(AFP) – Alcalde di Londres, Sadiq Khan, diabierna a uni su voz na e coro di advertencianan tocante e impacto di inteligencia artificial riba empleo, bisando cu e capital di Reino Uni ta core riesgo di drenta den “un era di desempleo masivo”.
E comentario di e alcalde Laborista lo ser inclui den un discurso na Londres diabierna atardi, unda e lo delinea tanto e oportunidadnan como e riesgonan cu AI ta presenta.
Cu e capital di Reino Uni hogar pa un gran cantidad di empleo den sector di finanzas, servicio profesional y e sector creativo, Londres ta “na e punto mas skerpi di cambio”, Khan lo bisa segun extractonan di e discurso manda pa medio.
Khan lo señala tambe “beneficionan potencial enorme” di e tecnologia si ser usa di manera responsabel, ora cu e presenta un revision riba su impacto den mercado laboral di e capital, hunto cu entrenamento gratis den AI pa miyones di hende na Londres.
E lo haci yamado pa accion rapido pa capitalisa riba e beneficionan e y prome cu e tecnologia “bira un arma di destruccion masivo di empleo”.
E debate ta sigui riba e topico si AI lo destrui empleo, cu respuestanan ainda no cla.
Oficina di prome minister Keir Starmer a bisa diabierna cu “AI lo remodela e mundo di trabao”.
Un vocero di Downing Street a agrega: “Cierto empleo lo keda…mas impacta cu otro, pero e rol nobo y oportunidadnan cu e lo crea ta algo cu nos lo acepta”.
Nacionnan Uni recientemente a adverti cu AI y automatisacion por empeora e desafio global di mercado laboral, particularmente pa hobennan educa den paisnan mas rico cu ta busca nan prome empleo di nivel halto.
Mayoria di pronosticonan ta mira un cambio gradual.
Firma di consulta gerencial McKinsey a pronostica recientemente cu 30 porciento di empleo na Merca por ser automatisa pa 2030, cu 60 porciento altera den un manera significativo.
Analistanan di firma di investigacion Mericano Gartner a sugeri cu AI lo crea mas empleo cu loke e lo elimina pa 2027.
