Tumba a yega e region den siglo 17 pa medio di Africanonan sclavisa. E curason di e musica tabata basa riba e patronchinan di tambor poco usual di e ritmo tambor. Hopi hende ta considera tumba como un estilo di musica nativo y indigena di Curaçao y Bonaire, islanan bisiña di Aruba.

Awendia, otro instrumentonan y influencia Latino ta hunga un rol den musica di tumba, y riba e islanan ABC ta canta e canticanan mayormente den e idioma local Papiamento. Diferente cu calypso y roadmarch, un cantica di tumba ta toca henter aña, pero debi na su popularidad y su raiz den Antias Hulandes, canticanan di tumba ta wordo toca specialmente hopi durante Carnaval di Aruba.

Tumba durante Carnaval hopi biaha ta inclui un tiki satira politico y social, recordando e estilo di calypso, pero semper cu un ritmo bailable. Ritmo di tumba di Aruba ta mas melodico, y pa Carnaval e letranan ta dedica na celebracion.

E prome Concurso di Tumba a tuma lugar na 1971 pa Carnaval 17, caminda Casin Giel a ser corona como e prome Rey di Tumba di Carnaval di Aruba. Hopi hende ta recorda Juancho Kock famosamente, y hasta despues di su retiro el a keda semper un idolo. Otro musiconan popular riba e tarima ta Edwin Zichem y Robert Jean d’Or, sin lubida Ito Dania y Reginald “Papito” Rafael. Papito na aña 2000 a gana su di cinco titulo cu su tumba “Den meimei”, y desde e tempo ey el ta empata cu Robert Jean d’Or den cantidad di titulonan gana.

E siguiente generacionnan ta inclui Rodrick Franken, ken te na 2020 tin siete titulo den su nomber: tres den categoria di Mucha, un den Hubenil y tres den Grand Tumba Festival. Rodrick Franken ta e unico cantante den historia cu a gana un titulo den tur tres categoria di edad. Un contendiente fuerte ta Jerrino Ridderstap. Jerrino, cu cuatro titulo den su nomber, ta cuatro-biaha Rey di Tumba di Carnaval di Aruba, mientras cu Rodrick ta tres-biaha ganador di Grand Tumba Contest di Aruba.

Tumba “pabao di brug”

Maske casi no ta tende tumba durante e paradanan, e ta un parti di Carnaval mesun importante manera roadmarch y calypso. Canticanan di tumba di Carnaval ta ser toca na tur lugar durante henter e temporada di Carnaval, y e Concurso di Tumba ta crea un emocion special, specialmente pabao di brug.

Mientras cu calypso y roadmarch ta mas claramente liga cu San Nicolas, unda e concurso ta tuma luga pariba di brug, tumba ta mas liga cu pabao di brug y Oranjestad, caminda e festival a tuma lugar pa prome biaha na 1971.

San Nicolas tambe ta haya tumba
 Sinembargo, na 2019 pa Carnaval 65, e Concurso di Tumba a tuma luga pa prome biaha na Carnival Village na San Nicolas. Carnival Village a ser completa na 2014, y e prome actividad di Carnaval a tuma luga ey dia 11 di november 2014, cu nomber Legends Award, organisa pa S.M.A.C. Desde e tempo ey, e comentarionan ta cu no ta pa nada Aruba tin un Carnival Village, y cu tur actividad di Carnaval mester tuma luga ey.

Fuente: Aruba’s Carnival History di Friedrich A. Van der Hans