Minister di Finanzas, Asunto Economico y Sector Primario, Geoffrey Wever (Futuro) ta informa cu e cantidad di permiso nobo pa habri negoshi a crece cu 16 porciento compara cu 2024. Segun cifranan di Departamento di Asunto Economico e cantidad di permiso pa negoshi nobo a aumenta di 757 den 2024 pa 880 den 2025. Esaki ta mustra un aumento di 123 permiso pa negoshi nobo of 16% mas cu 2024.
E aumento record den e cantidad di permiso otorga pa negoshi nobo ta demostra confianza di comercio den Aruba su economia, segun un comunicado di gobierno. Como indicador di mas actividad economico, e aumento den e cantidad di permiso pa negoshi nobo di 757 den 2024 pa 880 den 2025 ta mustra e mesun aumento cu cifranan oficial di SVb. E cantidad di relacion di trabao den 2025 a crece di 45.391 den luna di januari pa 48.393 den december 2025. Un aumento di 3.002 relacion di trabao. E cantidad di dunadornan di trabao den 2025 a crece di 3.767 den januari 2025 pa 4.028 den december 2025. Un aumento di 261 extra den e cantidad di dunadornan di trabao.
Cifranan den aumento di permiso otorga pa negoshi nobo den 2025 como indicador di mas actividad economico ta den liña cu ahustacion di e aumento di Aruba su economia, segun e comunicado. E ahustacion di Departamento di Asunto Economico pa e proyeccion economico den 2025 di 3,2 porciento pa 5,9 porciento ta refleho di desaroyonan positivo di Aruba su economia. Cu mas permiso otorga pa negoshi nobo den 2025 ta demostra un desaroyo positivo di nos economia.
Comercio ta e motor di nos economia. E aumento record di 16 porciento mas den permiso pa negoshi nobo den 2025 compara cu 2024 ta demostra cu nos comerciantenan tin confianza pa sigui inverti y contribui na nos economia, segun minister Geoffrey Wever.
Minister Geoffrey Wever ta gradici Departamento di Asunto Economico pa e trabao di ehecuta e Ley pa otorga permiso pa negoshi y informa continuamente riba e desaroyo di permisonan otorga. Pa tur informacion por bishita e website www.deaci.aw
