsa den supermercado, y polis cu mascara y arma pisa — visible e dia anterior — a desaparece, segun coresponsalnan di AFP.
Forsa militar Venezolano a anuncia cu nan ta reconoce vice presidente Delcy Rodriguez como presidente interino, y a urgi pueblo pa bolbe na bida normal.
A pesar di e exito inicial di e operacion Mericano, pregunta a sigui surgi tocante strategia di Trump. E Presidente Mericano a indica diasabra cu lo tin un participacion Mericano profundo y duradero, centra riba sigura acceso na e reserva di petroleo comproba mas grandi di mundo.
“Nos lo maneha e pais,” el a bisa, mientras el a insisti cu presencia militar riba tera ainda tabata un posibilidad.
Rubio a haci varios entrevista di television diadomingo mainta pa clarifica cu Washington no ta busca instabilidad. El a bisa cu Merca ta dispuesto pa traha cu Rodriguez y e resto di gabinete di Maduro — semper cu nan cumpli cu exigencianan di Merca. “Nos lo evalua e situacion a base di loke nan ta haci, no loke nan ta bisa publicamente den e periodo intermedio,” el a bisa CBS News.
Enfatisando cu no tin enfoke riba democracia ni deseo pa yuda candidato di oposicion cu sosten di hopi tempo caba pa tuma poder, Rubio a bisa NBC cu ta “prematuro” pa papia di eleccion nobo na Venezuela.
Mientras Trump a menasa cu “un di dos ola” di accion militar si ta necesario, Rubio a bisa cu presion Mericano lo keda riba Venezuela na forma di un embargo di exportacion di petroleo, aplica door di barconan di Marina den Caribe. “Esaki ta permiti nos eherce un presion tremendo riba loke ta pasa despues,” el a bisa CBS.
Lider Democrata den Senado, Chuck Schumer, a bisa ABC News cu Mericanonan a keda “rascando nan cabes cu asombro y miedo”.
“Bon nochi”
Lider Venezolano destitui tabata den un centro di detencion prome cu un audiencia di corte na Manhattan cu ta spera pa dialuna, relaciona cu acusacionnan di narcotrafico.
Cu man na boei y sandalia, Maduro a ser escolta door di agentenan federal pasando pa un facilidad di Administracion di Control di Droga di Merca (DEA) na Manhattan, segun un video publica riba social media door di e Cas Blanco. Mas tempran, a ser fotografia riba un barco di Marina Mericano cu benda riba wowo, man esposa, y protector di orea cu ta elimina zonido. Maduro, cu ta describi su mes como socialista, a lidera Venezuela cu man duro pa mas cu un decada a traves di un serie di eleccionnan cu ampliamente ta ser considera manipula. El a yega na poder despues di morto di su mentor carismatico, Hugo Chavez.
Ora noticia di su captura a plama, Venezolanonan den exilio a move bandera y celebra den plaza desde Madrid te Santiago. Mas o menos ocho miyon Venezolano a huy for di pobresa profundo y represion politico di nan patria. Tabata tin alegria tambe den Caracas.
Reserva masivo di petroleo
Administracion Trump ta enfrenta acusacionnan cu a actua ilegalmente den un campaña di presion cu a cuminsa cu explota barconan chikito acusa di transporta droga cerca di Venezuela y a culmina cu e operacion contra Maduro diasabra, Lider Democrata den Camara di Representantenan, Hakeem Jeffries, a bisa cu e operacion tabata un acto di guera cu mester a tabata autorisa door di Congreso.
Trump a presenta e atake riba Venezuela esencialmente como un operacion di polis contra un presunto cabes di narcotrafico.
Sinembargo, el a laga cla cu e meta mas amplio ta pa sigura acceso na e enorme reserva di petroleo di Venezuela y pa tene rivalnan di Merca for di e region.
Trump a priminti inversionnan masivo di Merca den industria di petroleo, cu a collapse despues di añanan di sancion internacional y falta di inversion.
Venezuela “no tin capacidad pa reactiva e industria ey atrobe. Nan mester inversion di companianan priva cu solamente lo inverti bao cierto garantia y condicion,” Rubio a bisa CBS.
