Como reaccion riba varios incidente tragico y lamentable cu a resulta den perdida di bida riba beachnan di Aruba, Parlamentario di AVP, Jennifer Arends-Reyes a dirigi pregunta oficial na Minister di Turismo, Wendrick Cicilia (AVP) tocante e estado, cobertura y responsabilidad di lifeguard of personanan cualifica pa duna prome auxilio riba nos costa. Tambe Arends-Reyes recientemente a entrega un mocion riba e topico aki.

Segun Arends-Reyes a indica den un comunicado di prensa, e ripiticion di incidente grave riba beachnan ta mustra claramente cu no por sigui trata e asunto di siguridad di bishitante y localnan como algo secundario. “Nos ta papia di bida humano. Tur bishitante y tur ciudadano cu ta drenta lama mester por conta cu proteccion, preparacion y reaccion rapido di personanan designa ora un emergencia sosode,” Parlamentario Arends-Reyes a declara.

Entre e preguntanan presenta, e parlamentario ta pidi claridad riba:

* Cual institucion of ministerio ta finalmente responsabel pa coordinacion y supervision di un sistema di lifeguards.

* Ki rol strandpolitie por tin?

* Mester tin borchinan cu ta indica peliger di coriente despues di cierto distancia;

* Cual standard di entrenamento y certificacion e lifeguards mester cumpli cune;

* Y cual accionnan concreto lo wordo tuma pa evita cu incidente similar sigui tuma lugar den futuro.

Arends-Reyes a enfatisa cu turismo ta e motor principal di economia di Aruba, pero cu no por logra exito den turismo na costa di siguridad y bienestar di hende. “Un destino turistico di calidad ta uno cu ta garantisa no solamente experiencia, sino tambe proteccion. Esaki ta un responsabilidad comparti, pero cu gobierno mester tuma liderazgo,” el a añadi.

Cu e preguntanan parlamentario, Parlamentario Jennifer Arends-Reyes ta enfatisa cu Parlamento tin un deber pa monitor, cuestiona y exigi accion ora ta trata siguridad publico, y ta boga pa un solucion structural y sostenibel pa cu siguridad riba nos beachnan.

Concentracion di incidente fatal na beach

Na januari 2026 tabatin varios incidente di turista cu a hoga of haya problema na lama y beach di Aruba, y e concentracion di e incidentenan aki a crea preocupacion entre comunidad.

Entre nan tabatin al menos cuatro morto relaciona cu awa: un turista cu a hoga na Boca Catalina; un Mericano di 77 aña di edad, pasahero di crucero, cu a hoga cerca di Palm Island; y otro dos hogamento riba dianan consecutivo, na Mangel Halto y Palm Beach.

E concentracion di e incidentenan aki dentro di un periodo cortico di tempo a genera reaccion fuerte den comunidad. Riba rednan social y den combersacionnan diario, hopi residente a expresa preocupacion tocante si Aruba ta experimentando un aumento real den morto di turista, of si e percepcion aki ta bin di e frecuencia cu cual noticianan asina a bin dilanti den un solo luna.

Basa riba reportahenan disponible publicamente den medionan local, e siguiente incidentenan involucrando turista a keda reporta durante januari 2026:

*Un turista a hoga na Boca Catalina, un señora di 58 aña cu tabata di bishita riba crucero.

*Un homber Mericano di 77 aña, tambe di bishita riba crucero, a hoga cerca di Palm Island. Un boto a trec’e na e pier mientras tabata duna CPR, pero el a fayece a pesar di esfuersonan continuo di personal di emergencia.

*Un homber Mericano di 72 aña di edad a haya problema den lama na Mangel Halto. Polis y ambulance a responde cu urgencia, pero e victima a fayece a pesar di esfuerso di resucitacion.

*Un turista Mericano di 63 aña di edad a bira malo despues di sali di lama na Palm Beach, cerca di area di Riu Antillas. El a collapse riba beach y a fayece a pesar di CPR administra pa personal di ambulance.

