(Infobae) – E percepcion di impotencia ta creciendo entre e detenidonan, mientras e instabilidad di sistema hudicial ta erosiona e confiansa den un defensa husto.

Coronel retira Carlos Giovanni Guerrero a papia riba su situacion y di otro mercenario Colombiano tocante e proceso hudicial cu e ta enfrenta, hunto cu otro ciudadano Colombiano acusa di e asesinato di ex-presidente di Haiti, Jovenel Moïse.

Durante un entrevista den programa Velez en la Mañana, presenta pa Luis Carlos Velez, Guerrero a denuncia iregularidadnan hudicial na Haiti despues di e asesinato cu a pasa na 2021 na Port-au-Prince. El a señala cu e instabilidad den husticia Haitiano ta sigui afecta tanto su situacion como esun di otro Colombianonan acusa na Haiti.

“Durante e cuatro y mita aña aki, nos a tabatin seis hues. Algun a renuncia pa via di menasa, otro pa via di corupcion,” el a declara den e programa Velez. El a splica cu e rotacion constante di funcionarionan a stroba e desaroyo di proceso y e acceso na garantia pa e acusadonan.

Guerrero a informa cu e demandanan a presenta un derecho di peticion buscando un respuesta hudicial cla. Sinembargo, el a declara cu ora nan a ser referi na corte, “no tin probabilidad di inocencia, ni debido proceso. E apelacion no a ser acepta y, den corte, nos ta constantemente ser señala como si nos tabata e culpabelnan…na ningun momento a existi presuncion di inocencia.” E ex-militar a mantene cu e autoridadnan Haitiano no a respeta e principio fundamental di proceso penal.

“Nan ta trata nos comosifuera nos tabata culpabel caba,” e coronel retira a conclui den dialogo cu Velez. Cuatro y mita aña despues di e asesinato di Moïse, Guerrero ta percibi cu e falta di garantia y e condicionnan di proceso hudicial a deteriora e confiansa den logra un defensa efectivo dilanti corte.

Guerrero a sigura cu tur cos a cuminsa cu un promesa di trabao legitimo: “Mi a bin aki cu un soño, cu speransa, cu un ilusion: pa traha, pa haci loke mi ta haci miho, pa ta soldad, pa brinda seguridad, pa brinda mi servicio. Y mi a keda involucra den un cos malo,” el a declara. Segun su relato, e y su compañeronan a yega Haiti pa brinda seguridad pa un proyecto hidroelectrico y, entre tanto, protege un candidato presidencial. “Nos no tabatin ni un intencion di bin herida niun hende, y esaki tampoco tabata necesario,” el a insisti.

“Nos ta separa for di nos famianan durante cuatro y mita aña, sin huicio, sin evidencia, pagando un condena anticipa cu ta prohibi den cualkier estado social di derecho,” Guerrero a denuncia for di prison.

Su situacion di salubridad ta desespera: “Actualmente mi tin tuberculosis, producto di demasiado hende unda mi ta, y mi no a haya tratamento adecua. Mi tin compañeronan cu hipertension cu no ta ricibi nan medicamento na tempo, y sin tratamento dental. Cinco aña sin mira un dentista,” el a conta.

E anochi di e crimen, Guerrero a mantene cu nan a actua bao di orden y den coordinacion cu autoridadnan local y stranhero.

“Nan a recoge nos y a bisa nos cu nos mester brinda asistencia di seguridad na Polis Nacional Haitiano. Mi no a mira ningun problema. Agentenan di FBI tabata presente. E Polis tabata den uniform, cu nan truck, y nos a bay na e luga…ni un momento mi a imagina cu e luga ey tabata e cas presidencial,” el a relata. Su version ta apunta na un atake: “E atake a cuminsa, un atake sin misericordia, cu municion calibre 50, anti-tank, granada di man, granada di gas, algo enorme, algo bestial. Nunca den pasado no a ataca mi cu e nivel di forsa ey.”

Alegacionnan di tortura y trato inhumano ta ripiti. “Nan a haci nos firma documento na Creole, un idioma cu nos no ta papia ni compronde, sin presencia di un abogado…Nan a mustra mi cara cu golpinan y menasa. Mi tin compañeronan cu a ser kima cu acido,hinca cu cuchiu, colga riba un bara y golpia, otronan cu a haya kima na nan testiculo,” Guerrero a relata. E tambe a menciona e falta di accion di autoridadnan hudicial Haitiano: “Aki esun cu tin palabra ta e Polis, pasobra nan tin e arma.”

E sintimento di ta bandona ta pisa riba e detenido. Guerrero tabata enfatico: “Nos mester mas esfuerso diplomatico…un acercamento entre Gobierno Colombiano y Haiti pa saca nos for di e luga aki. A pasa cuatro y mita aña sin debido proceso, unda tur nos derecho fundamental y derecho procesal a ser viola.”

E peticion final ta un yamado na solidaridad nacional: “Nos tambe ta Colombiano, compatriotanan di presidente Petro, di henter e pueblo di Colombia. Por fabor, no lubida riba nos. Si tabatin evidencia, si nos tabata culpabel, nos lo a keda condena caba.”