Minister di Finanzas, Asunto Economico y Sector Primario ta informa cu riba 13 di januari, Conseho di Minister a aproba e digitalisacion di preparacion y cambio di e presupuesto di Pais Aruba.
E digitalisacion aki ta parti di Landspakket Thema Financieel Beheer. Cu financiamento di Hulanda hunto lo implementa un sistema di ICT cu por duna sosten na con Pais Aruba ta prepara y cambia su presupuesto. E manera nobo aki di traha lo facilita cu fondonan publico, metanan di maneho y ehecucion di esaki ta miho alinea.
Cu aprobacion di Conseho di Minister di Gabinete AVP-FUTURO e siguiente paso ta manda e ‘plan van aanpak” pa TWO-Nederland y pidi formalmente e subsidio di 174.100 euro pa cubri e gastonan den 2026. Despues Departamento di Finanzas lo inicia e destaho publico. Desde 2027 gobierno mes lo aloca e gastonan di licencia riba presupuesto di Pais Aruba.
Ta premira cu den e prome mitar di 2026 lo implementa y duna training na e personal di Departamento di Finanzas y usa parcialmente esaki pa preparacion di e presupuesto 2026. Den e segundo mitar ta premira cu lo sigui cu e desaroyo completo di e sistema y facilita e uzo completo pa tur ministerionan y departamentonan di gobierno den preparacion di e presupuesto 2028.
Minister Geoffrey Wever ta gradici Conseho di Minister di Gabinete AVP-FUTURO y Departamento di Finanzas pa hunto cu Hulanda traha riba mehoracion di e proceso di preparacion y cambio di presupuesto di Pais Aruba. Cooperacion estrecho entre tur ministernan, entre departamentonan y cu Hulanda lo mehora e proceso presupuestario na bienestar di desaroyo di Aruba.
Den cuadro di transparencia y duna informacion, minister Geoffrey Wever a pidi Parlamento pa un Openbare Bijeenkomst pa asina informa debidamente tur parlamentario riba ehecucion di proyectonan pa fortifica e ciclo presupuestario di Aruba.
