Shoco Wellness ta empodera individuonan pa transiciona di e zonanan di angustia pa logra resiliencia y finalmente florece tanto academicamente y den bida personal. Asina Dr. Juliet Chiew, coordinador di e proyecto a splica Bon Dia Aruba.

Manera a splica, Shoco Wellness ta un proyecto financia pa Ministerio di Enseñansa, Cultura y Ciencia di

Hulanda dirigi pa sostene salud mental di studiantenan di Universidad di Aruba, Instituto Pedagogico di Aruba, y Enseñansa Profesional Intermedio. E ta tabata un iniciativa cu Dr. Chiew a tuma basa riba necesidad cu mentornan y docentenan a nota na Universidad di Aruba.

Juliet Chiew ta bisa di ta hopi gradicido mes na tur e psicologonan cu ta den e red di Shoco Wellness. “Nan ta fabuloso, ami ta traha cu nan. Pero nan ta realmente brinda un sosten na hende cu ta tremendo. Nos ta yegando na un punto cu tin un reconocimento mas amplio cu salud mental ta hopi importante.

Y mirando cu e necesidad ta grandi Shoco Wellness ta ofrece tayer y sesionnan pa mas hende por participa aden. Dor cu Shoco Wellness a cuminza den e prome semester di scol, prome cu Covid, el a forsa pa e proyecto sigui e siguiente sesion via internet. “Nos por a graba nan y nan ta riba nos website.” Esaki ta permiti cu cada persona cu ta sinti un necesidad pa sosten psicologico por bay riba e website y sigui e sesionnan aki. “Nos tin un hala di tayer. Nos a cuminza haya peticion pa sesion personal y a percura pa esaki sosode online tambe.”

Cu tempo a bin mas peticion pa haya sesion individual, pero pa determina si berdad e sosten psicologico tin impacto, mester haci un analisis. Mesun cos ta conta pa e staff di Universidad di Aruba.

Chiew a splica cu tin un palabracion cu Respaldo unda por tuma un cantidad limita di studiante di Shoco Wellness. Normalmente, ta un dokter mester referi pa Respaldo, pero mirando cu aki ta trata di personanan cu ya ta bou tratamento di un psicologo, a bay de acuerdo pa elimina e paso adicional di dokter. Sinembargo ta un cantidad limita. “Nan ta tuma e diagnostico di e counselor. E proyecto piloto aki a cuminza na Augustus 2025, pero ta unicamente casonan di tratamento psikiatrico y specialisacion cu e psicologonan di Shoco Wellness no por trata.”

Esaki ta nifica cu Shoco Wellness awor ta brinda servicio den tur cuater zona di estado mental. Y asina ta organisa eventonan cu ta genera bienestar, manera caminata, ‘mindfullness.’ Pa e zona geel tin sesionnan di prevencion, conscientisacion, ‘early intervention,’ pa medio di e tayernan cu psicologonan ta duna. Pa e zona oranje, tin e psicologonan, cu ta inclui profesionalnan di Costa Rica. “Pues e sesionnan por bay den Papiamento, Hulandes, Ingles y Spaño. Nos tin grupo grandi di studiantenan y hasta staff cu ta di habla Spaño.” Y pa e zona cora, tin e colaboracion cu Respaldo. “Mi a papia cu stichting Hunto tambe pa nos yega na un colaboracion, pero nan tambe ta hopi yen. Stichting Hunto a cuminza sin lista di espera y awor nan tin uno.”

Esaki ta ilustra si e necesidad grandi cu tin pa sosten psicologico na Aruba y cu comunidad ta pidi e ayudo.

Tambe Shoco Wellness a acerca Centro Multi Disciplinario, pa brinda cuido na docentenan, cu pa ley ta parti di e responsabilidad di e centro. “Den Shoco Wellness, nos tin disponible tur servicio cu ta disponible.”

Shoco Wellness ta un proyecto, y no ta un organisacion. E ta nifica cu e tin un comienzo y un fin. Inicialmente a haya fondo pa cuater aña despues cu Chiew a traha un proposicion di proyecto. “E ta garantisa basa riba e Vierlanden Overleg di e cuater Ministernan di Enseñansa di Reino. Un di e temanan tabata e structura di cuido pa educacion.”

Universidad di Aruba a puntra Chiew pa prepara e proyecto. Inicialmente e suma tabata 25 mil, y poco poco Dr. Chiew a logra demostra e balor di e proyecto. Asina Ministerio di OCW a hisa e suma ta na 270 mil cu hasta mas cu e maximo inicial di 250 mil. “Mi a siña rek e suma manera kakiña, pasobra mi a logra hinca EPI den e programa. EPI no ta enseñansa superior (red. e proyecto ta cay bou di e capa di cuido pa enseñansa superior). Ora mi a haci un presentacion na EPI na 2023, e Director e tempo ey, Ryan Maduro a pidi pa ayudo pa e zonanan oranje y cora. EPI tabatin 30 studiante cu no por a bay ningun caminda.” Shoco Wellness a haya aprobacion di e comite cu ta supervisa e trabou, y a aparta fondo pa psicologonan den e red trata tur e studiantenan aki. “Ora esey a bay bon, nos a hinca EPI den e proyecto y a pidi mas placa. Mi a hustifica e proposicion dor di argumenta cu studiantenan di EPI ta na caminda pa bay enseñansa superior y como tal, e sesionnan ta preventivo.”

E fin di Shoco Wellness pa e periodo aki ta fin di 2027, cu ta nifica cu e trabou grandi di Juliet Chiew ta pa busca placa pa e proyecto por continua te por lo menos 2031. “Esey ta nifica cu e estudio di impacto di Shoco Wellness ta hopi importante.”

Banda di esey tin intencion pa duna un man na studiantenan cu ta bay Hulanda haya e preparacion mental pa asina nan por confronta e retonan di biba y studia na Hulanda. E iniciativa aki ainda no ta completamente defini, pero tin motibo pakico ta considera esaki importante.