Diasabra anochi a tuma luga e Festival di Tumba na Aruba Carnival & Entertainment Village na San Nicolas, unda pa prome biaha den historia di e festival, e corona a bay pa tata y yiu, marcando un legado pa e famia Franken.

E festival a cuminsa diabierna anochi pa participantenan infantil y hubenil. Durante e anochi colorido, a mira tres diferente presentacion, cuminsando cu Jaymerson Kelly cu su cancion “Oloshi Cana Pami”, cual a resalta di ta un faborito entre e multitud presente. Alyna Henriquez cu su cancion “Nos Por” tambe a causa un temblor den e competencia, y Hailey Cataleya Koolman a duna un presentacion sublime cu “Ban Carg’e.” A pesar di ta un categoria hopi chikito, publico a disfruta masha di e ‘line up’.

Den categoria Infantil, a corona Jaymerson Kelly como Rey di Tumba Infantil 2026. Hailey Koolman tabata finalista.

Tambe a tuma otro puntuacion den e categoria aki, di cual ta lo siguiente:

Mas ambiente infantil: Jaymerson Kelly
Rookie di Aña: Jaymerson Kelly
Best costume: Geovon Machado
Mas popular: Haylee Koolman

Tambe tabatin e categoria hubenil den cual varios presentacion a gara atencion di publico. Participantenan den e categoria aki ta inclui Caylee Pietersz cu su cancion ‘Macutu Magico’; Jayvion Machado cu ‘Amor’; Geovon Maduro cu ‘Drecha mi pa mi bay’; Reanne Ras cu ‘Mir’e Lastra Bin’; Ayshelyne Trimon cu ‘Lastra Lastra’; Melody Franken cu ‘Ban cu mi’ y Stephanie Quandt cu su cancion ‘Ey mi ta bay’.

Sigur participantenan fuerte cu tremendo presentacion. Den e categoria aki a corona Melody Franken como Reina di Tumba Hubenil 2026. Esaki ta Melody su di dos titulo; e tambe tabata Reina di Tumba Hubenil 2025.

Primera y segunda finalista a keda na Jaylon Machado y Stephanie Quandt, respectivamente.

Melody tambe a destaca den otro puntuacionnan, entre otro Mas Ambiente y Mas Popular. Best Costume y Rookie di Aña a bay pa Jaylon Machado.

Despues di a clausura e festival pa e categorianan mas jong, a sigui cu esun di adulto, cual a mira seis banda cu nan cantante competiendo pa e corona di Tumba.

Manera tur categoria, miembronan di hurado a tuma tempo pa discuti y conta puntonan di e participantenan. Aki a reporta cu e conteo a tarda basta rato. Na final, a presenta e resultadonan como lo siguiente:

Best costume: Jurienne Angela

Miho composicion: Decreto oficial (Rocco Franken)

Mas popular: Edgard ‘Poppy’ Kock

Rookie di Aña: Chantal Quandt

E corona di Rey di Tumba a bay pa Roderick ‘Rocco’ Franken, representando su banda Buleria cu nan cancion ‘Decreto Oficial’. Cu esaki, ambos Rocco y Melody—tata y yiu—a bira e prome famia ganador di Festival di Tumba.

Ganador di Tumba Loco a bay pa Gino Petrocchi cu ‘Batie p’e sali’

Finalistanan tabata Chantal Quandt cu ‘Aruba alerta’ como segunda finalista y Jorienne Angela cu ‘Tene, wante den gloria’ como prome finalista.

Pabien na tur participante y ganador pa nan prestacion sumamente asombroso!