Den comunidad ta reina e sentimento cu januari 2026 ta representa un situacion inusual, pero ta importante pa pone e eventonan aki den contexto di añanan anterior. Basa riba reportahe di Bon Dia Aruba y otro medionan di comunicacion, al menos siete morto di turista vincula na awa of actividadnan relaciona cu beach a keda reporta durante 2025.

E incidentenan aki a sucede durante transcurso di aña y na diferente sitio, incluyendo Baby Beach, Arashi, Boca Catalina, Boca Grandi y Tres Trapi. Den varios caso, autoridadnan y medionan di comunicacion a indica cu e mortonan tabata involucra un combinacion di hogamento y emergencia medico, hopi biaha mientras turista tabata landa of tiki despues di participa den actividadnan relaciona cu awa.

Mientras e cantidad di morto di turista relaciona cu awa reporta na 2025 ta significante, e casonan aki tabata distribui durante diesdos luna. Esaki ta den contraste cu januari 2026, durante cual a reporta varios incidente fatal involucrando turista dentro di un solo luna.

Concentracion versus cifra total

Sin estadistica oficial, comprensivo, no ta posible pa conclui cu januari 2026 a mira mas morto di turista cu 2025 of añanan anterior. Loke si por bisa cu confiansa ta cu e concentracion di incidente fatal involucrando turista na januari 2026 ta notable.

Den otro palabra, e problema por no ta e cantidad total di morto, sino mas bien e frecuencia den cual varios incidente a sucede dentro di un periodo cortico. E clusternan aki a crea un impacto fuerte riba percepcion publico, amplificando preocupacion entre residente y poniendo mas atencion riba seguridad di turista.

Expertonan den comunicacion di crisis hopi biaha ta resalta cu ora eventonan negativo ta sucede cerca di otro den tempo, nan ta sinti mas alarmante cu e mesun cantidad di incidente plama durante un periodo mas largo. Esaki por yuda splica pakico hopi hende ta sinti cu “hopi a pasa den un periodo cortico” a pesar cu aña apenas a cuminsa.

Falta di data oficial

Un reto mayor den analisis di morto di turista na Aruba ta e falta di data oficial cu ta facilmente accesible. Por ehemplo, e jaarverslag di OM no ta distingui entre morto di local of turista, y polis di Aruba no ta publica datonan asina tampoco pa publico. E cifranan presenta den e rapport di OM ta referi tipicamente na fatalidadnan y casonan criminal en general, sin specifica status di e victimanan.

E falta di diferenciacion aki ta limita significantemente e habilidad di ciudadanonan y hasta prensa pa identifica tendencianan of saca conclusion firme. Sin datonan cla separando turista for di residente, y sin categorisacion pa causa di morto – manera hogamento, accidente di trafico, violencia of emergencia medico – cualkier analisis ta keda incompleto.

Cautela

E cantidad di morto di turista reporta na januari 2026, y particularmente e concentracion di e incidentenan aki dentro di un periodo cortico di tempo, logicamente a genera preocupacion den comunidad local. E sentido cu varios tragedia a sucede den un tempo cortico ta sosteni pa casonan reporta, y no mester ignora esaki.

Na mes momento, den ausencia di data comparable oficial y completo for di autoridadnan, no lo ta responsable pa conclui cu Aruba ta experimentando un aumento structural den morto di turista. Loke si por bisa ta cu januari 2026 a mira un agrupacion inusualmente halto di incidente fatal involurando turista compara cu e patronchi observa aña pasa.

Pa un evaluacion profundo y transparente, acceso na estadisticonan oficial cu ta diferencia claramente entre turista y residente ta esencial. Te cu data asina bira disponible, tanto medionan di comunicacion como e publico en general mester depende riba reportahe y analisis contextual, interpreta cu cautela.