Teniendo na consideracion cu e sentimento di pueblo ta importante pa scucha y evalua topiconan mas di cerca, Parlamentario Jennifer Arends-Reyes di fraccion di AVP a lanta preocupacion importante riba tema di vuurwerk of klapchi, cu specialmente durante temporada di fin di aña por ser experiencia como molester pa hende y animal, y por representa un riesgo pa nan salud y seguridad.
Sra. Arends-Reyes a presenta un serie di pregunta directamente na e minister competente, esta titular di Husticia, drs. Arthur Dowers (AVP), pa haya claridad riba e regulacion actual y e posibel ahuste cu por haci pa controla uzo y importacion di vuurwerk, particularmente e vuurwerknan mas fuerte cu ta pasa e nivel permiti di decibelnan den area residencial.
Entre e preguntanan importante cu Parlamentario Arends-Reyes a haci ta:
1. Ki ta e norma di decibel cu actualmente ta permiti pa vuurwerk importa na Aruba?
2. Con ta controla e importacion di vuurwerk cu sobrepasa e normanan di zonido?
3. Ta existi un sistema pa certifica of inspecciona vuurwerk prome cu yega nos isla?
4. Ki medida ta tuma pa proteha personanan vulnerabel, manera mucha chikito, hende cu problema di salud y animalnan domestico?
5. Tin un plan pa limita uso di vuurwerk fuerte den zona residencial?
6. Lo por papia cu e importadornan pa wak con por promove mas ‘siervuurwerk’ en bes di vuurwerk cu zonido duro?
E parlamentario ta insisti cu nos mester busca un balans entre tradicion, siguridad y bienestar. “Vuurwerk ta un parti di nos cultura di celebracion, pero no por bay a costo di bienestar di nos comunidad. Nos mester proteha pueblo, ambiente y animalnan,” segun Arends-Reyes.
E parlamentario ta spera cu ministerio di husticia lo tuma e preocupacionnan aki na serio y presenta un plan concreto pa trata e situacion proactivamente, na tempo pa e siguiente pedido, carga y temporada, specialmente mirando e sentimento local fuerte den e ultimo añanan aki.
