Corte den Prome Instancia a tene ayera e prome audiencia di aña 2026, dedica completamente na casonan relaciona cu stuur bao influencia di alcohol. E audiencia aki a marca un momento importante den e continuacion di e lucha contra alcohol den trafico na Aruba, un problema cu ta sigui genera preocupacion serio pa autoridad y den comunidad. Un total di 30 sospechoso a ser cita pa presenta dilanti di hues riba acusacion di core bao influencia di alcohol.
Di 30 sospechoso cu a ser cita pa presenta dilanti hues, tres tabata hende muhe, mientras cu e resto tabata hende homber. Pa un algun di e sospechosonan, esaki no ta prome biaha cu nan a presenta den corte pa e mesun delito, loke ta nifica cu esaki ta bira di dos biaha cu nan ta ser condena pa stuur bao influencia di alcohol. Ripiticion di mesun delito ta un hunga un rol den evaluacion di e casonan, pasobra ta mustra cu sancionnan anterior no a logra cambia e comportamento di e persona.
Durante e audiencia, hues a mustra hopi consideracion pa e situacion personal di cada sospechoso. Corte a evalua cuidadosamente circunstancianan individual, manera situacion familiar, estado di empleo, responsabilidad financiero, actitud durante e proceso y e manera cu e infraccion a ser cometi. Tumando e factornan aki na cuenta, tanto fiscal como hues a busca un balansa entre castigo y proporcionalidad, cu enfasis riba proteccion di sociedad y preveni ripiticion di delito. Na momento di duna e veredicto, e hues a tuma tur e factornan relevante na cuenta.
Algun di e sospechosonan a haci uso di nan derecho constitucional pa presenta cu asistencia di un abogado, pero gran mayoria a presenta nan so y acepta nan culpabilidad y cualkier castigo cu hues a impone.
Durante cada caso, fiscal di Ministerio Publico a pone enfasis explicito riba e consecuencianan cu stuur bao influencia di alcohol por tin. Durante e audiencia, fiscal a declara cu core burachi ta representa un peliger serio, no solamente pa e chauffeur cu ta tuma e decision iresponsable di subi tras di stuur, pero tambe pa su famia y pa tur otro persona y famia cu ta riba caminda na e momento ey. Segun fiscal, un solo decision cu ta tuma den un momento di falta di huicio por cambia bida di hopi hende pa semper. Ministerio Publico a subraya cu alcohol ta afecta reaccion, percepcion y control di vehiculo, loke ta aumenta considerablemente e riesgo di accidente grave.
E audiencia aki ta sigui e liña cu Ministerio Publico a pone durante aña 2025, despues cu Minister di Husticia a asigna recursonan adicional pa combati alcohol den trafico. Danki na e inversion aki, Ministerio Publico a logra cita mas di 500 sospechoso dilanti di hues pa stuur bao influencia durante 2025, eliminando completamente e atraso cu tabata existi anteriormente den e tramitacion di e tipo di casonan aki. Segun e autoridadnan, rapidez den maneho di casonan ta esencial pa manda un mensahe cla na sociedad.
Pa loke ta trata castigo cu ta impone na cada sospechoso, esaki ta bay segun e Richtlijnen Verkeershandhaving (Guia di aplicacion di trafico) di Ministerio Publico. E castigonan pa stuur bao influencia di alcohol ta varia segun e nivel di alcohol cu ta ser midi ora di supla. Mas halto e nivel aki ta, mas halto e castigo.
Segun Articulo 5 di ley, stuur bao influencia di alcohol por resulta den un castigo maximo di dos aña di prison of un boet di te Afl. 25.000. E richtlijnen di Ministerio Publico ta dividi e infraccion den diferente nivel basa riba e contenido di alcohol den rosea. Na e nivel mas abao, cu un lectura di contenido di alcohol den rosea entre 220 y 350, e sancion ta un transaccion di Afl. 350, mientras cu e demanda na audiencia ta Afl. 400. Ora e contenido di alcohol den rosea ta subi na entre 351 y 435, e transaccion ta Afl. 500 y e demanda na audiencia ta Afl. 600. Pa nivel entre 436 y 500, e transaccion ta Afl. 650 y e demanda na audiencia ta Afl. 750. Den e siguiente categoria, cu un contenido di alcohol den rosea entre 501 y 570, no tin transaccion, y e demanda na audiencia ta boet Afl. 850.
