Sector di construccion na Aruba a mustra un aumento den eficiencia y aprobacion di permiso durante 2025, compara cu e aña anterior. Cifranan publica pa Departamento di Obra Publico (DOW) ta indica cu, aunke e cantidad di solicitud a crece moderadamente, e cantidad di permiso aproba y busca a subi significativamente, mientras cu rechaso a bira menos.
Durante aña 2024, DOW a ricibi 991 solicitud pa permiso di construccion. Den e mesun periodo, a aproba 720 permiso, a rechasa 382 solicitud y 715 permiso a ser recogi pa solicitantenan. E cifranan aki refleha un aña activo, pero tambe un nivel halto di rechaso, principalmente pa falta di documentacion of incumplimento cu regla tecnico y legal.
Pa 2025, e panorama a cambia notablemente. Entre januari y december 2025, DOW a registra 1.048 solicitud pa permiso di construccion, loke ta representa un aumento di mas o menos 6% compara cu aña 2024. Sinembargo, e diferencia mas grandi ta bini den e fase di aprobacion. Den total, 945 permiso a ser otorga, un aumento substancial di mas cu 30% compara cu e aña anterior. Na mesun momento, e cantidad di solicitud rechasa a baha for di 382 pa 268.
E cantidad di permiso efectivamente busca pa solicitantenan tambe a mira un aumento fuerte. Mientras cu 715 permiso a ser busca na 2024, pa 2025 e cifra aki a subi na 906. Esaki ta indica cu mas solicitante a logra completa e proceso y pone nan proyecto di construccion den marcha.
E mehoracion aki por indica un proceso mas eficiente den evaluacion di solicitud, un miho preparacion di aplicacion di parti di ciudadano y contratista, y posiblemente mas claridad den rekisito imponi pa DOW.
E comparacion entre 2024 y 2025 ta revela un sector di construccion cu no solamente ta crece den demanda, pero tambe ta opera cu menos friccion administrativo. Cu menos rechaso y mas permiso aproba y busca, e cifranan di aña 2025 ta apunta riba un sistema cu ta funciona mas fluido, beneficiando tanto propietario di tereno como inversionistanan y e economia local en general.
DOW ta sigui insisti riba importancia di solicita y obtene un permiso di construccion prome cu cuminsa cualkier obra. Segun e departamento, cumplimento cu ley y norma di construccion ta esencial pa seguridad publico, planificacion urbano responsable y desaroyo sostenible di Aruba.
