(Infobae) – Sergei Melik-Bagdasarov, embahador Ruso na Caracas, a declara cu agentenan di siguridad Venezolano a actua cu “negligencia” y a facilita e operacion militar di Merca cu a resulta den e aresto di e narco-dictador.

E embahador di Rusia na Venezuela, Sergei Melik-Bagdasarov, a sostene cu e captura di e narco-dictador Nicolas Maduro pa forsanan di Merca a bira posibel pa via di fayo interno, negligencia y colaboracion di oficialnan Venezolano cu servicionan di inteligencia di Merca.

A haci e declaracionnan den un entrevista transmiti riba e canal di television Rossiya-24, caminda e diplomatico a describi un scenario di deslealtad previo na e operacion militar cu a culmina dia 3 di januari cu e aresto di e ex-lider chavista y su esposa, Cilia Flores.

Segun e embahador, e problemanan no tabata limita solamente na e evento di e dia ey, sino cu nan ta remonta na un periodo anterior.

E diplomatico Ruso a sigura cu Moscu ta conoce e nombernan di esnan cu “sistematicamente a traha pa inteligencia di Merca” y cu a sali for di Venezuela despues di e operacion.

E operacion di Merca, yama “Absolute Resolution”, a inclui atake contra obhetivo militar na Caracas y otro regionnan di pais. E mesun dia ey, forsanan special di Merca a captura Maduro y su esposa y a saca nan for di Venezuela. Mas despues, tur dos a aparece dilanti di un corte federal na New York, caminda nan ta enfrentando acusacionnan liga cu narcotrafico.

For di Washington, e accion a ser presenta como un intervencion cu tabata apunta riba desmantela un structura criminal na poder y restaura orden institucional. Despues di e captura, Delcy Rodriguez a tuma e mando como cabes di e regimen chavista.

Poco dia despues di e operacion, Rodriguez a nombra 12 oficial halto na comando regional pa dirigi diferente zona di defensa operacional (ZODI) den varios estado di pais.

Ademas, el a nombra e ex-hefe di servicio di inteligencia (Sebin) como e comandante nobo di su guardia presidencial y como director di e agencia di contra-inteligencia militar (DGCIM). Un documento cu copia di e nombramentonan, firma pa e minister di Defensa, general Vladimir Padrino Lopez, a circula den medio local.

E hefe di e Comando Operacional Strategico, general Domingo Hernandez Lares, a felicita publicamente cada un di e comandantenan nobo a traves di su canal di Telegram, elogiando nan liderato y compromiso.

E declaracionnan di e embahador Ruso a circula den un contexto di divisionnan profundo dentro di e structura di siguridad Venezolano. For di Moscu, oficialnan di e gobierno Ruso a insisti cu e operacion di Merca a constitui un violacion di derecho internacional y a ratifica nan posicion contra e uso di forsa den e region. A pesar di e condenacionnan ey, e captura di Maduro a marca un kibramento den e balans di poder na Venezuela y a mustra fracturanan den aparato di Estado.

Den e entrevista, Melik-Bagdasarov a enfatisa cu e resultado di e operacion no por ser splica solamente via capacidad militar di Merca. Den su opinion, e ausencia di un reaccion efectivo di forsanan di siguridad Venezolano ta decisivo.

“Hopi no a haci loke nan por a haci,” el a insisti, mientras cu el a sugeri cu tabatin un red di colaboracion previo cu a facilita e accion Mericano.

E impacto di e captura di Maduro a bay mas leu di frontera Venezolano. E dictadura Cubano a confirma e morto di 32 agente di siguridad Cubano durante e operacion, gran parti di nan liga cu tarea di proteccion di e dictador chavista.