Pa nivelnan mas halto di contenido di alcohol den rosea, e sancionnan ta bira mas severo y ta inclui medida adicional. Cu un contenido di alcohol den rosea entre 571 y 715, e castigo ta Afl. 950 mas cu un prohibicion di stuur di cuater luna. Si e nivel di contenido di alcohol den rosea ta entre 716 y 785, e boet ta Afl. 1.000 y un prohibicion di stuur di seis luna. Pa nivel entre 786 y 865, e boet ta Afl. 1.100 y e prohibicion di stuur ta seis luna. Ora e nivel di contenido di alcohol den rosea ta entre 866 y 945, e boet ta Afl. 1.250 y e prohibicion di stuur ta ocho luna. Pa lectura entre 946 y 1.090, e sancion ta Afl. 1.400, dos siman di prison y un prohibicion di stuur di nuebe luna. Den e categoria mas severo, cu un contenido di alcohol den rosea di 1.091 of mas, e castigo ta inclui cuater siman di prison y un prohibicion di stuur di 12 luna, loke ta refleha e peliger extremo cu e nivel di intoxicacion aki ta representa pa seguridad riba caminda.
E richtlijnen tambe ta tene na cuenta circunstancianan agravante. Chauffeurnan di vehiculonan comercial, manera bus of truck, ta ser trata mas severamente, aunke e nivel di alcohol midi ta mas abao. Si un chauffeur ta causa un accidente mientras cu ta stuur bao influencia di alcohol, sea cu daño material of cu persona herida, e caso lo ser coloca den un categoria mas severo. Negacion di colabora cu Polis pa duna un prueba di supla ta ser considera un factor agravante cu ta hiba na castigo mas duro.
Ademas di e infraccionnan relaciona cu alcohol, e ley di trafico di Aruba ta trata core sin un rijbewijs valido como un delito serio. Core sin rijbewijs valido por resulta den un boet di alrededor di Afl. 650 y detencion inmediato. Den caso mas serio, e castigo maximo por yega te dos aña di prison of un boet di te Afl. 25.000. Algun di e sospechosonan cu a presenta dilanti di corte a ser condena tambe pa core sin rijbewijs valido, loke a hunga un rol den e evaluacion di nan caso.
Causa un accidente den trafico ta ser trata cu hopi seriedad, specialmente ora cu alcohol ta involucra. Ministerio Publico tin e posibilidad di pidi castigonan mas duro ora un infraccion a resulta den herida corporal of daño material significativo.
Mayoria di e castigonan cu a ser impone den e prome zitting di 2026 a encera pago di boet, suspension di rijbewijs pa un periodo determina y un periodo di prueba. Den varios caso, hues a impone tambe castigo di prison condicional, cu e condicion cu e infractor no por comete ningun infraccion durante e periodo di prueba. Segun Ministerio Publico, e combinacion di castigo aki ta enfoca riba coreccion di comportamento y prevencion di reincidencia.
Pa reforsa e eficiencia di e sistema, Ministerio Publico ta sigui aplica e procedemento di TOM-MBI (Cita cu Fiscal). Den e procedemento aki, e fiscal mes ta trata e caso sin cu e persona mester presenta inmediatamente dilanti di hues. Durante aña 2025, alrededor di 200 persona a ser convoca pa un TOM-MBI despues di contacto cu Polis pa stuur bao influencia. Mas o menos un cuarta parti di nan no a presenta, loke a resulta cu nan a ser cita inmediatamente pa presenta dilanti di corte.
E intensificacion di e aplicacion a resulta tambe den un aumento significativo den cobro di boetnan. Durante 2025, mas di Afl. 5.5 miyon a ser recauda na boetnan relaciona cu alcohol den trafico. Segun autoridadnan, esaki ta un consecuencia di un politica firme cu ta mustra cu infraccionnan no ta wordo tolera y cu tin consecuencia real.
Ministerio Publico ta sigui manda un mensahe cla na comunidad: alcohol y trafico no ta bay hunto. Infraccionnan lo ser ataca rapidamente y visiblemente, cu consecuencia claramente perceptibel. Cu e prome audiencia di 2026, Corte den Prome Instancia y Ministerio Publico ta confirma cu nan prioridad principal ta aumenta seguridad riba caminda y proteha bida di tur ciudadano y bishitante di Aruba.
