Ministerio di Innovacion, bao liderazgo di minister Gerlien Croes (Futuro), y cu aporte di TWO, a organisa y forma parti di un Pressure Cooker guia door di Stichting ICTU (de ICT uitvoeringsorganisatie Nederland).
E Pressure Cooker tabata un siman largo di trabao intensivo cu participacion di diferente experto di ICT for di institucionnan gubernamental. E proposito principal di e Pressure Cooker aki tabata pa evalua e situacion actual di ICT – tecnologia di informacion y comunicacion – den sector publico y defini e proximo pasonan pa un enfoke mas coordina, eficiente y formula e rekisitonan esencial pa logra esaki.
Durante e Pressure Cooker a keda comproba cu Aruba no tin un structura defini den ICT pa gobierno, mientras cu compra di servicio y medionan di ICT ta sucede separa pa cada departamento. Ademas, conocemento y capacidad di ICT ta reparti bao di diferente instancia, cu ta limita eficiencia, colaboracion y uso optimal di recurso.
Como resultado, e grupo a conclui cu e creacion di un SSO pa ICT ta un paso esencial pa fortalece e base digital di gobierno. Un SSO ICT lo concentra conocemento, capacidad y infrastructura comun, permitiendo cu varios departamento por usa e mesun servicionan basico aki, manera licencia, siguridad digital, data management y sosten tecnico general.
Pa yega na implementacion, Ministerio di Innovacion a formula e rekisitonan esencial y ta propone pa enfoca riba un programa cu enfasis riba formacion, cooperacion interdepartamental, financiamento structural, personal y compra centralisa. E resultado di e Pressure Cooker inicio pa e siguiente fase di desaroyo.
Cu esaki, Aruba ta pone un paso importante den rumbo di un gobierno mas digital, eficiente y prepara pa futuro, segun un comunicado di gobierno.
