Dia 30 di januari 2026, e coalicion nobo di Hulanda—consistiendo di partido D66, VVD y CDA—a publica nan acuerdo di coalicion pa e prome termino di gobierno nobo, esta 2026-2030. Durante un conferencia di prensa, a presenta e acuerdo aki mencionando algun punto importante pa gobernacion, incluyendo algun cu ta trata islanan den Caribe Hulandes.

E acuerdo di coalicion Hulandes pa 2026-2030 ta reafirma cu Reino Hulandes ta extende mas leu cu Europa y ta inclui Aruba, Corsou y Sint Maarten, hunto cu Boneiro, Sint-Eustatius y Saba. E acuerdo aki ta enfatisa cu Reino ta mas cu un pais den Lama Norte y ta marca e relacion cu islanan den Caribe como uno basa riba responsabilidad comparti y cooperacion.

Segun e acuerdo Hulanda tin e meta pa fortalece colaboracion igual y constructivo dentro di Reino. Den su cooperacion cu Aruba, Corsou y Sint Maarten, e enfoke lo ta riba bon gobernansa, proteccion di derecho humano y estado di derecho fuerte, mientras tanto trahando riba aumenta auto-dependencia di e paisnan. E coalicion ta bisa cu temanan manera corupcion y mitigacion di actividad criminal lo ser activamente atendi den colaboracion cu e islanan.

Pa Caribe Hulandes—Boneiro, Sint-Eustatius y Saba—E acuerdo ta bisa cu e politica nobo introduci na Hulanda Europeo lo aplica eynan tambe, tanten cu tin motibo pa haci esaki. Gobierno Hulandes ta comprometi di construi un minimo social cu hende por biba riba dje, siguiendo e recomendacionnan di e Comision Thodé, incluyendo manteniendo necesidadnan basico y utilidadnan pagable. Ley di gobernansa y maneho financiero pa e islanan aki tambe lo ser modernisa, incluyendo e introduccion di un legislacion di integridad manera e ley Bibob.

E acuerdo di coalicion aki ta reconoce cu e parti Caribense di Reino Hulandes ya ta experenciando e efectonan di cambio di clima, incluyendo degradacion di rifnan di coral y inundacion. Como resultado, e coalicion ta comprometiendo na avansa un agenda climatico conhunto y lo continua e Plan di Politica di Medio Ambiente y Naturalesa pa Caribe Hulandes.

Esaki ta specialmente relevante pa coralnan di Aruba, ya cu gran parti di nos rifnan ta morto, segun Rene Henkens di Wageningen University & Research a conta Bon Dia Aruba na februari 2025, en conexion cu e proyecto ‘Turning the Tide.’

Aunke e tempo ey ya a conta cu tabatin medidanan implementa pa yuda restaura coral rond di isla, e coralnan ta keda vulnerable pa nivelnan di lama y specialmente loke nan ta yama “bleaching”, un proceso unda e coralnan ta perde alga cu ta biba den nan tehido pa via di stress, causando nan pa perde nan color y asina perde nan fuente principal di alimentacion.

Aunke un agenda climatico ta señala un speransa pa proteccion di Aruba su naturalesa, mester subraya cu esaki tin mester di e cooperacion y accion concreto di gobierno. Y esaki por ta un punto di preocupacion.

Manera Bon Dia Aruba a publica e siman aki den un articulo titula “ABC ta haci yamado pa amplia educacion riba naturalesa”, interes en general pa protege nos medio ambiente ainda ta hopi abao. Manera Sr. Greg Peterson si Aruba Birdlife Conservation a conta Bon Dia Aruba, companianan en general ta enfoca mas riba ganashi y mucho menos riba Aruba su naturalesa. Ta p’esey e NGO ta haciendo yamado pa un liderazgo grandi cu por surpasa e limitenan causa pa e desinteres aki. Kisas por spera cu e agenda climatico di Reino por trece un cambio berdadero.

Pa loke ta desaroyo economico, e coalicion nobo di Hulanda ta planea pa establece un Plataforma di Crecemento Economico pa Caribe, diseña pa stimula innovacion y crecemento economico sostenible den tur seis isla. Ademas, e Institucion di Inversion Nacional lo por inverti den tur cuatro pais di Reino bao e mesun condicionnan.

E acuerdo di coalicion ta bisa cu pa aborda pobresa ta keda un prioridad clave den e parti Caribense di Reino, cu un enfasis riba cooperacion igual y fortaleciendo auto-dependencia. Mientras cu no a specifica un suma pa Aruba, prome minister eligi Rob Jetten a duna comentario cu tin planea pa otorga 30 miyon euro pa municipalidadnan Boneiro, Sint-Eustatius y Saba pa asina aborda e tema di pobresa.

E rapport ta subraya e necesidad pa atende pobresa como parti di esfuersonan amplio pa mehora gobernansa, resiliencia economico y condicionnan social.

E acuerdo tambe ta reitera cu Hulanda ta keda responsable pa defensa di e parti Caribense di Reino Hulandes, incluyendo mantene un presencia militar fuerte pa protege interesnan comparti.

E ultimo luna aki a pone seguridad di e islanan na prueba debi na e operacion militar di Merca na costa di Venezuela cu a resulta den e captura di ex-presidente Nicolas Maduro. Den e simannan prome cu e captura, Merca a aumenta nan presencia den Caribe, specialmente na Trinidad y hermana isla Corsou, aumentando preocupacion tocante e seguridad y impacto economico riba e islanan Aruba, Boneiro y Corsou cu ta situa mas cerca di e continente Latino America.

Manera e acuerdo di coalicion a stipula, e Statuut di Reino ta keda e fundeshi di relacionnan, y e acuerdo ta bisa explicitamente cu e islanan ta retene y derecho pa declara independencia si nan kier haci esey.

Den entrevista despues di e presentacion di e acuerdo, prome minister eligi Jetten a expresa su orguyo di loke su gabinete ta planea pa haci pa e parti Caribense di Reino. “Nos ta hopi satisfecho cu nos por a yega na varios acuerdo positivo pa e islanan den Reino, manera intensifica cooperacion den areanan di seguridad, economia y sostenibilidad. Nos ta haciendo esaki, entre otro, por medio di haci e Banco di Inversion Nacional pa e paisnan, pa asina Aruba, Corsou y Sint Maarten por haci uso di tur areglo disponible pa renoba nan economia y sigura cu, hunto cu turismo, otro sectornan riba e isla tambe por ser fortalece.”