Tension entre gabinete y nan apoyo parlamentario ta aumentando desde tratamento di presupuesto complementario siman pasa. E topico ‘salario minimo y bestaansminimum’ a subi mesa den forma di un mocion pa urgi gobierno introduci un aumento sustancial di salario minimo, cu e obhetivo pa (cuminza) cera e brecha entre esakinan. E mocion modifica sin consentimento di esun cu a propone a conduci na su salida for di e partido democrata cristian, cu a mira su fraccion reduci na 8 asiento.E forma con e asunto a bay ta indica mas problema pa e coalicion, pero nos ta laga esey pa e futuro sucesonansegun cu nan ta tuma lugar. Di otro banda, e sucesonan mes ta mustra cu e manera con e tipo di topico aki ta keda trata, ta indicacion di e deficiencianan den nos parlamento.

Pa cuminza e mocion tabata un holor di sensacionalismo cune, por lo menos di falta di realismo. Con ta desea un cumplimento di henter e operacion di introduccion di un medida asina contundente, pa mas tarda 1 di maart 2027, si e trabao preparativo, di estudio, consulta y formulacion di e legislacion necesario lo tuma hopi mas tempo? Envez di modifica e mocion di e parlamentario envolvi, lo tabata mas recomendable splica e parlamentario cu su schedule ta irealistico. Y si el a insisti, anto laga e mocion bay pa votacion, cu voto di cada miembro di parlamento segun nan consenshi. Pero nos tin e impresion cu e pleito lo a tuma lugar di tur manera y cu e kiebra cu su partido tabata na caminda pa basta tempo caba.

Pero tirando un vista obhetivo riba e mocion pakico e ta irealistico? Pa loke ta e tempo necesario pa prepara, kico por mira como tarea pa cumpli? Pa cuminza, un aumento di salario minimo dentro di e actual ley di salario minimo ta significa cu lo a haci e trabao necesario caba. Pregunta: tin un calculacion di CBS di e inflacion entre augustus 2025 y augustus 2026? Otro pregunta: tin un conseho di SER tocante esaki? No, tin un conseho si di januari 2026, unda e Conseho ta recomenda un estudio mas extenso pa por yega na conclusion tocante e tema di hiba salario minimo na e nivel di e minimo di subsistencia. Pero esey no ta tur: dentro di e ley actual, manera e ta structura, no ta posible introduci un aumento asina riguroso, ni bao di articulo 13, inciso 3, cu ta duna gobierno facultad pa modifica, bao di circunstancia extraordinario, e sumanan di salario minimo menciona den e ley. Un proyecto manera proponi pa cera e brecha entre salario minimo y bestaansminimum ta parce nos imposible sin legislacion nobo, y si nos no ta quiboca esey tabata e conseho tambe di SER. Conclusion: no tin un base realistico pa bay introduci algo, ni entrante 1 di januari 2027 ni entrante 1 di maart 2027. Tocante e deseo di un tipo di compensacion pa empresa den sector priva cu no por carga e costo extra di e medida; un tipo di ‘reparatietoeslag’. Esaki ta requeri legislacion tambe, y ademas lo mester bay den presupuesto 2027 y e añanan despues. Hasta pa un modificacion di e proyecto di presupuesto 2027 gobierno lo mester tin un splicacion solido, cu vision multi-anual, pa hustifica e gasto. Nan por conta tambe riba pregunta serio di CAft encuanto e motivacion di un areglo asina, si no por sustancia con ta bay implementa e asunto aki. Pero, realmente e pregunta critico no mester bin necesariamente di e colegio di supervision financiero; mester por mira e mesun actitud critico aki den nos parlamento, di ambos banda di sala. Tur hende por comprende pakico tin un urgencia pa haci algo al respecto, pero no por salta e pasonan necesario aki. Pero tin algo mas; esey ta e pregunta pakico ta gobierno mester carga otro medida di compensacion. Nos nunca a mira un evaluacion di e reparatietoeslag. Den un Editorial reciente (26 october 2026) nos a toca e tema aki di areglo di compensacion, unda por lo menos pa e reparatieteslag pa cierto categoria por a implementa esaki di otro forma. Den e caso di compensacion den cuadro di e salario minimo e pregunta clave ta: pakico, si desaroyo economico den ultimo añanan tabata practicamente espectacular, ta gobierno mester yuda carga e peso, ademas di e gastonan extra di aparato? Y si acaso tin un parti di sector priva cu no por carga e peso, no ta logico averigua ken si y ken no por carga esaki? Asina leu cu nos sa, lanza un par di grito, dentro di o dilanti parlamento, no ta duna nos e datonan cu mester pa tuma decision sensato.

E sucesonan describi aki ta mustra tambe e deficiencianan den nos sistema parlamentario. Den nos edicion di ayera tabatin un relato interesante tocante e estudio haci di nos parlamento, cu a sali publica recientemente den e revista academico Small States & Territories. Resaltante ta cu a menciona varios deficiencia, di cual ningun ta desconoci, pero no undiferencia grandi cu tin entre un parlamento den un pais grandi y na nos isla: e falta di apoyo profesional, huridico y otro disciplina, di nos parlamento. Realmente parlamento den su totalidad ta semper den desbentaha compara cu gobierno, cu si ta conta cu e experticio necesario. E falta di preparacion cientifico di e materia cu parlamento mester trata ta conduci na un nivel pesimo di debate. Parlamento ta depende demasiado di informacion di gobierno y lo mester bira mas autocritico tambe pa loke ta nan prestacion conhunto.